ކޮވިޑް-19ގެ މިޙާލަތުގައި އަބުރާ "ނޯމަލް" ޙާލަތަކައް ނުދެވޭނެ ކަމަށާއި، ދެން ދާން ޖެހޭނީ އާ "ނޯމަލްއަށް" ކަމަށް ޑރ. ނަޒްލާ ރަފީޤް ވިދާޅުވެއްޖެއެވެ.
ޑރ. ނަޒްލާ މިހެން ވިދާޅުވީ ކޮވިޑް-19ގެ ކުރިން ދުނިޔެއޮތް ޢާންމު ޙާލަތަކައް ދެވޭނެތޯ ނޫސްވެރިއަކު ކުރި ސުވާލަށް ޖަވާބު ދެއްވަމުންނެވެ.
ކޮވިޑް-19ގެ އެންމެފަހުގެ މަޢުލޫމާތު ހިއްސާކުރުމަށް ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ މިޙާތަލުން ދެން ދާންޖެހޭނީ "ނިއު ނޯމަލްއަކަށް" ކަމަށެވެ. މިހާރުގެ މިޙާލަތުގައި މީގެ ކުރިން ކަންތައްތައް ކުރި ގޮތަށް ނުކުރެވޭނެ ކަމަށް ޑރ. ނަޒްލާ ވިދާޅުވިއެވެ.
ކޮވިޑް-19 ކޮންޓްރޯލް ކުރުމަށް ގިނަ މަސައްކަތައް ކުރާކަން ފާހަގަކުރައްވައި ޑރ. ނަޒްލާ ވިދާޅުވީ ޤައުމުގެ އެތެރޭގައި ބަލި އެއްވެސް ވަރަކަށް އުޅޭތޯ ބެލުމުގެ މަސައްކަތްތައް ކުރިއަށްދާ ކަމަށާއި، މީހުންނަށް މަޢުލޫމާތު ދިނުމުގެ މަސައްކަތްތައް ވެސް ކުރާކަމަށެވެ.
ޑރ. ނަޒްލާ ވިދާޅުވީ އިޖުތިމާޢީ ގައިދުރުކަން އިތުރުކުމަށް ގިނަ ފިޔަވަޅުތައް ވެސް އަޅާފައިވާ ކަމަށާއި، ޢާންމުން ވެސް މިފަދަ ކަންކަމަށް ސަމާލުވުމަށްއެދޭ ކަމަށެވެ. ގިނަ އިންޓިއުޝަންތައް ބަންދުކުރީ އިޖްތިމާޢީ ގައިދުރުކަން އިތުރުކުރުމުގެ މަޤުޞަދުގައިކަން ޑރ. ނަޒްލާ ފާހަގަކުރެއްވިއެވެ.
މީގެ އިތުރުން ޑރ. ނަޒްލާ ވިދާޅުވީ ޕަބްލިކް ހެލްތުން މީހުންގެ އުޅުން ބަދަރުކުރަން މަސައްކަތް ކުރާ ކަމަށާއި، އެހެންނަމަވެސް މީހުން ޢަމަލުކުރާ ގޮތް ބަދަލުކުރަން އުދަނގޫ ކަމަކަށް ވެފައިވާކަމަށެވެ. އެންއޯއީސީގެ ޓީމުން "ބިހޭވިއަރ ޗޭންޖު ކޮންޕެއިންއެއް" ފެށުމަށް ތައްޔާރުވަމުންދާ ކަމަށް ޑރ.ނަޒްލާ ވިދާޅުވިއެވެ. އަދި ވިދާޅުވީ ޢާންމުން ހޭލުންތެރިކުރުމަށް އެންމެން އެކުގައި މަސައްކަތް ކުރަންޖެހޭ ކަމަށާއި، އިޖްތިމާޢީ ގައިދުރަން ދެމެހެއްޓުމަށްޓަކައި ހަނދާންއާ ކޮށްދިނުން މުހިންމު ކަމަށެވެ.
