ހުޅުމާލޭގައި ޑެލިވަރީ ކުރުމުގައި ދަތިތަކެއް އުޅޭތީ، ޑެލިވަރީ ކުރާނެ ބަޔަކު ހޯދަނީ!
ޑެލިވަރީ ކުރުމުގެ މަސައްކަތް މިއަދު ފެށޭވަރުވާނެ
ހުޅުމާލެ
ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކޮށްފައިވާތީ، ގޭގެއަށް ބޭނުންވާ ތަކެތި ފިހާރަތަކުން ޑެލިވަރީ ކޮށްދޭނެ ބަޔަކު ހޯދުމުގެ މަސައްކަތް ކުރަމުންދާ ކަމަށް ހައުސިންގ ޑޮވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފި އެވެ.
ރާއްޖެޓީވީގެ "ކޮވިޑް-19 ކަވަރޭޖް"ގައި ފޯނުން މައުލޫމާތު ދެއްވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ، މާލެ ސަރަހައްދު ލޮކްޑައުން ކޮށްފައިވާ މިދަނޑިވަޅުގައި ގޭގެއަށް ބޭނުންވާ ތަކެތި ޑެލިވަރީ ކުރުމުގައި ދަތިތަކެއް އެބަހުރި ކަމަށެވެ.
ސުހެއިލް ވިދާޅުވީ، ހުޅުމާލެ ގޭތަކުން އޯޑަރު ދޭ ތަކެތި ގޭގެއަށް ޑެލިވަރީ ކުރުމުގައި ފިހާރަކަށް ދަތިތަކެއް ކުރިމަތި ވެފައިވާތީ، ޑެލިވަރީ ކުރާނެ ބަޔަކު ހޯދުމުގެ މަސައްކަތް ހޮނިހިރު ދުވަހު ފަށާނެ ކަމަށެވެ. އަދި ހޮނިހިރު ދުވަހުން ފެށިގެން އެކަން ހަމަޖެހޭނެ ކަަމަށް ވެސް ޝުހެއިލް ވިދާޅުވި އެވެ.
ސުހެއިލް ވިދާޅުވީ، ގްރޭޓަރ މާލޭ ސަރަހައްދުގެ އިސްފަރާތެއްގެގޮތުގައި މިހުންނެވީ މާލެ ސިޓީގެ މޭޔަރ ކަމަށާއި އެހެންކަމުން މާލެ ސިޓީއާއެކު މަސައްކަތް ކުރަމުންދާ ކަމަށެވެ. އެގޮތުން ހުޅުމާލެ މެނޭޖް ކުރުމުގެ ގޮތުން ހުޅުމާލެ ފޭސް 1 އަދި 2 އާއެކު، 6 ސަރަހައްދަކަށް ބަހާލައިގެން މަސައްކަތް ކުރިއަށް ގެންދާކަމަށެވެ.
ސުހެއިލް ވިދާޅުވީ، ހުޅުމާލެ 6 ސަރަހައްދުގައި ހިދްމަތް ދޭނެ 6 ސެންޓަރު ހުންނާނެ ކަމަށާއި، މިސެންޓަރުތަކުގެ މައިގަނޑު ބޭނުމަކީ، ކަރަންޓީނު ނުވަތަ މޮނީޓަރިން ހާލަތަށް ގެނެވޭ އެޕާޓްމަންޓްތަކަށް ލިބެންޖޭހެ ހިދްމަތްތައް ލިބޭނެކަން ޔަގީންކުރުން ކަމަށެވެ.
އެގޮތުން، ކާބޯތަކެއްޗާއި ކުނިއުކާލުން ފަދަ ހިދްމަތްތައް ދިނުމާއި، ކަރަންޓީން ކުރެވޭ ގެއަކުން ފިހާރައަކަށް އޯޑަރ ކުރެވޭ ތަކެތި އެގެއަށް ފޯރުކޮށް ދިނުންފަދަ ހިދްމަތްތައް ވެސް އެ ސެންޓަރުތަކުން ދެމުންދާނެ ކަމަށް ސުހެއިލް ވިދާޅުވި އެވެ.
