އޭޑީކޭ އިން ބޭސް ޑެލިވަރ ކޮށްދިނުމުގެ ޚިދުމަތް ފަށައިފި
17 އެޕްރީލު 2020 | ހުކުރު 12:24ބޭސް ޑެލިވަރ ކުރަން ބޭނުންވާ ފަރާތްތަކުން 7258555 ބޭސް ސިޓީ ފޮނުވުމަށް ވަނީ އެދިފައި
އޭޑީކޭ ހޮސްޕިޓަލް
އޭޑީކޭ ހޮސްޕިޓަލުން ބަލިމީހުންނަށް ބޭނުންވާ ބޭސް ޑެލިވަރ ކުރުމުގެ ޚިދުމަތް ފަށައިފި އެވެ.
ރާއްޖެއެމްވީ އަށް މައުލޫމާތު ދެއްވަމުން އޭޑީކޭ ގެ މެނޭޖިން ޑިރެކްޓަރ އަހުމަދު އައްފާލް ވިދާޅުވީ އޭޑީކޭ ގެ ފާމަސޫޓިކަލް ބްރާންޗު މެދުވެރިކޮށް ބޭސް ޑެލިވަރީ ކޮށްދިނުމުގެ ޚިދުމަތް ބުރާސްފަތި ދުވަހު ފަށާފައިވާ ކަމަށެވެ.
ބޭސް ޑެލިވަރ ކުރަން ބޭނުންވާ ފަރާތްތަކުން 7258555 މި ނަމްބަރަށް ބޭސް ސިޓީ ވައިބަރ އަދި ވަޓްސްއަޕް ކުރެއްވުމުން ބޭސް ލިބެން ހުރި މިންވަރަކުން ޑެލިވަރ ކޮށްދެމުންދާނެ ކަމަށް އައްފާލް ވިދާޅުވި އެވެ.
މާލޭގައި ދިރިއުޅެމުންދާ މީހެއް ކޮވިޑް-19 އަށް ޕޮޒިޓިވް ވުމާއި ގުޅިގެން އޭޑީކޭ އިން ގޭގެއަށް ޒިޔާރަތްކޮށްގެން ދެމުން ގެންދިޔަ ޚިދުމަތްތައް ވަނީ މެދުކަނޑާލާފަ އެވެ. އެހެން ނަމަވެސް އޮންލައިން ކޮންސަލްޓޭޝަންގެ ޚިދުމަތް ކުރިއެކޭ އެއްގޮތަށް ލިބެމުންދާނެކަމަށް އޭޑީކޭއިން ބުނެ އެވެ.
މާލެ ލޮކްޑައުންކޮށްފައި އޮންނަ ވަގުތުތަކުގައި ސްޕެޝަލިސްޓް އަދި ސުޕަރ ސްޕެޝަލިސްޓުންގެ ޚިދުމަތްތައް އޮންލައިންކޮށް ލިބެމުންދާނެކަމަށާއި 1440 އަށް ގުޅައިގެން އެޕޮއިޓްމަންޓް ހެއްދުމަށް އޭޑީކޭއިން ވަނީ އެދިފަ އެވެ.
