އިރުޝާދުތަކާ އެއްގޮތަށް އަމަލުނުކުރާނަމަ، ވައިރަސް ފެތުރިގެން ހިނގާދާނެކަމުގެ އިންޒާރުދީފި
16 އެޕްރީލު 2020 | ބުރާސްފަތި 15:36ވައިރަސް ކޮންޓްރޯލް ކުރުމަށް ގިނަ މަސައްކަތްތަކެއް ކުރެވޭ
މިއަދު ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވާހަކަދައްކަވަނީ
ކޮވިޑް-19އާ ގުޅިގެން ކަމާބެހޭ އިދާރާތަކުންދޭ އިލްތިމާސްތަކާ އެއްގޮތަށް ބޯނުލަބާކަމަށްވާ ނަމަ، ހީނުކުރާ މިންވަރަށް މިވައިރަސް ފެތުރިގެން ހިނގާދާނެކަމުގެ އިންޒާރުދީފިއެވެ.
ބުރާސްފަތި ދުވަހު ކޮވިޑް-19ގެ އެންމެފަހުގެ މައުލޫމާތި ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗުގެ ޑރ. އިބްރާހިމް އަފްޒަލް ވިދާޅުވީ މިވައިރަސް ކޮންޓްރޯލް ކުރުމަށް ގިނަ މަސައްކަތްތަކެއް ކުރި ނަމަވެސް އާންމުންގެ ފުރިހަމަ ތަރުހީބެއް ނުލިބޭހާ ހިނދަކު މިކަން ކާމިޔާބު ނުކުރެވޭނެ ކަމަށެވެ.
ޑރ. އަފްޒަލް ވިދާޅުވީ މިފުރުސަތަކީ އާންމުންގެ ކިބައިން އެހީތެރިކަމެއް މުޅި ގައުމަށް ބޭނުންވާ ވަގުތު ކަމަށާއި، މިވަގުތު ދޭ އިރުޝާދުތަކާ އެއްގޮތަށް ކުރާ ކަމަށްވާނަމަ ކޮންޓްރޯލް ކުރެވޭނެ ކަމަށެވެ. ނަމަވެސް އިރުޝާދުތަކާ އެއްގޮތަށް އަމަލުނުކުރާ ނަމަ ހީނުކުރާ މިންވަރަށް ފެތިދާނެކަމުގެ ބިރު އޮބައޮތް ކަމަށެވެ.
ޑރ.އަފްޒަލް ވިދާޅުވީ ލޮކްޑައުންއަށް ދިއުމުގެ ކުރިން ވެސް އެއްވެ ނޫޅެން ތަކުރާރުކޮށް އިލްތިމާސްކުރި ނަމަވެސް ބުރުޖަހަން ދިއުމާއި، ދަތުރުތަކަށް ދިއުމާ، ފިހާރަތަކަށް ދިއުންގިނަ ކަމަށެވެ. މީގެއިތުރުން ޑރ.އަފްޒަލް ވިދާޅުވީ ދިވެހިންގެ ދިރިއުޅުމުގެ ވައްޓަފާޅި ބަދަލުކުރަންޖެހޭ ކަމަށާއި، އެހެންނޫން ނަމަ އެއްވެސް ވަރަކަށް ކޮންޓްރޯލެއް ނުވާނެ ކަމަށެވެ.
އެއްވެސް ވަރަކަށް އަރިދަފުސް ރޯގާ، ހުންއައުމާ ކެއްސާ އެފަދަ އަލާމާތެއް ފެނިފެނިއްޖެނަމަ، އެކަން ލަސްނުކޮށް ރިޕޯޓު ކުރުމަށް ޑރ.އަފްޒަލް ވަނީ އިލްތިމާސްކޮށްފައެވެ. އަދި ކެތްތެރިކަން އިސްކޮށް، ސާފުތާހިރު މިންގަނޑުތައް އިތުރަށް ހަރުދަނާ ކުރުމަށް ޑޮކްޓަރު ގޮވާލެއްވިއެވެ. މީގެ އިތުރުން ޑރ.އަފްޒަލް ވިދާޅުވީ އޯގާތެރިކަމާއެކު އަމަލުކުރަން އެކަކު އަނެކަކަށް އެހީތެރިކަން ފޯރުކޮށްދޭންޖެހޭ ކަމަށެވެ.
ޕޮޒިޓިވްވި މީހާއި ގުޅުންހުރި މައުލޫމާތުގެ ސައްހަކަން ނުބަލާ މައުލޫމާތު ނުފެތުރުމަށް ވެސް އިލްތިމާސްކުރައްވާ ޑރ.އަފްޒަލް ވިދާޅުވީ ޕޮޒިޓިވްވި މީހާއި ގުޅިގެން އެއްވެސް މައުލޫމާތެއް ކަށަވަރު ނުކޮށް ސޯޝަލް މީޑިއާގައި އެވާހަކަތައް ނުފަތުރާ އެފަދަ މައުލޫމާތެއް އެނގޭނަމަ އެކަން އެންއީއޯސީއަށް އެންގުމަށް އެދޭ ކަމަށެވެ.
