މާލެސިޓީ ލޮކްޑައުން ކުރުމާ ގުޅިގެން، ޕޯޓްސްގެ މަސައްކަތްތައް މެދުކަނޑާލި ނަމަވެސް ހޮނިހިރު ދުވަހު ޒަރޫރީ މުދާތައް ނެރުމުގެ މަސައްކަތް ފަށާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.

ރާއްޖެޓީވީގެ ކޮވިޑް-19ގެ ޚާއްސަ ކަވަރޭޖަށް ދެއްވި ޚާއްސަ އިންޓަވިއުއެއްގައި އެމްޕީއެލްގެ މެނޭޖިން ޑިރެކްޓަރު ޝާހިދު އަލީ ވިދާޅުވީ މުދާތައް ކްލިއަރ ކުރުމުގެ އިންޒާމް ހަމަޖެއްސުމާ ގުޅޭ ގޮތުން ސަރުކާރުގެ ކަމާބެހޭ އިދާރާތަކާއެކު މަޝްވަރާ ކުރަމުންދާ ކަމަށެވެ. އެގޮތުން ހޮނިހިރު ދުވަހު މުދާ ނެރުމުގެ މަސައްކަތްތައް ފެށޭނެ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ބުރާސްފަތި އަދި ހުކުރު ދުވަހުގެ މަސައްކަތްތައް ކުރިއަށް ނުގެންދެވުނު ނަމަވެސް ބުރާސްފަތި ދުވަހު ބާލާފައިހުރި މުދާތަކުގެ ތެރެއިން ހަލާކުވާ ޒާތުގެ (ޕެރިޝަބަލް) މުދާތައް ބުރާސްފަތި ދުވަހުގެ މެންދުރުފަހުގެ ވަގުތެއްގައި ކްލިއަރ ކުރެވިފައިވާ ކަމަށެވެ.

ޝާހިދު ވިދާޅުވީ މިހާރު ބަނދަރުކޮށްފައިވާ މުދާތަކާއި، ކުރިއަށް ރާއްޖެއަށް އަންނަން ހުރި މުދާތަކަކީ މުހިންމު ޝިޕްމެންޓްތަކެއް ކަމަށެވެ.

މީގެ ތެރޭގައި މެޑިކަލް ސަޕްލައި ހިމެނޭ ކަމަށާއި، ސާފުތާހިރު ކަމަށް ބޭނުންވާ ސާމާނު އަދި ކާބޯތަކެތި ހިމެނޭކަން ޝާހިދު ފާހަގަކުރެއްވިއެވެ. އަދި ވިދާޅުވީ ވިޔަފާރިވެރިން ރަމަޟާންމަހަށް ޚާއްޞަކޮށް އޯޑަރުކުރި ގޭގައި ހިފާ ގެންގުޅޭ ސާމާނު ވެސް ހިމެނޭ ކަމަށެވެ.

ޝާހިދު ވިދާޅުވީ ޚާއްސަ ހާލަތުގައި ވެސް މަސައްކަތް ކުރާނެ ޕްލޭން އެމްޕީއެލުން އެކުލަވާލާފައިވާ ކަމަށާއި، އެޗްޕީއޭގެ އިރުޝާދުތަކުގެ ދަށުން އޮޕަރޭޝަންތައް ބުރޫއެރުމެއް ނެތި މަސައްކަތްތައް ކުރިއަށް ގެންދެވޭނެކަމުގެ އުންމީދު އެބައޮތް ކަަމަށެވެ.

އޮޕަރޭޝަންގެ ވަގުތު އިތުރަންޖެހޭ ހާލަތުގައި އެމަސައްކަތް ކުރާނެކަން ފާހަގަކުރައްވައި ޝާހިދު ވިދާޅުވީ ވަގުތު އިތުރުކުރަންޖެހޭނަމަ ރޭގަނޑު ވެސް މަސައްކަތްތައް ކުރަން ނިންމާފައިވާ ކަމަށެވެ. ނަމަވެސް އަދި ނިންމާފައި އޮތީ ދުވާލުގެ ގިނަ ވަގުތު ހޭދަކޮށް ގިނަ ޢަދަދެއްގެ މުދާ ނެރެވޭނެ ގޮތަށް ކަމަށް ޝާހިދު ވިދާޅުވިއެވެ.