ހުޅުމާލެ މެޑިކަލް ފެސިލިޓީ ކުރިއަށް އޮތް ހަފްތާގެ ތެރޭގައި ނިމެނޭނެ: އެމްއެންޑީއެފް
20 އެޕްރީލު 2020 | ހޯމަ 06:10މިއީ 290 އެނދުގެ ފެސިލިޓީއެއް
މެޑިކަލް ފެސިލިޓީގެ މަސައްކަތްތައް ކުރިއަށްދަނީ
ކޮވިޑް-19އާ ގުޅިގެން ހުޅުމާލޭގައި ގާއިމްކުރާ ''ހުޅުމާލެ މެޑިކަލް ފެސިލިޓީ'' ކުރިއަށް އޮތް ހަފްތާގެ ތެރޭގައި ނިންމާލެވޭނެ ކަމަށް އެމްއެންޑީއެފުން ބުނެފިއެވެ.
މިމަސައްކަތްތައް ކުރިއަށްދާ ގޮތުގެ ތަފްސީލް ހާމަކުރައްވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވީ މިއީ 290 އެނދުގެ މެޑިކަލް ފެސިލިޓީއެއް ކަމަށެވެ. ކުރިއަށް އޮތް ހަފްތާއެއްގެ ތެރޭގައި މަސައްކަތް ނިންމާލެވޭނެ ކަމަށާއި، 24 ގަޑިއިރު މަސައްކަތް ކުރިއަށް ގެންދާކަން ޝަމާލް ފާހަގަކުރެއްވިއެވެ.
ޝަމާލް ވިދާޅުވީ މާލެސީޓީގައި ކޮވިޑް-19 ފެތުރިފައިވާތީ ފަރުވާ ދިނުމަށް ފެސިލިޓީތައް ގާއިމް ކުރަންޖެހޭ ކަމަށެވެ. ހުޅުމާލޭ މެޑިކަލް ފެސިލިޓީއާއެކު ކެޕޭސިޓީ އިތުރުވެގެންދާނެ ކަމަށާއި، މިތަނަކީ ޚާއްސަކޮށް ވައިރަސްއަށް ޕޮޒިޓިވްވާ މީހުންނަށް ފަރުވާ ދިނުމަށް ގާއިމް ކުރެވޭ ތަނެއް ކަމަށް ޝަމާލް ވިދާޅުވިއެވެ.
ރައީސް އޮފީހުގެ ޕްރޮޖެކްޓް ކޮންސަލްޓެންޓް މަހުޖޫބް ޝުޖާއު ވިދާޅުވީ ފަރުކޮޅުފުށި ފަދަ ތަނެއް ކޮވިޑް-19އަށް ޕޮޒިޓިވްވާ މީހުންނަށް ފަރުވާދިނުމަށް ގާއިމްކުރެވިފައިވާ ހުންނަންޖެހޭ ކަމަށެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިރުޝާދުގެ ދަށުން ކުރެވޭ މަސައްކަތް ވަރަށް ފުރިހަމައަށް ދާކަން އޭނާ ވިދާޅުވިއެވެ. އަދި ވިދާޅުވީ މޮރިޝަޝް ކޮމާޝަލް ބޭންކުން ބިން އަދި އިމާރާތްތައް މިގޮތަށް ބޭނުން ކުރުމަށް ދޫކޮށްފައިވާ ކަމަށެވެ.
އެމްއެންޑީއެފްގެ ވައިސް ޗީފް އޮފް ޑިފެންސް ފޯސް، ބްރިގޭޑިއަ ޖެނެރަލް އަބްދުއްރަހީމް އަބްދުއްލަތީފް ވިދާޅުވީ އެމްއެންޑީއެފުން ގައުމާ ރައްޔިތުންގެ ޚިދުމަތުގައި އަބަދުވެސް މަސައްކަތް ކުރާނެ ކަމަށެވެ.
ހުޅުމާލެ މެޑިކަލް ފެސިލިޓީ ގާއިމްކުރަނީ 05 ބްލޮކަށް ބަހާލައިގެންނެވެ. އެތަނުގައި 19 ރޫމް ހުރެއެވެ.
މިފެސިލިޓީ ގާއިމްކުރުމުގެ މަސައްކަތުގައި އެމްއެންޑީއެފްގެ އިތުރުން، އެޗްޑީސީ، ފެނަކަ، އަމިއްލަ ކުންފުނިތަކާއި އެޖެންސީތަކުގެ ގިނަ ބަޔަކު ބައިވެރިވެއެވެ. އަދި ކޮންސްޓްރަކްޝަން މަސައްކަތުގައި އުޅޭ މީހުންގެ އިތުރުން އަމިއްލަ ފަރުދުން ވެސް މަސައްކަތުގައި ބައިވެރިވެއެވެ.
