ޒަރޫރީ ބޭނުމެއްގައި މެނުވީ އެއް ރަށުން އަނެއް ރަށަށް ދަތުރުކުރުން ހުއްޓައިލުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގައިފި އެވެ.

ހުކުރު ދުވަހު އެޗްޕީއޭ އިން އާންމުކުރި ބަޔާނުގައި ވަނީ ވަރަށް ހަރުކަށި ފިޔަވަޅުތަކެއް އެޅުމަށް ނިންމާފަ އެވެ. އެޗްޕީއޭއިން ނިންމާފައިވާ ނިންމުންތައް ތަންފީޒުކުރަން ހަމަޖެހިފައިވަނީ ހުކުރު ދުވަހުގެ ހަވީރު 18:00 ފެށިގެންނެވެ. މިހާރު އިއުލާންކޮށްފައިވާ ފިޔަވަޅުތަކުން އިސްތިސްނާވެފައިވަނީ، މިހާރު ވެސް ލޮކްޑައުން ކޮށްފައިވާ މާލޭ ސަރަހައްދު އެކަންޏެވެ.

އެޗްޕީއޭގެ ޑިިރެކްޓަރ ޖެނެރަލް މައިމޫނާ އަބޫބަކުރު ސޮއިކުރައްވާ ނެރުއްވާފައިވާ އެންގުމުގައި ވަނީ، ހުރިހާ ފަރާތްތަކަށް މި އެންގުމުގެ މައްޗަށް އަމަލުކުރަން އަންގާފަ އެވެ. އަދި މި ފިޔަވަޅުތައް ތަންފީޒުކޮށް އެއަށް ފުރިހަމަ އަށް އަމަލުކުރުމަށް އެންމެހައި އިދާރާތަކަށް ވަނީ އަންގާފަ އެވެ.

އެޗްޕީއޭއިން އަޅަން ނިންމި ފިޔަވަޅުތަކާއި އެކު ގާތް ގަނޑަކަށް މުޅި ރާއްޖެވަނީ ''ލޮކް ޑައުން'' ކޮށްފައި އެވެ. މިހާރު އަޅަމުންގެންދާ ފިޔަވަޅުތަކަކީ، މާލެ އިން ކޮވިޑް-19 އަށް ޕޮޒިޓިވްވެފައިވާ ތިން ފަރާތެއް ފެނުމާއެކު އަޅަމުންގެންދާ ފިޔަވަޅުތަކެކެވެ. މި ފަރާތްތަކުގެ ކޮންޓެކްޓް ޓްރޭސިންގ ގެ ތެރޭގައި ރާއްޖޭގެ އެކި ސަރަހައްދުތަކުން ވަނީ މީހުން އައިސޮލޭޓް ކުރެވިފަ އެވެ.