ތަހުގީގުކުރާ 28 މައްސަލައިގެ ތެރެއިން ފައިނަލް ރިޕޯޓު މިހާތަނަށް ނިމިފައިވަނީ 3 މައްސަލައެއް: މަރު ކޮމިޝަން
14 އެޕްރީލު 2020 | އަންގާރަ 13:31ޖުމްލަ 28 މައްސަލައެއް ދަނީ ބަލަމުން
މަރު ކޮމިޝަނުގެ މެމްބަރު ފަރީޝާ އަބްދުﷲ
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތަށް ތަހުގީގުކުރުމަށް ރައީސުލްޖުމްހޫރިއްޔާ އުފައްދަވާފައިވާ ރިޔާސީ ކޮމިޝަނުން ބަލަމުންގެންދާ 28 މައްސަލައިގެ ތެރެއިން މިހާތަނަށް ފައިނަލް ރިޕޯޓު އެކުލަވާލެވިފައިވަނީ 3 މައްސަލައެއްގެކަމަށް އެ ކޮމިޝަނުން ބުނެފިއެވެ.
މަރު ކޮމިޝަނުގެ މެމްބަރު ފަރީޝާ އަބްދުﷲ ރާއްޖެއެމްވީއަށް ދެއްވި ހާއްސަ ބަސްދީގަތުމެއްގައި ވިދާޅުވީ، ތަހްގީގުކުރަމުން ދަނީ ގިނަ ދުވަސްތަކެއްވެފައިވާ، މިހާތަނަށް އިންސާފެއް ނުލިބިވާ މައްސަލަތަކެއްކަމަށާއި އެކަންކަމަށް އެކަށީގެންވާ ވަގުތު ބޭނުންވާކަމަށެވެ. އެގޮތުން، ވަކި މުއްދަތެއް ކަނޑައަޅައި ވަކި ތާރީހެއް ކަނޑައަޅައި ނިންމާނެކަމަށް ބުނަން ބޭނުން ނުވާކަމަށާއި "ކަމަކަށް ކަމެއް ކުރަން ބޭނުން ނުވާ" ކަމަށެވެ.
ފަރީޝާ ވިދާޅުވީ ތަހުގީގުކުރަމުންދާއިރު އެކި ގޮންޖެހުންތަކާއި ދިމާވާކަމަށެވެ. އެގޮތުން ކޮމިޝަނުގެ މެމްބަރުންގެ މަޝްވަރާއަށް ފަހު ކޯޓު މަރުހަލާގައި އޮންނަ ކޭސްތައް އެ މަރުހަލާ ނިމުމުން ނޫނީ ބެލުމަށް ނިންމާފައިވާކަމަށެވެ. އެކަން އެގޮތަށް ނިންމީ މިހާރު އެ މައްސަލަތަކުގައި ތުހުމަތު ކުރެވިފައިވާ ފަރާތްތަކަށް މަރު ކޮމިޝަނުގެ ތަހުގީގުކުރާ މައްސަލައެއްކަމެއް ބުނެ އުޒުރެއް ދެއްކުމުގެ ޖާގަ ނުދިނުމަށްކަމަށް ފަރީޝާ ވަނީ ވިދާޅުވެފައެވެ.
ދުނިޔޭގައި މިހާރު ހަލުވިކަމާއެކު ފެތުރުމެންދާ ކޮވިޑް-19 ރާއްޖެއިން ފެނުމާއި ގުޅިގެން ސަރުކާރުގެ އޮފީސްތަށް ބަންދުކުރުމާއި ގުޅިގެން ގިނަ މަސައްކަތް މަޑުޖެހިފައިވާކަން ފާހަގަކޮށް ފަރީޝާ އިތުރަށް ވިދާޅުވީ، ގޭގައި ތިބެގެންވެސް މަރުކޮމިޝަނުގެ މެމްބަރުން މަސައްކަތް ކުރިޔަށް ގެންދާކަމަށެވެ.
ފަރީޝަ ވިދާޅުވީ، ކޮމިޝަނުން ތަހުގީގުކުރަމުންދާ 28 މައްސަލައިގެ ތެރެއިން 3 މައްސަލައެއްގެ ފައިނަލް ރިޕޯޓު އެކުލަވާލައިފައިވާކަމަށެވެ. އަދި ޑރ.އަފްރާޝީމް ރިލްވާން އަދި ޔާމީން ރަޝީދުގެ މަރުގެ މައްސަލައިގެ ވަރަށް ބޮޑު ބައި ނިމިފައިވާކަމަށެވެ، ނަމަވެސް ދުވަސްތަކެއް ވެ އިތުރު ހޯދުންތަކާއެކު، އިތުރަށް ތަހުގީގުކުރަންޖެހޭ ކަންކަން އެބަހުރިކަމަށް އޭނާ ވިދާޅުވިއެވެ.
