މަގުމައްޗަށް ނުކުތް 92 މީހަކު ފުލުހުންގެ ބެލުމުގެ ދަށަށް، އެކަކު ޖޫރިމަނާ ކުރެވުނު
ކަރަންޓީނު ކުރާނެ ކަމުގެ އިންޒާރު ވަނީ ދީފައި
ފުލުހެއް މަގުމަތި މޮނީޓަރ ކުރަނީ
މާލެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ލޮކްޑައުން ކުރެވިފައިވާއިރު، މިހާތަނަށް ގަވާއިދާ ޚިލާފަށް މަގުމަމައްޗަށް ނުކުތް 92 މީހަކު ފުލުހުންގެ ބެލުމުގެ ދަށަށް ގެނެސްފިއެވެ.
ހޮނިހިރު ދުވަހު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގެ ތަރުޖަމާން މަބްރޫކް އަޒީޒް ވިދާޅުވީ މިހާތަނަށް ގަވާއިދާ ޚިލާފަށް މަގުމަމައްޗަށް ނުކުތް 92 މީހަކު ފުލުހުންގެ ބެލުމުގެ ދަށަށް ގެނެސްފައިވާކަމަށާއި އެކަކު ޖޫރިމަނާވެސް ކޮށްފައިވާކަމަށެވެ.
ހުކުރު ދުވަހުގެރޭ 20:30 ފެށިގެން މާލޭގެ މަގުމަތީގައި އުޅޭ ފަރާތްތަކާއި މެދު ފިޔަވަޅުއަޅަން ފުލުހުން ވަނީ ފަށާފައެވެ.
ފުލުހުންގެ ފިޔަވަޅުތައް ހަރުކަށި ކޮށްފައިވާއިރު، ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ، އެޗްޕީއޭގެ އެންގުމާ ހިލާފުވާ ފަރާތްތަކާއި މެދު 1000 ރުފިޔާއިން ޖޫރިމަނާ ކުރެވޭނެ ކަމަށެވެ. ހަފްތާއެއްގެ މުއްދަތަށް މާލެ ލޮކްޑައުން ކޮށްފައިވާއިރު، މީގެ ކުރިން ފުލުހުން ބުނެފައިވާ ގޮތުން ލޮކްޑައުންއާ ހިލާފުވާ ފަރާތްތައް 14 ދުވަހުގެ މުއްދަތަށް ކަރަންޓީނު ކުރެވޭނެ ކަމަށެވެ.
