ހުސްނުވެ، ކައްކާ ގޭހާއި މެޑިކަލް ގޭސް ވެސް ލިބޭނެ: މޯލްޑިވް ގޭސް
16 އެޕްރީލު 2020 | ބުރާސްފަތި 13:26ކައްކާ ގޭސް އަދި މެޑިކަލް ގޭސް ރާއްޖޭގެ ހުރިހާ ސަރަހައްދަކަށް ހުސްނުވެ، ލިބެމުންދާނެ
މޯލްޑިވް ގޭހުގެ ލުއި ފުޅިތަކެއް
ދިވެހިރާއްޖޭގައި އެންމެ ފުޅާކޮށް، ކައްކާ ގޭހާއި މެޑިކަލް ގޭސް ފޯރުކޮށްދެމުންދާ ސަރުކާރު ކުންފުނި މޯލްޑިވް ގޭސްއިން ގޭހަށް ދަތިނުވެ، ފޯރުކޮށްދެވޭނެ ކަމަށް ބުނެފި އެވެ.
ބުދަ ދުވަހު ކޮވިޑް-19 ބައްޔަށް ރާއްޖެއިން މީހަކު ޕޮޒިޓިވް ވުމާއެކު ރާއްޖެ ލޮކްޑައުން ކުރުމާއި އަދި ރާއްޖެޓީވީން މިހާރު ގެނެސްދޭ "ކޮރޯނާ ކަވަރޭޖް" އަށް ފޯނުން މައުލޫމާތު ދެއްވަމުން މޯލްޑިވް ގޭސްގެ އެކްޓިންގ މެނޭޖިންގ ޑިރެކްޓަރ އަލީ އިކްރާމް ވިދާޅުވީ، ކައްކަން ބޭނުންކުރާ ގޭހާއި މެޑިކަލް ގޭސް ހުސްނުވެ ފޯރުކޮށްދޭނެ ކަމަށެވެ.
އިކްރާމް ވިދާޅުވީ، ގޭސް ސްޓޯރޭޖް ކުރެވޭނެ އިންތިޒާމުތައް ވެސް ހަމަޖެހިފައިވާ ކަމަށެވެ. އަދި ހާއްސަކޮށް މިދިއަ ޖެނުއަރީން ފެށިގެން މިފަދަ ހާއްސަ ހާލަތެއް އައިސްދާނެކަމަށްޓަކައި ރަނގަޅަށް ތައްޔާރު ވެވިފައިވާ ކަމަށްވެސް އިކްރާމް ވިދާޅުވި އެވެ.
އެގޮތުން، މިހާރުވެސް ކުރިއަށް އޮތް އެއް މަސް ދުވަހަށް ވާވަރަށް މިހާރު ވެސް ކައްކާ ގޭހާއި މެޑިކަލް ގޭސް އެބަހުރި ކަމަށެވެ. އަދި މިހާރު އިތުރު ސްޓޮކެއް ރާއްޖެ ގެނައުމަށްޓަކައި އެކަމުގެ ލިިޔެކިޔުންތައް ނިމި، ގާތްގަނޑަށް 90 ޕަސެންޓް ނިމިފައިވާ ކަމަށެވެ.
އިކްރާމް ވިދާޅުވީ، މާލެ ސަރަހައްދު ލޮކްޑައުން ކޮށްފައިވާތީ، މާލޭ ސަރަހައްދުގައި ޑެލިވަރީ ކުރާ ޕިކަޕްތައް މަދުކޮށްފައިވާތީ، ކޮންމެވެސް ވަރަކަށް ޑެލިވަރީ ކުރުމުގައި ކުރިއަށްވުރެން ލަސްވެދާނެ ކަމަށެވެ. އާންމު ގޮތެއްގައި ޑެލިވަރީ ކުރުމަށް ހަތް ޕިކަޕު ބޭނުންކުރިނަމަވެސް، މިހާރު އެ ކުންފުނިން ޑެލިވަރީ އަށް ބޭނުންކުރަމުން އަންނަނީ ތިން ޕިކެޕެވެ.
މި ހާލަތުގައި ވެސް ލަސްވެގެން ބައި ގަޑިއިރުގެ ތެރޭގައި ޑެލިވަރީ ކޮށްދޭން ކަމުގެ ޔަގީންކަން މޯލްޑިވް ގޭސް އިން ވަނީ އަރުވާފަ އެވެ. މާލެ ލޮކްޑައުން ކުރުމާ ގުޅިގެން އަސާސީ ބައެއް ހިދުމަތްތައް ލިބުމުގައި ރައްޔިތުންނަށް އަންނަނީ ބޮޑެތި ދަތިތަކަކާ ކުރަމަތިވަމުންނެވެ.
