ސިއްހީ މާހިރުން ދެއްވާ ލަފަޔާ އެއްގޮތަށް އަމަލުކޮށް، އެއްބައިވަންތަކަންމަތީ ތިބުމަށް ރައީސް މައުމޫން އިލްތިމާސްކުރައްވައިފި
20 އެޕްރީލު 2020 | ހޯމަ 07:05މިކުރާ މަސައްކަތުގައި ފައިދާ ވާނީ އެންމެން ގުޅިގެން މަސައްކަތްކޮށްގެން ކަމަށް ރައީސް މައުމޫން ވިދާޅުވި
ކުރީގެ ރައީސް އަލްއުސްތާޛު މައުމޫން އަބްދުލްޣައްޔޫމް
މިހާރު މުޅި ދުނިޔެއަށް އަދި ރާއްޖެއަށްވެސް ކުރިމަތިވެގެން މިއުޅޭ ކޮވިޑް-19 ކަންތަކުގައި ދިވެހި ރައްޔިތުން ވީހާވެސް ބޮޑަށް އެއްބައިވަންތަވެ ސިއްހީ މާހިރުން ދެއްވާ ލަފަޔާ އެއްގޮތަށް ޢަމަލުކުރުމަށް ރައްޔިތުންނަށް ކުރީގެ ރައީސް އަލްއުސްތާޛު މައުމޫން އަބްދުލްޣައްޔޫމް އިލްތިމާސްކުރައްވައިފި އެވެ.
ރާއްޖެޓީވީން ކޮވިޑް-19 އާ ގުޅިގެން ކުރިޔަށް ގެންދާ ޚާއްސަ ކަވަރޭޖަށް ދެއްވި އިންޓަރވިއުގައި ރައީސް މައުމޫން ވިދާޅުވީ ދިވެހިންނަށް ދިމާވި މިފަދަ އުނދަގޫ ކޮންމެ ހާލަތެއްގައިވެސް ވަރަށް ބޮޑަށް ގައުމީ ރޫހެއްގައި އެއްބާރުލުން ދީގެން ގައުމަށްޓަކައި މަސައްކަތްކޮށްފައިވާ ކަމަށެވެ. އެގޮތުން ކޮރެލާ އާއި ޝިގެއްލާ އަދި ސުނާމީ ކާރިސާގެ ހާލަތުގައި ދިވެހިން ދައްކުވައިދީފައިވާ އެއްބައިވަންތަކަށް ރައީސް މައުމޫން ފާހަގަކުރެއްވި އެވެ. އެހެންކަމުން މިހާރުވެސް ދިމާވެފައިމިވާ ދަތި އުނދަގޫ ދުވަސްތަކުން ސަލާމަތްވެވޭނީ އަދި މިކަމުން ސަލާމަތްވުމަށް މިކުރާ މަސައްކަތުގައި ފައިދާ ވާނީ އެންމެން ގުޅިގެން މަސައްކަތްކޮށްގެން ކަމަށް ރައީސް މައުމޫން ވިދާޅުވި އެވެ.
މިކަންކަން ދިމާވީމާ ދިވެހި ރައްޔިތުން ކެތްކުރަން ޖެހޭކަމަށާއި ހިތްވަރުކޮށް މާތް ﷲ އަށް ވަކީލުކުރަން ޖެހޭ ކަމަށް ރައީސް މައުމޫން ވިދާޅުވި އެވެ. އަދި މީގައި އެންމެ މުހިންމު ކަމަކީ ސިއްހީ މާޙިރުން ދެއްވާ ލަފާ އެންމެންވެސް ގަބޫލުކޮށް އެގޮތަށް އަމަލުކުރުން ކަމަށް ރައީސް މައުމޫން ވިދާޅުވި އެވެ.
ރައީސް މައުމޫން އިތުރަށް ވިދާޅުވީ ރާއްޖޭގައި މިހާރު މިއޮތް ހާލަތު މިއޮތީ މިކަމުން ރައްކާތެރިވުމަށް ސަރުކާރުން އަޅާފައިވާ ފިޔަވަޅުތަކުގެ ސަބަބުން ކަމަށެވެ. އެހެން ނޫންކަމަށްވާނަމަ މިއަށްވުރެވެސް ހާލަތު ގޯސްވާނެކަމަށް ރައީސް މައުމޫން ވިދާޅުވި އެވެ.
ރައީސް މައުމޫންގެ ވާހަކަފުޅުގައި ވަނީ އެކަކު އަނެކަކަށް އެހީތެރިވެ ގައުމީ ރޫހެއްގައި ގުޅިގެން މަސައްކަތް ކުރުމަށް ހުރިހާ ރައްޔިތުންގެ ކިބައިން އެދިވަޑައިގަންނަވާފަ އެވެ.