ކޮމިއުނިޓީ ސްޕްރެޑަކަށް ނުދިއުމަށް ތިން ކަމެއް ކުރެވިދާނެ. އެއްކަމަކީ ބަލި އަންނަ ވަރު މަދުކުރުން. އަނެއް ކަމަކީ ބަލި އަންނަ މީހުން ހޯދުން. ތިން ވަނަ ކަމަކީ އެއީ ޑިސްޓެންސްއޭ މިޔާ ކަންތައް. އެހުރިހާ ކަމެއް އެއްވަރަކަށް ކުރެވިގެން ނޫނީ ހަގީގަތުގައި މިކޮންޓްރޯލެއް އަޅުގަނޑުމެންނަށް ނުކުރެވޭނެ. މިކަންތައް ދެމި އޮންނާނެ ވެކްސިންއެއް އަޅުގަނޑުމެންނަށް ލިބެންދެން. ވެކްސިންއެއް އުފެއްދުނު ކަމަށް އިއުލާން ކުރުމަކީ އަޅުގަނޑުމެންނަށް އަދި ވެކްސިން ލިބުމެއް ނޫން. ހުރިހާ އިންތިޒާމްތަކެއް ހަމަޖެހެންދެން އަޅުގަނޑުމެން ޖެހޭ މިއުސޫލާ އެއްގޮތަށް ކަންކަން ކުރަން.ޑރ. ނަޒްލާ ރަފީޤް
މިނޫސްވެރިންގެ ބައްދަލުވުމުގައި ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް ޢަޒީޒު ވިދާޅުވީ ކޮވިޑް-19އަށް ތައްޔާރުވާން ރާއްޖެއަށް ވަގުތުތަކެއް ލިބިގެންދިޔަ ކަމަށެވެ.
އެގޮތުން ރާއްޖެއަށް އެޅިފައި ހުރި ފުރުޞަތުތަކާއެކު އެވަގުތުކޮޅުގެ ތެރޭގައި އާ ގޮތަކަށް އުޅުމަށް ފަރިތަވާންޖެހޭ ކަމަށް މަބްރޫކް ވިދާޅުވިއެވެ. އަދި ގައިދުރުކަން އިތުރު ކުރުމާއި، އަތް ދޮވުން އިތުރުކުރުން އަދި ޑޮކްޓަރުން ދެއްވާ ލަފައާ އެއްގޮތަށް މަސައްކަތް ކުރުން ހިމެނެއެވެ.
ރާއްޖޭގައި އިންތިޒާމުތައް ހަމަޖެހިފައިހުރިތޯ ސުވާލުކުރާކަން ފާހަގަކުރައްވައި މަބްރޫކް ވިދާޅުވީ ރާއްޖޭގައި ޢާންމުންގެ ތެރެއަށް ބަލި ފެތުރިއްޖެނަމަ އެންމެނަށް ފަރުވާދެވޭނެކަމުގެ ޤާބިލުކަމާމެދު ގިނަ ބަޔަކު ސުވާލު އުފައްދާ ކަަމަށެވެ.
