ފްލޫ ކްލިނިކްތަކަށް ދާ އެންމެން ޓެސްޓު ކުރަނީ
ކޮވިޑް-19 އަށް ހޯމަ ދުވަހު 15 މީހަކު ވަނީ ޕޮޒިޓިވްވެފައި
މާލޭގައި ހަދާފައިވާ ފްލޫ ކުލިނިކެއް
ކޮވިޑް-19 އަށް ޕޮޒިޓިވްވާ މީހުންގެ އަދަދު ދުވަހުން ދުވަހަށް އިތުރުވަމުންދާތީ ބަލީގެ އަލާމަތްތައް ހުރެގެން ފްލޫ ކްލިނިކްތަކަށް ދާ ހުރިހާ އެންމެން ކޮވިޑް-19 އަށް ޓެސްޓު ކުރާނެކަމަށް ޑރ ނަޒްލާ ރަފީގް ވިދާޅުވެއްޖެ އެވެ.
ކޮވިޑް-19 އާ ގުޅިގެން އެންމެ ފަހުގެ މައުލޫމާތު ހިއްސާކުރުމަށް ހޯމަ ދުވަހު ނެޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ)ގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ މެޑިކަލް އޮފިސަރު ޑރ. ފާތިމަތު ނަޒްލާ ރަފީގު ވިދާޅުވީ ކޮވިޑް-19 ށް ޕޮޒިޓިވްވި ކޭސްތަކުގެ ތެރޭގައި ފްލޫ ކްލިނިކްތަކަށް ދައްކަންދިއަ މީހުން ހިމެނޭތީ މީގެ ފަހުން އެ ކްލިނިކު ތަކަށްދާ ހުރިހާ އެންމެން ކޮވިޑް-19 އަށް ޓެސްޓު ކުރާނެ ކަމަށެވެ.
ކޮވިޑް-19 އަށް ހޯމަ ދުވަހުގެ މެންދުރާ ހަމައަށް، ހިނގަމުންދާ 24 ގަޑީއިރު ތެރޭގައި 15 މީހަކު ވަނީ ޕޮޒިޓިވްވެފައެވެ. އޭގެތެރޭގައި ހިމެނެނީ 9 ދިވެހިންނާއި 6 ބިދޭސީންނެވެ.
މީގެތެރޭގައި ފްލޫ ކްނިލިކަށް ދައްކަން ދިޔަ ތިން ދިވެހިން ހިމެނެ އެވެ. މާލެއިން އެންމެ ފުރަތަމަ ޕޮޒިޓިވްވި ދިވެހި އަންހެން މީހާއަށްވެސް ބަލި ޖެހިފައި ހުރިކަން އެނގިފައިވަނީ ފްލޫ ކްލިނިކަށް ދައްކަން ދިޔުމުން ޓެސްޓު ހެދުމުންނެވެ.
ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 67 ށް އަރާފަ އެވެ. މީގެތެރޭގައި ހިމެނެނީ 29 ދިވެހިންނާއި 38 ބިދޭސީންނެވެ. މީގެތެރޭގައި މާލެ ސިޓީން ޕޮޒިޓިވްވި 47 މީހަކު ހިމެނެ އެވެ. އަދި ރަށެއްގައި ހުރި އެކަކާއި ކަރަންޓީނު ފެސިލިޓީތަކުގައި 5 މީހުން އެބަތިއްބެވެ.
