ލޮކްޑައުންގެ މުއްދަތު އިތުރުކޮށްފި
16 އެޕްރީލު 2020 | ބުރާސްފަތި 09:34މިފިޔަވަޅު އެޅީ މާލެއިން ދިވެއްސަކު ކޮވިޑް-19 އަށް ޕޮޒިޓިވްވުމާ ގުޅިގެން
މާލެސިޓީ ލޮކްޑައުންކުރުމަށްފަހު ރޭގެ ވަގުތެއްގައި
މާލެއިން ދިވެއްސަކު ކޮވިޑް-19 އަށް ޕޮޒިޓިވްވުމާ ގުޅިގެން މާލެ ސަރަޙައްދު 24 ގަޑިއިރަށް ލޮކްޑައުންކުރި ލޮކްޑައުންގެ މުއްދަތު އިތުރު 24 ގަޑިއިރަށް އިތުރުކޮށްފިއެވެ.
އެޗްޕީއޭއިން ކުރި އިއުލާނުގައި ބުނެފައިވަނީ މާލޭގައި (މާލެ، ހުޅުމާލެ، ވިލިމާލެ) މަގުމައްޗަށް ނުކުމެ އުޅުމާއި އެއްގަމު އުޅަނދުފަހަރު ދުއްވުން މަނާ ކުރުމަށް އެންގި އެންގުމުގެ މުއްދަތު އިތުރުކުރުމަށް ނިންމާފައިވާ ކަމަށެވެ.
އަދި ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތާއި ރައްކައުތެރި ކަމަށް ޓަކައި، ޤާނޫނު ނަންބަރު 7/2012 (ޢާންމު ޞިއްޙަތު ރައްކާތެރިކުރުމުގެ ޤާނޫނު) ގެ ދަށުން އަޅަންޖެހޭ ޚާއްޞަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، ބުނެވިދިޔަ ޤާނޫނުގެ 33 ވަނަ މާއްދާގެ ދަށުން، އާންމު ޞިއްޙަތުގެ ކުއްލި ނުރައްކަލުގެ ހާލަތެއް، 12 މާރިޗު 2020 ގައި، މިނިސްޓަރ އޮފް ހެލްތު އިޢުލާނު ކޮށްފައި ވީ ހިނދުގެ މި ޤާނޫނުގެ 34 ވަނަ މާއްދާގެ (ރ) އާއި (ށ) ގެ ދަށުން، ޑިރެކްޓަރ ޖެނެރަލް އޮފް ޕަބްލިކް ހެލްތުގެ ހައިސިއްޔަތުން ލިބިދޭ ބާރުގެ ދަށުން، 2020 އެޕްރީލް 15 ވީ ބުދަ ދުވަހު އަންގާފައިވާ ނަންބަރު: 2020/34 އެންގުމުގެ މުއްދަތު އިތުރު 24 ގަޑިއިރަށް އިތުރުކުރުމަށް ނިންމާ އެކަން އަންގާ ކަމަށެވެ.
މާލެ ލޮކްޑައުންކޮށްފައިވަނީ މާލެއިން ކޮވިޑް-19 އަށް ދިވެއްސެއް ޕޮޒިޓިވްވުމާއި ގުޅިގެންނެވެ. އަދި އެމީހާއާއި ކޮންޓެކްޓްވި 2 މީހަކު ވަނީ ބުދަ ދުވަހުގެ ރޭ ބައްޔަށް ޕޮޒިޓިވްވެފައެވެ. މީގެ އިތުރުން ކޮމިއުނިޓީ ސްޕްރެޑެއް އުޅޭތީއާއި ކޮންޓެކްޓް ޓްރޭސިންގެ މަސައްކަތް ލޮކްޑައުންގައި ކުރެވޭނެކަމަށް އެޗްޕީއޭއިން ބުނެއެވެ.
