އައްޑޫގައި ސުޕަރ ސްޕެޝަލިސްޓުންގެ ހާއްސަ މެޑިކަލް ކޭމްޕެއް ކުރިއަށް ދަނީ
މި ކޭމްޕް އޮންނާނީ މި މަހުގެ 23 އަދި 24 ގައި
އައިޖީއެމްއެޗް
އައްޑޫ ސީޓީގައި ސުޕަރ ސްޕެޝަލިސްޓުންގެ ހާއްސަ މެޑިކަލް ކޭމްޕެއް ބޭއްވުމަށް އައިޖީއެމްއެޗުން ނިންމައިފި އެވެ.
އައިޖީއެމްއެޗުން ބުނީ މި މެޑީކަލް ކޭމްޕަކީ ހިތުގެ ބަލިތަކާއި ބެހޭ ގައުމީ މަރުކަޒުން ދޭ ހިދްމަތަށް އެއް އަހަރު ފުރުމުގެ މުނާސަބަތުގައި، އައިޖީއެމްއެޗާއި އައްޑޫ ސިޓީގެ ހިތަދޫ ރީޖަނަލް ހޮސްޕިޓަލް އަދި މިނިސްޓަރީ އޮފް ހެލްތާއި ގުޅިގެން ބާއްވާ ކޭމްޕެއް ކަމަށެވެ.
އެގޮތުން މިމަހުގެ 23 އަދި 24 ގައި މި މެޑިކަލް ކޭމްޕް އައްޑޫ ސިޓީގައި ކުރިއަށްދާނެ ކަމަށް އައިޖީއެމްއެޗުން ބުނެއެވެ.
މި ކޭމްޕްގައި ހިތުގެ ބަލިތަކަށް ހާއްސަ ޑޮކްޓަރުންގެ އިތުރުން ކިޑްނީގެ ބަލިތަކަށް ހާއްސަ ޑޮކްޓަރުން އަދި ކުޑަކަމުދާ ނިޒާމުގެ ބަލިތަކަށް ހާއްސަ ޑޮކްޓަރުން ބައްލަވާ އަދި ސްކޭން ކުރުމުގެ ހިދްމަތް ދިނުމަށް ހަމަޖެހިފައިވާ ކަމަށް އައިޖީއެމްއެޗުން ބުނެއެވެ.
އައިޖީއެމްއެޗުން ބުނީ މެޑިކަލް ކޭމްޕްގެ މަގްސަދަކީ އައްޑޫ ސިޓީގައި ތިބި ހާއްސަ ޑޮކްޓަރުންނަށް ދައްކަވާ ފަރުވާ ހޯއްދަވަން ބޭނުންވާ ފަރާތްތަކަށް އެ ފުރުސަތު ފަހިކޮށް ދިނުން ކަމަށެވެ.
އައިޖީއެމްއެޗުން ބުނީ ހިތުގެ ބަލިތަކަށް ފަރުވާދޭ ގައުމީ މަރުކަޒުން ވޭތުވެދިޔަ އެއް އަހަރު ދުވަހުގެ ތެރޭގައި 1,430 އަށްވުރެ ގިނަ ބަލި މީހުންނަށް ކާމިޔާބުކަމާއިއެކު ފަރުވާ ދެވިފައިވާ ކަމަށެވެ.
