ސީޒަން ނިންމާނެ ގޮތަކާ މެދު ކްލަބުތަކުން މަޝްވަރާކުރުމަށް ފާޑެއް ނުކިޔޭނެ: އިއަން ރައިޓް

އިނގިރޭސި ޕްރިމިއާ ލީގު ނިންމާނެ ގޮތަކާ މެދު ކްލަބުތަކުން މަޝްވަރާކުރުމުން، އެކަމަށް ފާޑު ނުކިޔޭނެ ކަމަށް ކުރީގެ މަޝްހޫރު ފުޓްބޯޅަ ކުޅުންތެރިޔާ އިއަން ރައިޓް ބުނެފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ޕްރިމިއާ ލީގާއި އިނގިރޭސި އެހެން ފުޓްބޯޅަ މުބާރާތްތައް ވަނީ މުއްދަތެއް ނެތްގޮތަށް ފަސްކޮށްފަ އެވެ.

ޕްރިމިއާ ލީގުގައި ނުކުޅެ އޮތް 92 މެޗު ފުރިހަމަކުރަން ކުރެވޭނެ ކަންތައްތަކާ ބެހޭގޮތުން ހުކުރު ދުވަހު އިނގިރޭސި އެފްއޭ އާއި ޕްރިމިއާ ލީގުގެ ބޯޑުން ކްލަބުތަކާއެކު ވަނީ ވީޑިއޯ ކޮންފަރެންސް މެދުވެރިކޮށް ބައްދަލުވުމެއް ބާއްވާފައެވެ. މި ބައްދަލުވުމުގައި ގިނަ ކްލަބުތަކުން ވަނީ 40 ދުވަސް ތެރޭ މެޗުތައް ނިންމާލުމަށް ތާއީދުކޮށްފަ އެވެ.

ޕްރިމިއާ ލީގު އަލުން އަލުން ފަށަން ކްލަބުތަކާއެކު މަޝްވަރާ ކުރުމުން ގިނަ ބަޔަކު ވަނީ އެކަމަށް ފާޑު ކިޔާފަ އެވެ.

ބީބީސީއަށް ދިން އިންޓަވިއުއެއްގައި އިންގްލެންޑުގެ ކުރީގެ ފޯވާޑް އިއަން ރައިޓް ބުނީ އިނގިރޭސި އެފްއޭއިން ކްލަބުތަކާއެކު މަޝްވަރާ ކުރުމުން އެކަމަށް ފާޑެއް ނުކިޔޭނެ ކަމަށާއި، މިހާރު މިއޮތް ހާލަތު ރަނގަޅު ނުވަނީސް ލީގުގެ ކުޅުން ނުފަށާނެ ކަމަށް އެފްއޭއިން މީގެ ކުރިންވެސް ބުނެފައިވާ ކަމަށެވެ.

އަދި ޕްރިމިއާ ލީގަކީ ބޮޑު ވިޔަފާރިއަކަށްވުމުން، ލީގާއި މެދު ކަންތައް ކުރާނެ ގޮތަކާ މެދު މަޝްވަރާ ކުރަން ޖެހޭނެ ކަމަށެވެ. އަދި މި ދަނޑިވަޅުގައި ކުޅުންތެރިންގެ ފުރާނައަށް ނުރައްކާވާ އެއްވެސް ކަމެއް އިނގިރޭސި އެފްއޭއިން ކުރާނެ ކަމަށް ގަބޫލުނުކުރާ ކަމަށާއި، ސަރުކާރުން އަންގާ އެންގުންތަކަށް އިނގިރޭސި އެފްއޭ އިން ފުރިހަމައަށް ބޯލަނބާނެ ކަމަށްވެސް އިއަން ރައިޓް ވަނީ ބުނެފަ އެވެ.

ރިޕޯޓުތައް ބުނާ ގޮތުން ޕްރިމިއާ ލީގުން މިހާރު އަންނަނީ ސަޕޯޓަރުން ނުވައްދައި ބާކީ ހުރި މެޗުތައް ފުރިހަމަ ކުރުމަށްވެސް މަޝްވަރާ ކުރަމުންނެވެ. އަދި މި ހާލަތުގައި ލީގުގެ ހުރިހާ މެޗެއް އިނގިރޭސި ރަސްމީ ސްޓޭޑިއަމް ވެމްބްލީގައި ކުޅެން އިނގިރޭސި އެފްއޭ އިން މަޝްވަރާ ކުރަމުން އަންނަ ކަމަށްވެސް ރިޕޯޓުތައް ބުނެ އެވެ.

ޖޫން މަހުގެ ހަވަނަ ދުވަހު އަލުން ފުޓްބޯޅަ ސީޒަން ފަށަން އިނގިރޭސި އެފްއޭ އިން މަސައްކަތް ކުރަމުން އަންނަ ކަމަށްވެސް ރިޕޯޓުތައް ބުނެއެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، މިހާތަނަށް އިނގިރޭސިވިލާތުން 114،000 އަށްވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފައެވެ. އަދި މި ވައިރަސް ޖެހިގެން އެ ގައުމުން މިހާތަނަށް 15،400 އަށްވުރެ ގިނަ މީހުން ވަނީ މަރުވެފައެވެ.