ސުވާލު ޖަވާބަކީ ތިބޭފުޅުންނަށް ކިހާވަރަކަށްތޯ ގައިދުރު ކުރެވެނީ. ހަމައެއީ އޭގެ ޖަވާބު. މާނައަކީ އަޅުގަނޑުމެންނަށް ގައިދުރުކަން ނުކުރެވިއްޖެއްޔާ ވެޓިލޭޓަރ ބޭނުންވާ މީހާ ވެންޓިލޭޓަރ ނުލިބި އޮންނާނީ މަގުމަތީގަ. މީގަ މިބަލި ޖެހޭ މިހުންގެ އަދަދެއް ނޫން. އެކަމަކު ބަލިޖެހެނީ ދުވާލަކު ކިތައް މީހުންނަށްތޯ މިބަލަނީ. މިސާލަކަށް ރައްޖެއަށް ލިބެނީ 10 ވެންޓިލޭޓަރު މިސާލަކަށް ރާއްޖޭގައި ތިބެނީ 100 މީހުންނޯ. 100 ދުވަހު އެންމެނަށް ބަލި ޖެހިއްޖެއްޔާ 99 މީހުންނަށް ވެންޓިލޭޓަރެއް ނުލިބޭނެ. އެކަމަކު 100 މީހުންނަށް ބަލިޖެހެނީ މުއްދަތެއް އޮވެގެން ކަމަށްވަންޏާ ބޭނުންވާ ވަރަށް ޑޮކްޓަރުންނާއި ބޭނުންވާ ނަރުހުންނާއި، ބޭނުންވާ ވަރަށް ވެންޓިލޭޓަރު ހުންނާނެ ކަމަށް.ޓާސްކް ފޯހުގެ ތަރުޖަމާނު މަބްރޫކް އަޒީޒު
ދުނިޔޭގެ ބޭރުގެ ޤައުމުތަކަށް އަލިއަޅުއްވާލައްވާ މަބްރޫކް ވިދާޅުވީ ކޮވިޑް-19 ޢާންމުންގެ ތެރޭގައި ފެތުރިއްޖެނަމަ ކޮންޓްރޯލް ކުރެވިފައިނުވާ ކަމަށެވެ. އެއީ އެޤައުމުތަކުގައި ރަނގަޅު ޞިއްޙީ ފަރުވާދޭނެ ނިޒާމެއް ގާއިމުވެފައި ނެތުމުން ނޫން ކަމަށާއި، އެއްފަހަރާ އެންމެނަށް މިބަލި ޖެހުމުން ކަންތައްތައްވާނެ ގޮތް ކަމަށް މަބްރޫކް ވިދާޅުވިއެވެ.
މީގެ އިތުރުން މަބްރޫކް ވިދާޅުވީ ކާފިއު އިޢުލާނުކުރުމާއި، ވެކްސިން އަދި ބޭސްތަކާ ބެހޭ ގޮތުން ވެސް ވާހަކަތައް ދެއްކޭނެ ކަމަށެވެ. ނަމަވެސް މިބަލި ދުނިޔޭގައި އެބަ ފެތުރެމުންދާއިރު، ރާއްޖެއަށް އައުމުގެ ފުރުޞަތު ބޮޑު ބައްޔެއް ކަމަށްވާތީ ދުނިޔޭގެ އެހެން ޤައުމުތަކާ އެއްގޮތަށް އެކަމުގައި ރާއްޖޭގެ ރައްޔިތުން ސަލާމަތްވުމަށް ރައްކާތެރިކަމުގެ ފިޔަވަޅު އަޅަންޖެހޭ ކަމަށް މަބްރޫކް ވިދާޅުވިއެވެ.
އައްސޭރިއަކަށް ރާއްޖެއިން ގިނަ ބަޔަކު މަރުނުވެ ދެވޭނެތޯ ކުރާ ސުވާލުގެ ޖަވާބަކީ އަޅުގަނޑުމެންނަށް ކިހާ ވަރަކަށް ގައިދުރު ކުރެވިދާނެތޯ. އެއީ މިދައްކާ ވާހަކައަކީ.ޓާސްކް ފޯހުގެ ތަރުޖަމާނު މަބްރޫކް އަޒީޒު
މަބްރޫކް ވިދާޅުވީ އެމެރިކާފަދަ ޤައުމުތަކުގައި އައުޓް ބްރޭކްގައި ދެލައްކައެއްހާ މީހުން މަރުވާނެ ކަމަށް ލަފާކުރެވުނު ނަމަވެސް އެޢަދަދު އެތައް ގުނައަކުން ކުޑަކުރީ ގައިދުރުކަން ދަމަހައްޓާގެން ކަމަށެވެ.
އެގޮތުން ރާއްޖޭގެ ރައްޔިތުން ވެސް ގައިދުރުކުރަން ދަމަހައްޓަންޖެހޭ ކަމަށާއި، އެގޮތަށް ޢަމަލުނުކޮށް ބޭނުން ގޮތަކަށް އުޅެފިކަމަށްވާނަމަ ސަލާމަތްވުމަށް ކުރެވޭނެ ކަމެއް ނެތް ކަމަށެވެ.
