ކުރިޔަށް އޮތް ދެ ދުވަހުގެ ތެރޭގައި ކޮންޓެކްޓް ޓްރޭސިންގ މަސައްކަތަށް ހާއްސަ އެޕެއް ތައާރަފްކުރުމުގެ މަސައްކަތް ކުރިއަށްދާ ކަމަށް މައުލޫމާތު ލިބިއްޖެ އެވެ.
މި މައުލޫމާތު ދެއްވީ އެންއީއޯސީގެ ތަރުޖަމާނު މަބްރޫކް އަޒީޒް އެވެ. އަދި ރާއްޖޭގައި ތައާރަފްކުރާ އެޕަކީ ސިންގަޕޫރުން ތައާރަފްކޮށްފައިވާ އެޕް އަސްލަކަށް ބަލައިގެން ތައްޔާރުކޮށްފައިވާ އެޕެކެވެ. ސިންގަޕޫރު ސަރުކާރުން ވަނީ މި އެޕްގެ ކޯޑް ދުނިޔޭގެ ކޮންމެ ތަނެއްގައި ހުރި ޑިވެލޮޕަރަކަށް ވެސް ބޭނުން ކުރެވޭނެހެން އޯޕަން ސޯސް ކޮށްފަ އެވެ.
މި އެޕްގެ އިތުރުން ކޮވިޑް-19 އާ ބެހޭ މުހިއްމު މައުލޫމާތުތައް ހިއްސާކުރުމަށް ފަރުމާކޮށްފައިވާ ވައިބަރ އެޕެއް ލޯންޗުކުރަން ހަމަޖެހިފައިވާ ކަމަށް ވެސް މަބްރޫކް ވިދާޅުވި އެވެ. އަދި ކުރިޔަށް އޮތް ދުވަސްތަކުގެ ތެރޭގައި ވައިބަރ އެޕް ވެސް އާންމުންނަށް ބޭނުމަށް ޑައުންލޯޑް ކުރެވޭނެ އެވެ.
މީގެ އިތުރުން، ގޭބިސީތަކުގައި ދިރިއުޅޭ ފަރާތްތަކުގެ މައުލޫމާތު ހޯދުމުގެ މަސައްކަތް ކުރުމަށް ޑޭޓާ ހޯދަން ޕޯޓަލް އެއް ގާއިމްކުރުމުގެ މަސައްކަތްތައް ކުރިއަށްދާ ކަމަށް މަބްރޫކް ވިދާޅުވި އެވެ. މި ޕޯޓަލްގެ މަގުސަދަކީ ގޭބިސީތަކުގައި ދިރިއުޅޭ މީހުންގެ އަދަދާއި، އުމުރު އަދި މުހިއްމު އެހެނިހެން މައުލޫމާތު އެއްކުރުމެވެ.
މި ޕޯޓަލް ގާއިމްކުރަން ނިންމާފައިވާ ސަބަބު ސާފުކޮށްދެއްވަމުން، މަބްރޫކް ވިދާޅުވީ މި ވަގުތު ބޭނުން ކުރަމުން ދަނީ ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) ގެ ޑޭޓާބޭސް ގައި ހުރި މައުލޫމާތު ކަމަށާއި، މި މައުލޫމާތަކީ ދާއިމީ އެޑްރެސް ފަދަ މައުލޫމާތު ތަކެއް ކަމަށެވެ. އެހެންކަމުން، މިހާރު ދިރިއުޅޭ ގެއާއި ގޭބިސީތަކުގައި އުޅޭ މީހުންގެ އަދަދުތައް ހޯދަން ވަރަށް ދަތި ކަމަށް ވިދާޅުވި އެވެ.
ދުނިޔޭގެ އެކި ގައުމުތަކުން ވަނީ ކޮންޓެކްޓް ޓްރޭސިންގ މަސައްކަތަށް އެޕް ތައްޔާރުކޮށް އެ އެޕްތައް ބޭނުންކުރަން ފަށާފަ އެވެ. މިއީ މިހާރު މެނުއަލީ ކުރާ މަސައްކަތެއްގައި އިތުރު ލުއި ފަސޭހަތަކެއް ލިބި، އަދި މީހުން ފޯރުކޮށްދޭ މައުލޫމާތައް އިތުރު ބާރެއް ލިބިގެންދާނެ ކަމެކެވެ.
