ވޭތުވެދިޔަ 14 ދުވަހުގެ ތެރޭގައި ރާއްޖޭގެ އެކި ކަންކޮޅުތަކުން ކުޅުދުއްފުށިސިޓީއަށް އައިސްފައިވާ މީހުން އެމީހުން އެސިޓީއަށް އައި ދުވަހުން ފެށިގެން މަދުވެގެން 14 ދުވަހުގެ މުއްދަތަށް ގޭގައި މަޑުކުރެއްވުމަށް އިލްތިމާސްކޮށްފިއެވެ.

ކުޅުދުއްފުށީ ކައުންސިލުން ބުނީ ކޮވިޑް-19 ރޯގާއާއި ގުޅިގެން ކުޅުދުއްފުށީގައި ރައްކާތެރިކަމުގެގޮތުން އަޅަންޖެހޭ ފިޔަވަޅުތައް ވިލަރެސްކުރުމަށް އެކުލަވާލާފައިވާ ޓާސްކު ފޯސްގެ ފަރާތުން ކަމާއިގުޅުންހުރި އިދާރާތަކުގެ އިރުޝާދާއެކު ރައްޔިތުންގެ ރައްކާތެރިކަމަށް މަސައްކަތް ކުރަމުންދާ ކަމަށެވެ.

ކައުންސިލުން ބުނީ ރާއްޖޭގެ ވެރިރަށް މާލެއިން ކޮވިޑް-19 ރޯގާއަށް ޕޮޒިޓިވްވެފައިވާ މިހާކު ފެނުމާއި ގުޅިގެން ރާއްޖޭގެ ހާލަތު އިތުރަށް ވަނީ ނާޒުކު ވެފައިވާއިރު، ވޭތުވެދިޔަ 14 ދުވަހުގެ ތެރޭގައި ރާއްޖޭގެ އެކި ކަންކޮޅުތަކުން ކުޅުދުއްފުށްޓަށް އައިސްފައިވާ ފަރާތްތަކުން އެ ފަރާތްތައް ރަށަށް އައި ދުވަހުން ފެށިގެން މަދުވެގެން 14 ދުވަހުގެ މުއްދަތަށް ގޭގައި މަޑުކުރުމަށް އިލްތިމާސްކުރާ ކަމަށެވެ. އަދި ގޭގައި މަޑުކުރާ މުއްދަތުގައި ގޭގައި އުޅޭމީހުންނާއި ގައިދުރުކޮށް އުޅުމަށްވެސް ވަނީ ނަސޭހަތްތެރިވެފައެވެ.

ކައުންސިލުން ބުނީ އެއްވެސް މީހެއްގެ ފަރާތުން ކޮވިޑް-19 އަށް ޝައްކުކުރެވޭ އަލާމަތެއް ފެނިއްޖެނަމަ ކުޅުދުއްފުށި ރީޖަނަލް ހޮސްޕިޓަލްގެ ކޮވިޑް-19 ހޮޓްލައިން 7606688 ނަންބަރަށް ގުޅައި، އިރުޝާދުގެ ދަށުން އަމަލުކުރުމަށް އެދޭ ކަމަށެވެ.

ކޮވިޑް-19 ގެ ނުރައްކާ ރާއްޖޭގައި އިތުރުވެފައި މިވާ ދަނޑިވަޅުގައި ކުޅުދުއްފުށީގައި ދިރިއުޅޭ އެންމެހާ ފަރާތްތަކުން ގޭގައި މަޑުކުރުމަށާއި، ތަންތަނަށް އެއްވެ ނޫޅުމަށާއި، ކޮންމެހެން ޒަރޫރީ ބޭނުމެއް ޖެހިގެން ނޫން ގޮތަކަށް ގެއިން ބޭރަށް ނިކުމެ ނޫޅުމަށް އިލްތިމާސްކޮށްފައިވެއެވެ. ބަލި ފެތުރުން ކޮންޓްރޯލް ކުރުމަށް ހުރިހާ ރައްޔިތުން ފަރުދީ ޒިންމާ އަދާ ކުރައްވައި ސިއްހީ މާހިރުންގެ ލަފައާއި އެއްގޮތަށް އަމަލު ކުރުމަށް ވަނީ ނަސޭހަތްތެރިވެފައެވެ.