ނޭޝަނަލް އެމްބިއުލާންސް ހިދުމަތް އަންނަ މަހުގައި ތައާރަފްކުރަނީ
ކޯލް ސެންޓަރ ގާއިމުކުރުމަށް ކުރަން ޖެހޭ ގިނަ މަސަތްކަތް ވަނީ ނިމިފައި
ހެލްތު މިނިސްޓަރު އަބްދުﷲ އަމީން ވާހަކަ ދައްކަވަނީ
ނޭޝަނަލް އެމްބިއުލާން ހިދުމަތް ތައާރަފްކުރަން ކުރަންޖެހޭ މަސައްކަތްތައް ވަރަށް ހަލުވިކަމާ އެކު ކުރިއަށްދާ ކަމަށާއި މަހެއްހާ ދުވަހުގެ ތެރޭގައި އެ ހިދުމަތް ފެށިގެންދާނެ ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެއެވެ.
ރާއްޖޭގެ ސިއްހީ ދާއިރާއަށް ބޭނުންވާ އިންސާނީ ވަސީލަތް ތަރައްގީކުރުމަށް ފަހުމުނާމާގައި މިނިސްޓްރީ އޮފް ހެލްތާއި އޮސްޓްރޭލިއާގެ ގްރިފިތް ޔުނިވާސިޓީއާ ދެމެދު ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ އަމީން ވިދާޅުވީ ކުއްލި ފަރުވާ ދިނުން ހަރުދަނާ ކުރުމަށް ވަރަށް ގިނަ މަސަތްކަތްތައް މިނިސްޓްރީން ކުރަމުން އަންނަ ކަމަށާއި އެގޮތުން އެމްބިއުލާންސް ހޯދުމާއި މީހުން ހޯދުމާއި ކޯލް ސެންޓަރ ގާއިމުކުރުމަށް ކުރަން ޖެހޭ ގިނަ މަސަތްކަތްތައް މިހާރު ނިމިފައިވާ ކަމަށެވެ.
މިނިސްޓަރ އިތުރަށް ވިދާޅުވީ ދިވެހި ރާއްޖޭގައި އެކަށީގެންވާ މިންވަރަށް އެމްބިއުލާންސްގެ ހިދުމަތް ފުޅާކުރުމަށާއި، އެމެރޖެންސީ ފަރުވާ ތަރައްގީކުރުމަށް ސަރުކާރުން ކުރަމުން އަންނަ މަސައްކަތަށް މި އެމްއޯޔޫގެ ދަށުން އެހީތެރިކަން ލިބިގެން ދާނެ ކަމަށެވެ . އެގޮތުން ޑޮކްޓަރުންނާއި ނަރުހުންގެ އިތުރުން ހެލްތު ވޯކަރުނާއި އެހެނިހެން ސިއްހީ ހިދުމަތްތެރިން ދާއިރާއިން ތަމްރީންކުރުމާއި އާންމުން ހޭލުންތެރިކުރުމަށް ހިންގާ ޕްރޮގްރާމްތަކުގައި އެހީތެރިކަން ލިބިގެންދާނެ ކަމަށެވެ.
ގްރިފިތް ޔުނިވާސިޓީން ރާއްޖޭގައި ގިނަ ޕްރޮގްރާމްތަކެއް ހިންގަން ރާވައިފައިވާއިރު މީގެ ކުރިން ވެސް ވަނީ ލ. އަތޮޅުގައި ޕެރަމެޑިކް ސްކިލް ޑިވެލޮޕްމަންޓް ޕްރޮގްރާމެއް ހިންގައި ރާއްޖޭގެ ސިއްހި ހިދުމަތް ދޭ މަރުކަޒުތަކުން 25 މީހުން ތަމްރީންކޮށްފައެވެ.
