ސިފައިންގެއިންގެ ޚިދުމަތުގައި ކުރިން އުޅުނު ފަރާތްތަކަށް ޚިދުމަތައް އައުމަށް ގޮވާލައިފި

ކޮވިޑް-19 އާ ގުޅިގެން ސިފައިން މިހާރު ހިންގާ އޮޕަރޭޝަންގައި ސިފައިންގެއިން ވަކިވެފައިވާ ފަރާތްތަކަށް ބައިވެރިވުމުގެ ފުރުސަތު ހުޅުވާލައިފި އެވެ.

އެކަމާ ގުޅިގެން އެމްއެންޑީއެފުން ބުނީ ކޮވިޑް-19 އޮޕަރޭޝަނަށް ވޮލަންޓިއާ ކުރަން ބޭނުންވާ ފަރާތްތަކުން ނަން ނޯޓު ކުރުމަށް ނުވަތަ ނަމާއި ނަންބަރު އީމެއިލްކުރުމަށް ފުރުސަތު ހުޅުވާލާފައިވާ ކަމަށެވެ.

ކޮވިޑް-19 މާލެތެރެއަށް ފެތުރެމުންދިޔުމާއި ގުޅިގެން ރައްޔިތުންނަށް އެހީތެރިވުމުގެ ގޮތުން އެމްއެންޑީއެފް އިން އަންނަނީ ބޮޑު އޮަރޭޝަނެއް ކުރިއަށް ގެންދަމުންނެވެ.

އެމްއެންޑީއެފް އިން ބުނެފައިވަނީ ދިމާވެދާނެ ކޮންމެ ހާލަތަކަށް ވެސް ސަލާމަތީ ބާރުތަކުން ތައްޔާރަށް އޮތް ކަމަށެވެ.

ކޮވިޑް19 އާ ގުޅިގެން އެމްއެންޑީއެފްގެ އެލާޓް ލެވަލް ވަނީ ބްލޫ އަށް ޖައްސާފަ އެވެ. އަދި ހުރިހާ ސިފައިން އޮޕަރޭޝަންގައި މަސައްކަތް ކުރަމުންދާއިރު ހުރިހާ ސިފައިން ވެސް މިހާލަތުގައި ތިބޭނީ ހެޑްކުއާޓަރުތަކުގައި ކަމަށް އެމްއެންޑީއެފުން ވަނީ ބުނެފައެވެ.

ކޮވިޑް-19 ފެތުރުން ކޮންޓްރޯލް ކުރުމަށް މާލެ ސިޓީ ވަނީ އޭޕްރީލްމަހުގެ 15 ވަނަ ދުވަހުން ފެށިގެން ލޮކްޑައުންކޮށްފަ އެވެ. އަދި ކުރިޔަށް އޮތް ދެހަފްތާވެސް މާލެ އޮންނާނީ ލޮކްޑައުންކޮށްފަ އެެވެ. މިހާތަނަށް މާލެއިން 14 މީހަކު ވަނީ ބައްޔަށް ޕޮޒިޓިވް ވެފަ އެވެ. އަދި މުޅި ޖުމްލަ ރާއްޖެއިން 34 މީހަކަށް ވަނީ ވައިރަސް ޖެހިފަ އެވެ.