ދަނޑުވެރިކަން ކުރާ ފަރާތްތަކުގެ ދަފްތަރެއް އެކުލަވާލުމުގެ މަސައްކަތްތައް ކުރަމުންދާ ކަމަށް އައްޑޫ ސިޓީ ކައުންސިލުން ބުނެފިއެވެ.

އައްޑޫސިޓީ ކައުންސިލުން ބުނީ މުޅި ދުނިޔެއަށް މި ދުވަސްވަރު ފެތުރެމުންދާ ކޮވިޑް 19 ބަލިމަޑުކަމާ ގުޅިގެން ރާއްޖޭގެ ރައްޔިތުންގެ ފުޑް ސެކިއުރިޓީ ޔަގީންކުރުމަށް، ދަނޑުވެރިކަމުގެ އުފެއްދުންތައް އިތުރުކުރުމުގެ ގޮތުން، ދަނޑުވެރިކަން ކުރުމަށް ބާރުއަޅަމުންދާ ކަމަށެވެ. އަދި ދަނޑުވެރިންނަށް ހިތްވަރުދީ، އެ ފަރާތްތަކަށް ބޭނުންވާނެ ލުއިފަސޭހަތައް ފޯރުކޮށްދިނުމަކީ، ސަރުކާރުން ވަރަށް ބޮޑަށް އިސްކަންދޭ ކަމަކަށްވާތީ އައްޑޫސިޓީގެ ހުޅުދޫ އަވަށުގައި ދިރިއުޅުމަށް ދޫކުރެވިފައިވާ ބަންޑާރަ ގޯތި ފިޔަވައި އެހެނިހެން ބިންތަކުގައި ނުވަތަ އޮޅުތަކުގައި މި ވަގުތު ދަނޑުވެރިކަން ކުރަމުންގެންދާ ފަރާތްތަކާއިބެހޭ މައުލޫމާތު ސާފުކުރުމަށް ހުޅުދޫ އަވަށު އޮފީހުން ބޭނުންވާ ކަމަށެވެ.

އެގޮތުން، މިހާރު ދަނޑުވެރިކަން ކުރާ ފަރާތްތަކުން ކުރާ މަސައްކަތްތައް ރައްކާތެރިކޮށްދިނުމުގެ ގޮތުން، ދަނޑުވެރިކަން ކުރާ ފަރާތްތަކުގެ ދަފުތަރެއް އެކުލަވާލައި، ހުޅުދޫ އަވަށު އޮފީހުގައި އެ ފަރާތެއްގެ ދަނޑު ރަޖިސްޓަރީކުރުމުގެ މަސައްކަތް މިހާރު ކުރަމުންދާ ކަމަށެވެ. ދަނޑުވެރިކަންކުރާ ފަރާތްތަކުގެ ތެރޭގައި އޮޅުއަލަ ހައްދާ ފަރާތްތައްވެސް ހިމެނޭ ކަމަށް ކައުންސިލުން ބުނެއެވެ.

ކައުންސިލުން ބުނީ ހުޅުދޫ އަވަށުގައި ދިރިއުޅުމަށް ދޫކުރެވިފައިވާ ބަންޑާރަ ގޯތި ފިޔަވައި އެހެނިހެން ބިންތަކުގައި ނުވަތަ އޮޅުތަކުގައި މި ވަގުތު ދަނޑުވެރިކަން ކުރައްވަމުންދާ ފަރާތްތަކުން "އައްޑޫސިޓީ ހުޅުދޫ އަވަށުގައި ދަނޑުވެރިކަން ކުރަމުންގެންދާ ފަރާތްތަކުގެ މަޢުލޫމާތު ސާފުކުރާ ފޯމު" ފުރިހަމަކޮށް، އެ ފަރާތެއްގެ ދިވެހި ރައްޔިތެއްކަން އަންގައިދޭ ކާޑުގެ ކޮޕީ އާއި، ފޯމާއެކު ހުށަހަޅަންޖެހޭ އެހެނިހެން ލިޔެކިއުންތައް 23 އެޕްރީލް 2020 ވާ ބުރާސްފަތި ދުވަހުގެ 23:59 ގެ ކުރިން ހުޅުދޫ އަވަށު އޮފީހަށް ހުށަހެޅުއްވުން އެދޭ ކަމަށެވެ.

މީގެ އިތުރުން ކައުންސިލުން ބުނީ އީމެއިލް މެދުވެރިކޮށް ހުށަހަޅާ ފޯމުތައްވެސް ބަލައިގަނެވޭނެ ކަމަށާއި، މިމުއްދަތުގެ ތެރޭގައި މި ފޯމު ހުޅުދޫ އަވަށު އޮފީހަށް ހުށަނާޅާ ފަރާތްތަކަކީ، މި ވަގުތު ހުޅުދޫ އަވަށުގައި ދަނޑުވެރިކަންކުރާ ފަރާތެއްގެ ގޮތުގައި ހުޅުދޫ އަވަށު އޮފީހުގައި ދަފްތަރު ނުކުރެވޭނެ ކަމަށެވެ.

ކައުންސިލުން ބުނީ ފޯމު އެދާރާގެ ވެބްސައިޓުން އަދި ދިވެހި ސަރުކާރުގެ ގެޒެޓުން ޑައުންލޯޑްކުރެވެން ހުންނާނެ ކަމަށެވެ. އަދި ހުޅުދޫ އަވަށު އޮފީހުން ލިބެން ހުންނާނެ ކަމަށެވެ.