މި ހާލަތުގައި ހުއްދަ ދެވިފައިވާ ފަރާތްތަކުގެ ވެހިކަލްތަކަށް ޕެޓްރޯލާއި ޑީސަލް އެޅޭނެ: ފިއުލް ސަޕްލައިސް
އެންއީއޯސީގެ ހުއްދަ ލިބިފައިވާ ވެހިކަލްތަކަށް 24 ގަޑިއިރު ތެޔޮ އެޅޭނެ
އެފްއެސްއެމްގެ ޝެޑެއް
ކޮވިޑް-19 ޕެންޑަމިކް އާ ގުޅިގެން މާލެ ސިޓީ އެއްކޮށް ލޮކްޑައުން ކޮށްފައިވީނަމަވެސް ނެޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ)ގެ ހާއްސަ ހުއްދައާއެކު ބޭނުންކުރާ ވެހިކަލްތަކަށް ބޭނުންވާ ޕެޓްރޯލާއި ޑީސަލް އެޅުމުގެ އިންތިޒާމު ހަމަޖެހިފައިވާ ކަމަށް ފިއުލް ސަޕްލައިސް މޯލްޑިވްސް (އެފްއެސްއެމް) އިން ބުނެފިއެވެ.
ކޮވިޑް-19 ޕެންޑަމިކްއާ ގުޅިގެން "ރާއްޖެޓީވީ"އިން ގެނެސްދޭ ކަވަރޭޖްގެ ތެރެއިން ބުދަ ދުވަހުގެ ރޭ ފޯނުން މައުލޫމާތު ދެއްވަމުން އެފްއެސްއެމްގެ މެނޭޖިންގ ޑިރެކްޓަރ މުހައްމަދު ގަސަމް ވިދާޅުވީ، މާލޭ ސިޓީ ލޮކްޑައުންގައިވާ ހާލަތުގައި އެފްއެސްއެމުން ހިދުމަތް ލިބެމުންދާނީ ހަމައެކަނި، ނެޝަނަލް އެމަޖެންސީ އޮޕަރޭޝަން ސެންޓަރުން ހުއްދަ ދީފައިވާ ވެހިކަލްތަކަށް އެކަނި ކަމަށެވެ. މި ހިދުމަތް ހުއްޓަލައިފިނަމަ، އެ ފަރާތްތަކަށް ދަތިތަކާ ކުރިމަތިވެދާނެތީ، އެ ފަރާތްތަކަށް 24 ގަޑިއިރު ހިދުމަތް ދިނުމަށް ނިންމާފައިވާ ކަމަށް ވެސް ގަސަމް ވިދާޅުވިއެވެ.
މީގެއިތުރުން ގަސަމް ވިދާޅުވީ، ސިފައިންނާއި ފުލުހުންގެ އިދާރާގެ ވެހިކަލްތަކަށް ހިދުމަތް ލިބިގެންދާއިރު، ސިފައިންނާއި ފުލުހުން ދުއްވާ އެމީހުންގެ އަމިއްލަ ވެހިކަލްތަކަށް ހިދުމަތް ލިބޭނީ، ސިފައިންގެ މީހެއްކަން ނުވަތަ ފުލުހެއްކަން ކަށަވަރު ކުރުމަށްފަހު ކަމަށެވެ.
ގަސަމް ވިދާޅުވީ، މާލެއިން ހިދުމަތް ލިބޭނީ، ސްޓެލްކޯ ކައިރި ހުންނަ ޕެޓްރޯލް ޝެޑުން ކަމަށާއި ހުޅުމާލެއިން ހިދުމަތް ލިބޭނީ، ހުޅުމާލޭގައި ހުންނަ އެކުންފުނީގެ ޕެޓްރޯލް ޝެޑުން ކަމަށެވެ.
ގަސަމް ވެސް ވަނީ ރައްޔިތުން ގެއިން ނުނިކުމެ، ގޭގައި ތިއްބެވުމަށާއި އެޗްޕީއޭ އިން އަންގާ އެންގުންތަކަށް ކިޔަމަންތެރިކަން އަދާކުރުމަށް އިލްތިމާސް ކުރައްވާފައެވެ.
މާލެއިން ދިވެއްސަކު ކޮވިޑް-19 އަށް ޕޮޒިޓިވްވުމާ ގުޅިގެން މާލެ ސަރަޙައްދު 24 ގަޑިއިރަށް ލޮކްޑައުންކޮށްފައިވަނީ ބުދަ ދުވަހުއެވެ.
