ކޮވިޑް-19 ޖެހިގެން މަރުވެއްޖެނަމަ މޫނު ބަލަން ދެވޭނެ، ހުންނަންޖެހޭނީ 3 ފޫޓު ދުރުގައި
18 އެޕްރީލު 2020 | ހޮނިހިރު 20:16މިއީ ވައިގެ ތެރޭގައި ހުންނަ ބައްޔެއް ނޫންކަން މަބްރޫކު ފާހަގަކުރެއްވި
ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް
ރާއްޖޭގައި ކޮވިޑް-19 ގެ ބަލިމީހަކު މަރުވެއްޖެނަމަ އެމީހެއްގެ މޫނު ބަލަން ދެވޭނެ ކަމަށާއި، ނަމަވެސް ހުންނަން ޖެހޭނީ 3 ފޫޓު ދުރުގައި ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވެއްޖެ އެވެ.
ހޮނިހިރު ދުވަހުގެރޭ ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މަބްރޫކު ވިދާޅުވީ، ކޮވިޑް-19 ގެ ބަލި މީހަކު މަރުވި ނަމަވެސް އެމީހެއްގެ މޫނު ބަލަން ދެވޭނެ ކަމަށެވެ. އެގޮތުން މި ބައްޔަކީ ވައިގެ ތެރޭގައި ހުންނަ ބައްޔެއް ނޫންކަން މަބްރޫކު ފާހަގަ ކުރެއްވި އެވެ.
މަބްރޫކު އިތުރަށް ވިދާޅުވީ، ކޮވިޑް-19 ބަލީގައި މަރުވާ މީހުންވެސް ވަޅުލާނީ އާދައިގެ މަތިން އެހެން މައްޔިތުން ވަޅުލުމަށް ކޮންނަ ވަރުގެ ވަޅެއްގައި ކަމަށެވެ. އަދި އެއީ އެހެން ޤައުމަކަށް ފޮނުވާލަންޖެހޭ ބިދޭސީއެއްނަމަ ލާން ޖެހޭނީ ވަކި ވައްތަރެއްގެ "ބޮޑީ ބޭގް" އަކަށް ކަން ފާހަގަކުރައްވައި މަބްރޫކު ވިދާޅުވީ، ބޮޑީ ބޭގްވެސް މިހާރު އެބަހުރި ކަމަށެވެ.
ކޮވިޑް-19 ގެ ބަލިމީހަކު މަރުވެއްޖެނަމަ އަމަލުކުރާނެ ގޮތަކާއިމެދު ސުވާލު އުފެދިފައިވާއިރު، ދާދި ފަހުން ލަންކާ ސަރުކާރުން މުސްލިމުންވެސް ހިމެނޭގޮތަށް ކޮރޯނާވައިރަސް ނުވަތަ ކޮވިޑް-19 ބަލީގައި މަރުވާ އެންމެންގެ ހަށިތައް އަންދަން މަޖުބޫރު ކޮށްފައިވެ އެވެ.
އެގޮތުން އާއިލާތަކުން ދެކޮޅު ހަދަމުން ދަނިކޮށް ބައެއް މުސްލިމުންގެ ހަށިތައް އަންދާލާފައިވާއިރު، ކޮވިޑް-19 ބަލީގައި މަރުވާ މީހުން އަންދާލުމުގެ ބަދަލުގައި ވަޅުލުމަކީ މައްސަލައެއް ނޫންކަމަށް ދުނިޔޭގެ ސިއްޙަތު ޖަމިއްޔާއިން ބުނެފައިވެ އެވެ.
