ކޮވިޑް-19ގެ ނުރައްކަލާ ބިރުވެރިކަން ބޮޑުވެފައިވާ މިދުވަސްވަރު ޖަލު ހަލަބޮލިކުރަން ކުރި މަސައްކަތް ނާކާމިޔާބު ކޮށްލެވިފައިވާ ކަމަށް، ހޯމް މިނިސްޓަރު އިމްރާނު އަބްދުﷲ ވިދާޅުވެއްޖެއެވެ.
މިނިސްޓަރު އިމްރާން މިހެން ވިދާޅުވީ ހޮނިހިރު ދުވަހުގެ ރޭގެ ވަގުތެއްގައި މާފުށީ ޖަލުގެ ޔުނިޓު 9ގައި ހަމަނުޖެހުން ހިންގައިފައިވާތީއެވެ. މިހަމަނުޖެހުން ހިނގާފައިވާ ގޮތާ ބެހޭ ގޮތުން ކަރެކްޝަންސްއިން ބުނީ އެ ޔުނިޓުގައި ތިބި ގައިދީންނަށް ކާންދިނުމަށް ޔުނިޓު ހުޅުވިވަގުތު، ގައިދީން އެޔުނިޓުން ގަދަކަމުން ނިކުތުމުން ކަމަށެވެ. އަދި މިހާދިސާގައި ޖަލުގެ ދެ އޮފިސަރަކަށާއި ގައިދީއަކަށް އަނިޔާވެފައިވާ ކަމަށެވެ.
މިހަމަނުޖެހުމާ ހިންގުމާ މިނިސްޓަރު އިމްރާނާއި ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ހޮނިހިރު ދުވަހުގެ ރޭ ވަނީ ޖަލަށް ވަޑައިގެން ހާލަތު ބައްލަވާލައްވާފައެވެ.
މިހާދިސާއާ ބެހޭ ގޮތުން މިނިސްޓަރު އިމްރާން ވިދާޅުވީ ކޮވިޑް-19އާ ގުޅިގެން މުއައްސަސާތަކަށް ބާރުބޮޑުވެ ނާޒުކު މިވަގުތު ޖަލު ހަލަބޮލި ކޮށްލަން ކުރި މަސައްކަތް ގައިދީންނާއި އޮފިސަރުންނަށް ބޮޑު ގެއްލުމެއް ނުވެ ކޮންޓްރޯލްވެފައިވާ ކަމަށެވެ. އަދި މިހަމަ ނުޖެހުން ކޮންޓްރޯލްކުރެވުނީ މާތްﷲގެ ވާގިފުޅާއެކު އޮފިސަރުންގެ ކުޅަދާނަކަމުންކަން މިނިސްޓަރު ފާހަގަކުރެއްވިއެވެ. އަދި މިސަރުކާރުގެ އަމާޒަކީ އިންސާނީ ކަރާމާތްތައް އިސްކަންދީގެން ޖަލު ބެލެހެއްޓުން ކަމަށް މިނިސްޓަރު އިމްރާން ވިދާޅުވިއެވެ.
ޖަލުގައި ހަމަނެޖުހުން ހިންގުމަށް ބައެއް ގައިދީން މަސައްކަތް ކޮށްފައި ވާއިރު، ކޮވިޑް-19ގެ މިހާލަތާ ގުޅޭ ގޮތުން މީގެ ކުރިން މިނިސްޓަރު އިމްރާން ވިދާޅުވީ ކޮވިޑް-19 އާ ގުޅިގެން މުޅި ގައުމު ކުއްލި ހާލަތަކަށް އައިސްފައިވާ މިދަނޑިވަޅު ދައުލަތާއި ރަައްޔިތުންގެ މުދަލަށް ގެއްލުންދީ މުޖުތަމައުގައި ބިރުވެރިކަން އުފެއްދުމުގެ ފުރުސަތު ނުދޭނެ ކަމަށެވެ. އަދި މިވަގުތަކީ އެކަކު އަނެކަކަށް އަޅާލާ އިންސާނިއްޔަތުކަމުގެ ސިފަތައް އެންމެ ބޮޑަށް ދައްކަންވީ ވަގުތުކަމަށް ވެސް މިނިސްޓަރު ވިދާޅުވިއެވެ.
މިފަދަ ދަަނޑިވަޅެއްގައި ދައުލަތާއި ރައްޔިތުންގެ މުދަލަށް ގެއްލުން ދިނުމަކީ ނުބައިކަން ބޮޑު އަމަލެއް ކަމަށާއި އެފަދަ އެއްވެސް ފުރުސަތެއް ނުދެއްވާނެ ކަމަށް މިނިސްޓަރު އިމްރާން ވިދާޅުވިއެވެ.