ކޮވިޑް-19 އެންމެ ހަލުވި މިނުގައި ފެތުރެމުންދާ އެމެރިކާގައި ވައިރަސް ޖެހިގެން މަރުވީ މީހުންގެ ޢަދަދު 23،000 ށް ވުރެ މައްޗަށް އަރައިފިއެވެ.

މިވަގުތު ދުނިޔޭގައި އެންމެ ގިނަ މީހުންނަށް ވައިރަސް ޖެހިގެން ރިޕޯޓުކުރަމުން އަންނަނީވެސް އެމެރިކާއިންނެވެ. އެޤައުމުގައި ވައިރަސް ޖެހިފައިވާ މީހުންގެ ޢަދަދު ފަސް ލައްކައަށްވުރެ މައްޗަށް ވަނީ އަރާފަ އެވެ. ދުނިޔޭގައި ތިން ވަނައަށް އެންމެ އާބާދީ ބޮޑު އެމެރިކާގައި އާދިއްތަ ދުވަހު މަރުވެގެން ރިޕޯޓު ކޮށްފައިވަނީ 1513 މީހުންނެވެ.

މިއީ އޭޕްރީލްމަހުގެ 6 ވަނަ ދުވަހު 1،309 މީހުން މަރުވިފަހުން އެންމެ މަދު ޢަދަދަކަށް މީހުން މަރުވެގެން މިފަހަކުން ރިޕޯޓުކުރި ދުވަހެވެ. މިވައިރަސް އެންމެ ހަލުވި މިނުގައި އެމެރިކާގައި ފެތުރެމުން އަންނަ ނިއު ޔޯކްގައި ވައިރަސް ޖެހިގެން މަރުވީ މީހުންގެ ޢަދަދު ވަނީ 10،000 ށް އަރާފަ އެވެ.

އެމެރިކާގައި ހަލުވިމިނުގައި ވައިރަސް ފެތުރެމުންދާތީ ވައިރަސް ފެތުރުން ކޮންޓްރޯލްކުރުމަށް ގޭގައި ތިބެގެން މަސައްކަތް ކުރަމުންދާއިރު އެޤައުމުގެ އިޤުތިޞާދަށް އަންނަނީ ނުރަނގަޅު އަސަރުތަކެއް ކުރަމުންނެވެ. އެގޮތުން ވިޔަފާރިތައް ބަންދުކޮށް ދަތުރުފަތުރުކުރުން ހުއްޓާލާފައިވާއިރު ބައެއް ދާއިރާތައް އަލުން ހުޅުވާލުމަށް އެމެރިކާގެ އޮފިޝަލުންނާއި ޤާނޫނު ހަދާ މަޖިލީހުގެ މެންބަރުން އަންނަނީ އެކަމަށް ބަހުޘްކުރައްވަމުންނެވެ.

އެމެރިކާގައި މިހާރު އަޅާފައިވާ ފިޔަވަޅުތަކަށް ކިރިޔާވެސް ލުޔެއްދޭނެ ކަމަށް ބުނެފައިވަނީ މެއި މަހުގެ 1 ވަނަ ދުވަހުން ފެށިގެންނެވެ.