ކައުންސިލް އިންތިޚާބަށް ސަސްޕެންޑްކުރި ފެނަކަ ކޯޕްރޭޝަންގެ މުއައްޒަފުންގެ ސަސްޕެންޝަން އުވާލައިފި
20 އެޕްރީލު 2020 | ހޯމަ 07:40ސަސްޕެންޝަން އުވާލީ އާދިއްތަ ދުވަހު
ފެނަކަ ކޯޕްރޭޝަންގައި މަސައްކަތް ކުރާ މުއައްޒަފުންތަކެއް
ލޯކަލް ކައުންސިލް އިންތިޚާބަށް ސަސްޕެންޑްކުރި ފެނަކަ ކޯޕްރޭޝަންގެ މުއައްޒަފުންގެ ސަސްޕެންޝަން އުވާލައިފިއެވެ.
ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި ފެނަކަ ކޯޕަރޭޝަންގެ މެނޭޖިންގް ޑިރެކްޓަރ އަހުމަދު ސައީދު މުހައްމަދު ވިދާޅުވީ އިންތިޚާބަށް ސަސްޕެންޑްކުރި ފެނަކައިގެ މުއައްޒަފުންގެ ސަސްޕެންޝަން އުވާލީ އާދިއްތަ ދުވަހުގެ ވަގުތެއްގައި ކަމަށެވެ.
ސައީދު ވިދާޅުވީ އާދިއްތަ ދުވަހުން ފެށިގެން އެ މުއައްޒަފުންނަށް ލިބެންޖެހޭ ހުރިހާ އިނާޔަތެއް ލިބޭނެ ކަމަށާއި، ފެނައިގެ މުއައްޒަފަކަށްވީތީ ލިބެންޖެހޭ ހައްގުތައް ލިބޭނެ ކަމަށެވެ. އެއީ ގާތްގަނޑަކަށް 26 މުއައްޒަފުން ކަމަށް ވެސް ސައީދު ވިދާޅުވިއެވެ.
މީގެ އިތުރުން ސައީދު ވިދާޅުވީ މިދަނޑިވަޅަކީ ޚާއްސަ ގޮތެއްގައި އެކަކު އަނެކަމަށް އަޅާލައި އެހީތެރިކަން ފޯރުކޮށްދޭން ޖެހޭ ދުވަސްވަރެއް ކަމަށެވެ. އެގޮތުން ފެނައިގެ މުއައްޒަފުން ކުރާ މަސައްކަތްތަކާއި، ދެމުންދާ އެހީތެރިކަމަށް އެމްޑީ ސައީދު ވަނީ ތައުރީފް ކުރައްވާ ޝުކުރުއަދާ ކުރައްވާފައެވެ.
ކައުންސިލް އިންތިޚާބަށް ސަސްޕެންޑްކުރި ފެނަކަ ކޯޕްރޭޝަންގެ ހުރިހާ މުއައްޒަފުންގެ ސަސްޕެންޝަން އުވާލާފައިވާއިރު، ސިވިލް ސަރވިސްގައި މަސައްކަތްކުރާ 204 ސިވިލް ސަރވެންޓުން މި އިންތިހާބުގައި ކެންޑިޑޭޓުންގެ ގޮތުގައި ވާދަކުރާތީ އަދިވެސް ތިބީ ސަސްޕެންޝަންގައެވެ.
ކޮވިޑް-19 ގެ ބިރުވެރިކަމާއި ކުރިމަތިވީ، އިންތިޚާބު ބޭއްވުމަށްފަހުގެ ތައްޔާރީތައް ވަމުން ދަނިކޮށްށެވެ. އަދި އިންތިޚާބު ބޭއްވޭނެ ދުވަހެއް ނޭނގޭއިރު، މުއައްޒަފުންގެ ސަސްޕެންޝަންއަށް އަވަސް ހައްލެއް ނުލިބިއްޖެނަމަ ގިނަ އާއިލާތަކަކަށް މިކަމުގެ ދެރައާ ނިކަމެތިކަން ލިބޭނެ ކަމުގެ އަޑުތައް ވަނީ ފެތުރިފައެވެ. އެހެންކަމުން މިކަމަށް އަވަސް ހައްލެއް ގެނައުމަށް ބައެއް ރައްޔިތުން މަޖިލީހުގެ މެމްބަރުން ވެސް ވަނީ ގޮވާލައްވާފައެވެ.
