ކޮވިޑް-19އާ ގުޅިގެން ހުޅުމާލޭގައި ގާއިމްކުރާ ''ހުޅުމާލެ މެޑިކަލް ފެސިލިޓީ'' ކުރިއަށް އޮތް ހަފްތާގެ ތެރޭގައި ނިންމާލެވޭނެ ކަމަށް އެމްއެންޑީއެފުން ބުނެފިއެވެ.
މިމަސައްކަތްތައް ކުރިއަށްދާ ގޮތުގެ ތަފްސީލް ހާމަކުރައްވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވީ މިއީ 290 އެނދުގެ މެޑިކަލް ފެސިލިޓީއެއް ކަމަށެވެ. ކުރިއަށް އޮތް ހަފްތާއެއްގެ ތެރޭގައި މަސައްކަތް ނިންމާލެވޭނެ ކަމަށާއި، 24 ގަޑިއިރު މަސައްކަތް ކުރިއަށް ގެންދާކަން ޝަމާލް ފާހަގަކުރެއްވިއެވެ.
ޝަމާލް ވިދާޅުވީ މާލެސީޓީގައި ކޮވިޑް-19 ފެތުރިފައިވާތީ ފަރުވާ ދިނުމަށް ފެސިލިޓީތައް ގާއިމް ކުރަންޖެހޭ ކަމަށެވެ. ހުޅުމާލޭ މެޑިކަލް ފެސިލިޓީއާއެކު ކެޕޭސިޓީ އިތުރުވެގެންދާނެ ކަމަށާއި، މިތަނަކީ ޚާއްސަކޮށް ވައިރަސްއަށް ޕޮޒިޓިވްވާ މީހުންނަށް ފަރުވާ ދިނުމަށް ގާއިމް ކުރެވޭ ތަނެއް ކަމަށް ޝަމާލް ވިދާޅުވިއެވެ.
މިތާނގަ ތެރޭގައި މިހުރީ 222 މީހުން ލެވޭ ފެސިލިޓީއަކާ އަދި ޑޮކްޓަރުންނާއި ނަރުހުން އެކޮމޮޑޭޝަން ބިލްޑިންއަކާ އަދި ސަޕޯޓް ފެސިލިޓީއަކާއެކު ކޮންޕްލެކްސްއެއް ގޮތުގައި އޮތް މެޑިކަލް ފެސިލިޓީއެއް މިއީ. މިމަސައްކަތް މިހިނގަނީ ސީދާ ރައީސުލްޖުމްހޫރިއްޔާގެ ބެއްލެވުމުގެ ދަށުން ސިފައިން އިސްރޯލެއް އަދާކުރަމުން. އެއާއެކު އެހެން އެޖެންސީތައް ސިފައިންނާއެކު މަސައްކަތް ކުރަމުން މިގެންދަނީ. މީގެ ތެރޭގައި ސިފައިންގެ ވަރަށް ގިނަ ސިވިލް އިންޖިނިއަރުންނާއި، އަރޓިޓެކްޗަރުން އަދި ވެސް އެކިއެކި މަލްޓިޓްރޭޑްގެ މީހުންގެ މިމަސައްކަތް ކުރަމުން މިގެންދަނީ.ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް
ރައީސް އޮފީހުގެ ޕްރޮޖެކްޓް ކޮންސަލްޓެންޓް މަހުޖޫބް ޝުޖާއު ވިދާޅުވީ ފަރުކޮޅުފުށި ފަދަ ތަނެއް ކޮވިޑް-19އަށް ޕޮޒިޓިވްވާ މީހުންނަށް ފަރުވާދިނުމަށް ގާއިމްކުރެވިފައިވާ ހުންނަންޖެހޭ ކަމަށެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިރުޝާދުގެ ދަށުން ކުރެވޭ މަސައްކަތް ވަރަށް ފުރިހަމައަށް ދާކަން އޭނާ ވިދާޅުވިއެވެ. އަދި ވިދާޅުވީ މޮރިޝަޝް ކޮމާޝަލް ބޭންކުން ބިން އަދި އިމާރާތްތައް މިގޮތަށް ބޭނުން ކުރުމަށް ދޫކޮށްފައިވާ ކަމަށެވެ.
އެމްއެންޑީއެފްގެ ވައިސް ޗީފް އޮފް ޑިފެންސް ފޯސް، ބްރިގޭޑިއަ ޖެނެރަލް އަބްދުއްރަހީމް އަބްދުއްލަތީފް ވިދާޅުވީ އެމްއެންޑީއެފުން ގައުމާ ރައްޔިތުންގެ ޚިދުމަތުގައި އަބަދުވެސް މަސައްކަތް ކުރާނެ ކަމަށެވެ.
އެގޮތުން މިފަހަރު ވެސް ކޮވިޑް-19ގެ ބަލިމަޑުކަމުގެ ކަންތަކުގައި ވެސް ދިވެހިރާއްޖެއަށް ދިމާވި މިދަތި ކަންތަކުގައި އެމްއެންޑީއެފްއާ ހަވާލުވި ކޮންމެ ކަމެއްގައި ވެސް ފުރިހަމައަށް ކޮށްދެވޭތޯ ދަނީ މަސައްކަތް ކުރަމުން. އެގޮތުން އެމްއެންޑީއެފް ހުރިހާ މުއައްޒަފުން ވެސް އެމީހަކަށް ޖެހުނު ކޮންމެ ކަމެއް ކުރަމުންދާކަން އުފަލާއެކު ފާހަގަކޮށްލަން. މިމެޑިކަލް ފެސިލިޓީ އަޅުގަނޑުމެން އެޗްއައިއެޗްއާ ފަރުކޮޅުފުށީގައި ވެސް ކޮށްދޭން ޖެހުނު ހުރިހާ މަސައްކަތެއް ނިންމާ އެތަން އެދަނީ މިހާރު ބޭނުން ކުރަމުން.އެމްއެންޑީއެފްގެ ވައިސް ޗީފް އޮފް ޑިފެންސް ފޯސް، ބްރިގޭޑިއަ ޖެނެރަލް އަބްދުއްރަހީމް އަބްދުއްލަތީފް
ހުޅުމާލެ މެޑިކަލް ފެސިލިޓީ ގާއިމްކުރަނީ 05 ބްލޮކަށް ބަހާލައިގެންނެވެ. އެތަނުގައި 19 ރޫމް ހުރެއެވެ.
މިފެސިލިޓީ ގާއިމްކުރުމުގެ މަސައްކަތުގައި އެމްއެންޑީއެފްގެ އިތުރުން، އެޗްޑީސީ، ފެނަކަ، އަމިއްލަ ކުންފުނިތަކާއި އެޖެންސީތަކުގެ ގިނަ ބަޔަކު ބައިވެރިވެއެވެ. އަދި ކޮންސްޓްރަކްޝަން މަސައްކަތުގައި އުޅޭ މީހުންގެ އިތުރުން އަމިއްލަ ފަރުދުން ވެސް މަސައްކަތުގައި ބައިވެރިވެއެވެ.
