ކޮވިޑް-19އާ ގުޅިގެން ރަށްރަށުގެ ކައުންސިލްތަކުން އަޅާ ފިޔަވަޅުތައް ވަރުގަދަ ކޮށްފި
19 އެޕްރީލު 2020 | އާދީއްތަ 05:16ރަށަށް އަރާމީހުންގެ ޓެމްޕަރޭޗަރ ބަލަމުން ގެންދޭ
ރ.އަލިފުށީގެ ކައުންސިލުން، އެތަންތަނަށް މީހުން ޒިޔާރަތް ކުރާމިންވަރު މަދުވާނެ ގޮތަކަށް ދަނީ މަސައްކަތްތައް ކުރަމުން
ކޮވިޑް-19އާ ގުޅިގެން އަތޮޅުތެރޭ ރަށްރަށުގެ ކައުންސިލްތަކުން އަޅާ ފިޔަވަޅުތައް ވަރުގަދަކޮށްފިއެވެ.
އައްޑޫ، ފުވައްމުލަކުސިޓީ އަދި ކުޅުދުއްފުށިގައި އާންމު ރައްޔިތުންގެ ސަލާމަތާ ރައްކާތެރިކަމަށް ވަނީ ގިނަ ފިޔަވަޅުތަކެއް އަޅާފައެވެ. އެތައް ރަށެއްގައި ހޮޓާ/ކެފޭ އަދި ރެސްޓައުރެންޓުތައް ބަންދުކޮށް ޑެލިވަރީގެ ޚިދުމަތްތައް ވެސް ފަށާފައިވެއެވެ.
އާންމުން އެއްވެ އުޅޭތަންތަނަށް ނުދިއުމަށް އިލްތިމާސްކޮށް، ޕާކުތަކާއި، ފިނި މައިޒާންތައް ވަނީ ބަންދުކޮށްފައެވެ. ބައެއް ރަށްރަށުގައި އާއްމު ސަރަހައްދު ތަކުގައި ބަހައްޓާފައި ހުރި ޖޯލިފަތި ތައް ވަނީ ނަގާފައެވެ.
ޕިކްނިކް ދިއުމާއި، މަސްދަތުރުތައް ދިއުން އަދި މާހެފުންތައް ބޭއްވުން މަނާކޮށްފައިވެއެވެ. މިފާއިތުވެދިޔަ 14 ދުވަހުގެ މުއްދަތުގައި މާލެއަށް ދަތުރުކުރުމަށްފަހު ރަށަށް ގޮސްފައިވާ މީހެއް ނަމަ އެއްވެސް ގޮތަކަށް ބޭރަށް ނުނިކުމެ ގޭގައި މަޑުކުރުމަށް އަންގާފައިވެއެވެ. އަދި ކޮވިޑް-19ގެ އަލާމާތެއް ފެނިއްޖެ ކަމަށްވާނަމަ ލަސްނުކޮށް ރިޕޯޓުކުރުމަށް އިލްތިމާސްކޮށްފައިވެއެވެ.
ގިނަ ރަށްރަށުގައި އަރާމީހުންގެ ހަށިގަނޑުގެ ފިނިހޫނު މިން ބެލުމާއި، ރަށަަށް އަރާ މީހުންގެ މައުލޫމާތު ބެލެހެއްޓުން ވަނީ ހަރުދަނާ ކޮށްފައެވެ.
ރަށްރަށުގެ ބަނދަރުތަކުގައި ޓެންޓް ޖަހާ 24 ގަޑީއިރު ރަށަށް އަރާ ފައިބާ މީހުންގެ މައުލޫމާތު ދަނީ އެއްކުރަމުންނެވެ.
ކޮވިޑް-19 ކޮންޓްރޯލް ކުރުމުގެ ގޮތުން ރަށްރަށުގައި އައިސޮލޭޝަން ސެންޓަރު ތައް ވެސް މިހާރު ވަނީ ގާއިމް ކޮށްފައެވެ.
ކޮންމެ ރަށެއްގައި ވެސް ކޮވިޑް-19އަށް ޚާއްސަކޮށް މަސައްކަތްކުރާނެ ޓާސްކްފޯހެއް ވަނީ އެކުލަވާލާފައެވެ.
