ކަސްޓަމަރުން އޯޑަރުތައް ދޭން ގުޅުމުގެ ބަދަލުގައި ވައިބަރ އިން ނަންބަރަށް މެސެޖު ކުރުމަށް އިހްސާނު ފިހާރަ އިން އެދިއްޖެއެވެ.

ރާއްޖެޓީވީ އިން ކޮވިޑް-19 އާ ގުޅޭ ގޮތުން ކުރިއަށް ގެންދާ ހާއްސަ ލައިވް ކަވަރޭޖަށް ދެއްވި ފޯން އިންޓަވިއުއެއްގައި އިހުސާނު ކުންފުނީގެ މެނޭޖިންގ ޑިރެކްޓަރ އަހުމަދު ނިހާދު ވިދާޅުވީ އޯޑަރުތައް ދިނުމަށްޓަކައި 7291003 މި ނަންބަރަށް ގުޅިޔަސް ފޯނު ނުނަގާނެ ކަމަށާއި ވައިބަރ އިން ނަންބަރަށް މެސެޖު ކުރުމަށް އެދޭ ކަމަށެވެ. އަދި އޯޑަރު ދޭން މެސެޖު ކުރާއިރު ކަނޑައަޅާފައިވާ ފޯމެޓަށް ފޮނުވުމަށް ވެސް ނިހާދު ވިދާޅުވިއެވެ.

އެގޮތުން ރިކުއެސްޓް ކުރާއިރު ބޭނުންވާ ތަކެތީގެ ލިސްޓް ޖެހުމަށްފަހު، ގުޅޭނެ ނަންބަރާއި ނަމާއި އެޑްރެހާއެކީ ފޮނުވުމަށް އިހުސާނު ފިހާރައިން ވަނީ އެދިފައެވެ.

މި ހާލަތަކީ އެއްވެސް ވަރަކަށް ތައްޔާރުވި ހާލަތެއް ނޫންކަން ފާހަގަކުރައްވާ ނިހާދު ވިދާޅުވީ ކުއްލި ގޮތަކަށް ކަންތައްތައް ފެށުމުން ދަތިތަކާއި ދިމާވާ ކަމަށެވެ. އެގޮތުން އިއްޔެ ވެސް މާސްކާއި އަންގި ހުސްވުމުން ޑެލިވަރީ ކުރުމުގައި ދަތިތަކެއް ދިމާވި ކަމަށް ވިދާޅުވިއެވެ. މާސްކާއި އަންގި ހުސްވުމުން ހެނދުނުން ފެށިގެން ހަވީރަށް މަސައްކަތް ހުއްޓިފައި އޮތް ކަމަށާއި އިރޮއްސުނުއިރު ޔޫތް މިނިސްޓަރު އަހްމަދު މަހްލޫފު ފޯރުކޮށްދެއްވި މާސްކާއި އަންގި ބޭނުންކޮށްގެން ހިދުމަތް އަލުން ފެށިކަމަށް ނިހާދު ފާހަގަކުރެއްވިއެވެ.

މުވައްޒަފުންގެ ދަތިކަން އެބަހުރި ކަމަށާއި ޑެލިވަރީގައި ހަރަކާތްތެރިވާ ކުދިންނަށް މިއަދުވެސް މާސްކާއި އަންގި ލިބުމުގައިވެސް ދަތިވާ ކަމަށް ނިހާދު ވިދާޅުވިއެވެ. އަދި އެދެނީ އެކަމަށް ސަރުކާރުގެ ފަރާތުން ހައްލެއް ހޯދައިދިނުން ކަމަށެވެ.

ޑެލިވަރީތައް ކޮންމެ ދުވަހަކު ހެނދުނު 09:00ން ފެށިގެން ރޭގަނޑު 12:00 ޖަހަންދެން ކުރަމުންދާ ކަމަށާއި މި ދަނޑިވަޅުގެ ސީރިއަސްކަމުން ޕޭމަންޓް ނަގުމުންދަނީ އޮންލައިންކޮށް ކަމަށް ނިހާދު ފާހަގަކުރެއްވިއެވެ.

ދުވާލެއްގެ މައްޗަށް ދެ ހާހުން އޯޑަރުތައް އަންނަމުންދާ ކަމަށާއި އެ ހުރިހާ އޯޑަރުތަކަށް މިވަގުތު ޑެލިވަރީ ވަގުތުން ނުކުރެވޭނެކަން ހުރިހާ ރައްޔިތުން ވެސް ޤަބޫލު ކުރުމަށް ނިހާދު އެދިވަޑައިގެންނެވިއެވެ. އަދި ޑެލިވަރީތައް ލަސްވިޔަސް މި ދަނޑިވަޅުގައި ކެތްތެރިކަން އިސްކުރުމަށް އެދިވަޑައިގެންނެވިއެވެ.

ބައެއް ފަހަރު އޯޑަރުތައް ޑެލިވަރީ ކުރަން ގޮސް، ކަސްޓަމަރުން ފޯނު ނުނަގައިގެން ދަތިތަކާއި ދިމާވާ ކަަމަށް ވެސް ނިހާދު ވިދާޅުވިއެވެ.

މި ދަނޑިވަޅުގައި ރިޕީޓްކޮށް އަންނަ މުހިންމު އޯޑަރުތަކަށް އިސްކަން ދެމުންދާކަން ފާހަގަކޮށް ނިހާދު ވިދާޅުވީ ކުޑަކުދިންގެ ނެޕީ އަދި ކުޑަކުދިންގެ ކާނާ ފަދަ ތަކެއްޗަށް އޯޑަރު ކުރަމުންދާ ކަސްޓަމަރުންނަށް އިސްކަން ދެމުންދާ ކަމަށެވެ.

ރައްޔިތުންނަށް ބޭނުންވާ ކާޑުގެ ބާވަތްތަކާއި ޒަރޫރީތަކެތި ފޯރުކޮށްދެވޭނެ ކަމުގެ ޔަޤީންކަން އެ ފިހާރައިން ވަނީ ދީފައެވެ.