ޓެލިކްލާސްތައް ވަގުތީ ގޮތުން މެދު ކަނޑާލައިފި
15 އެޕްރީލު 2020 | ބުދަ 19:56ޓެލިކްލާސްތައް ދެން ފެށޭނެ ތާރީހެއް ހާމައެއް ނުކުރޭ
ސްކޫލުތަކުގެ ކިޔެވުން މިހާރު ވަނީ މެދުކަނޑާލާފައި
މާލެސިޓީ ލޮކްޑައުން ކުރުމާއި ގުޅިގެން ޓެލިކްލާސްތައް މެދުކަނޑާލެވިފައިވާ ކަމަށް އެޑިޔުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން ބުނީ އޭޕްރީލް 15ގެ މެންދުރުފަހު 3:30ގެ ފަހުންފެށިގެން 24 ގަޑިއިރުގެ މުއްދައްތަކަށް މާލެ ސަރަހައްދު ލޮކްޑައުންވުމާ ގުޅިގެން ބުރާސްފަތި ދުވަހުން ފެށިގެން ވަކި ގޮތެއް އަންގަންދެން ޓެލިކްލާސްތައް މެދުކަނޑާލެވިފައިވާ ކަމަށެވެ.
ކޮވިޑް-19އާ ގުޅިގެން ހުރިހާ ސްކޫލުތަކެއް ކިޔެވުން ވަނީ މެދުކަނޑާލާފައެވެ. ނަމަވެސް ޕީއެސްއެމްގެ ޔެސް ޗެނަލް މެދުވެރިކޮށް ގްރޭޑް 10 ގެ ކުދިންނަށާއި އޭ.އެސް ލެވެލް އިމްތިހާންގައި ބައިވެރިވާ ދަރިވަރުންނަށް ޚާއްސަކޮށް ޓެލިކްލާސް ޕްރޮގްރާމް 15 މާޗްގައި ފެށިއެވެ. އަދި މިމަހުގެ 12ވީ އާދިއްތަ ދުވަހު ކީ ސްޓޭޖް އެކެއް އަދި ދެއަކަށް ޓެލިކްލާސްތައް ފެށިއެވެ.
ނަމަވެސް އެޑިޔުކޭޝަން މިނިސްޓްރީން ބުނީ ލޮކްޑަައުން ކުރުމުން ކްލާސްތައް ޝޫޓުކުރުމުގައި ދަތިތައް ދިމާވަމުންދާ ކަމަށެވެ.
ޓެލިކްލާސްތައް ދެން ފެށޭނެ ތާރީހެއް އެޑިއުކޭޝަން މިނިސްޓްރީން ހާމައެއް ނުކުރެއެވެ.
