ކައުންސިލް އިންތިހާބުގައި ވާދަކުރާ ސިވިލް ސާވެންޓުންގެ ސަސްޕެންޝަންއަށް ސީއެސްސީއަށް ހައްލު ހޯދޭނެ: ނިޔާޒު
14 އެޕްރީލު 2020 | އަންގާރަ 14:00ސީއެސްސީއަށް އެކަމަށް ހައްލު ހޯދޭނެ
ހުޅުމާލެ ދާއިރާގެ މެމްބަރު އަލީ ނިޔާޒު
ލޯކަލް ކައުންސިލް އިންތިހާބުގައި ވާދަކުރާ ސިވިލް ސާވެންޓުންގެ ސަސްޕެންޝަންއަށް ސިވިލް ސާރވިސް ކޮމިޝަނަށް ހައްލު ހޯދޭނެކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
ކޮވިޑް-19 އާ ގުޅިގެން ލޯކަލް ކައުންސިލް އިންތިޚާބު 2020 ފަސްކުރެވިފައިވާއިރު އިންތިޚާބުގެ ކެންޑިޑޭޓުގެ ތެރެއިން ވަޒީފާތަކުގެ އުޅޭ ފަރާތްތަކުގެ ސަސްޕެންޝަނަށް އަވަސް ހައްލެއް ބޭނުންވާކަމަށާއި ވަރަށް ބޮޑަށް އެ ފަރާތްތަކަށް ގެއްލުންވާކަމަށް ބުނެ އިލެކްޝަންސް ކޮމިޝަންގެ ނައިބު ރައީސް އަހުމަދު އަކްރަމް ކުރެއްވި ޓުވީޓަކަަށް ރިޕްލައިކޮށް މެމްބަރު ނިޔާޒު ވިދާޅުވީ، ލޯކަލް ކައުންސިލް އިންތިހާބު 2020 ފަސްކުރީ ކޯޓުންވެސް އަދި ރައްޔިތުންގެ މަޖިލީހުންވެސް ގޮތެއް ހޯދައިނުދީ ވަނިކޮށް ކަމަށެވެ. އަދި އީސީ އަށް އެކަމަށް ހައްލު ހޯދުނު ގޮތަށް ސިވިލް ސާރވިސް ކޮމިޝަނަށްވެސް ހައްލު ހޯދޭނެކަމަށެވެ.
ކައުންސިލް އިންތިހާބުގައި ވާދަކުރާ ސިވިލް ސާވެންޓުންގެ ސަސްޕެންޝަންއަށް ހައްލެން ލިބެންޖެހޭ އަކްރަމް ވިދާޅުވެފައިވާއިރު، ރައްޔިތުންގެ މަޖިލީހުގެ ޖަލްސާގައި ގަމު ދާއިރާގެ މެމްބަރު މުހައްމަދު ވިސާމް ވަނީ ލޯކަލް ކައުންސިލް އިންތިހާބުގައި ވާދަކުރާ ސިވިލް ސާވެންޓުންގެ ސަސްޕެންޝަން އުވާލުމަށް ގޮވާލައްވާފައެވެ.
ވިސާމް ވިދާޅުވީ ކޮވިޑް-19 ގެ ބިރުވެރިކަމާއި ކުރިމަތިވީ، ލޯކަލް ކައުންސިލް އިންތިހާބާއި ކުރިމަތިލައިގެން ތިއްބާ ކަމަށެވެ. ސިވިލް ސަރވިސްގައި މަސައްކަތްކުރާ 204 ސިވިލް ސަރވެންޓުން މި އިންތިހާބުގައި ކެންޑިޑޭޓުންގެ ގޮތުގައި ވާދަކުރާ ކަމަށާއި، ސަސްޕެންޝަން ދިގު ދެމިގެންދާނަމަ އެ 204 ކެންޑިޑޭޓުންގެ އާއިލާތަކަށްވެސް ގެއްލުންވާނެ ކަމަށް މެމްބަރު ވިދާޅުވިއެވެ.
