މި އަހަރުގެ ސެޕްޓެމްބަރު މަހު ރާއްޖޭގައި ބާއްވާ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ވާނެ ކަމާއިމެދު އެއްވެސް ޝައްކެއް ނެތް ކަމަށާއި، ނަމަވެސް އިދިކޮޅު ޕާޓީތަކުން މިހާރު އަމަލުކުރަމުންދާ ގޮތަށް އަމަލުކުރުމަށް ފުރުޞަތު ނުދެވޭނެ ކަމަށް ދިވެހި ސަރުކާރުން ބުނެފިއެވެ.

ވިލާތުގެ އިއްތިހާދާއި، އެކިއެކި ޤައުމުތަކުން ގުޅިގެން ރައްޖޭގެ ސިޔާސީ މަސްރަހާއި ގުޅޭގޮތުން ނެރުނު ބަޔާނަކަށް ރައްދުދީ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސަރުކާރާއި އިދިކޮޅު ސިޔާސީ ހަރަކާތަކީ ޑިމޮކްރަސީއެއްގައި މުހިއްމު އެއްޗެއް ކަމަށް ޤަބޫލުކުރާ ކަމަށެވެ. އެފަދަ އިދިކޮޅު ހަރަކާތްތަކާއި ޕާޓީތަކުން ހިންގާ ހަރަކާތްތަކީ ޒިންމާދާރު ގޮތެއްގައި ދިވެހިރާއްޖޭގެ ޤާނޫނުއަސާސީއާއި ތައާރުޒު ނުވާގޮތަށް، ސިޔާސީ ޕާޓީތަކުގެ ޤާނޫނާއި އެ ޤާނޫނުގެ ދަށުން ހެދިފައިވާ ޤަވާއިދުތަކާއި އުސޫލުތަކުގެ ތަރަހައިގެ ތެރެއިން ހިންގޭ ހަރަކާތަށް ވާން ޖެހޭނެ ކަމަށްވެސް ފޮރިން މިނިސްޓްރީގެ ބަޔާނުގައި ވަނީ ބުނެފައެވެ.

ޤާނޫނުގެ ބާރު ކަނޑުވާލައި، ރައްޔިތުންނަށް އޮޅުވާލައި، އިންތިޚާބުގެ ކުރިން މަސްރަހު ގޯސްކުރުމަށް ހިންގާ އަމަލުތަކަކީ ޒިންމާދާރު ސިޔާސީ ހަރަކާތްތައް ކަމަށް ނުބެލޭނެ ކަމަށާއި، ރާއްޖޭގެ ސިޔާސީ މަސްރަހުގައި އެފަދަ އަމަލުތަކަށް ޖާގައެއްވެސް ނުދެވޭނެ ކަމަށް މި ބަޔާނުގައި ވަނީ ބުނެފައެވެ. އަދި އެފަދަ އަމަލުތައް ހުއްޓުވައި ޤާނޫނުގެ ވެރިކަން ހިންގުމަށް ސަރުކާރުން ހިންގާ އަމަލުތަކަކީ، މިނިވަންކަމާއިއެކު އެއްވެ އުޅުމާއި ޚިޔާލު ފާޅުކުރުންވެސް ހިމެނޭ ގޮތަށް، ޤާނޫނު އަސާސީން ރައްޔިތުންނަށް ލިބިދީފައިވާ ޙައްޤުތަކަސް އަރައިގަތުމަށް ސަރުކާރުން ހިންގާ ކަންކަން ކަމަށް އެއްވެސް ފަރާތަކުން ދެކިގެން ނުވާނެ ކަމަށްވެސް ފޮރިން މިނިސްތްރީގެ ބަޔާނުގައި ވަނީ ބުނެފައެވެ.

އެ ބަޔާނުގައި ސަރުކާރުން ބުނެފައިވަނީ އެއްވެސް ތަފާތު ކުރުމެއް ނެތި ރައްޔިތުންގެ ޙައްޤުތައް ކަށަވަރު ކުރުމަށް ކުރަންޖެހޭ ހުރިހާ މަސައްކަތެއް ސަރުކާރުން ކުރަމުން ގެންދާނެ ކަމަށެވެ.

ރާއްޖޭގައި ބޭއްވޭ އިންތިޚާބުތަކަކީ ދެފުށްފެންނަ، މިނިވަން، އިންސާފުވެރި އިންތިޚާބުތަކަށް ހެދުމަށް، އިދިކޮޅު ފަރާތްތަކުންވެސް ޣައިރު ޤާނޫނީ އަމަލުތައް ހިންގުން ހުއްޓާލައި، ސަރުކާރަސް އެއްބާރުލުން ދިނުމަށް، ބަޔާން ނެރުނު ބޭރުގެ ޤައުމުތަކުން ރާއްޖޭގެ އިދިކޮޅު ފަރާތްތަކަށް ގޮވާލުމަކީވެސް މުހިއްމު ކަމެއްކަން ދިވެހި ސަރުކާރުން ވަނީ ފާހަގަކޮށްފައެވެ.

ބަޔާނުގައި އިތުރަށް ބުނެފައިވަނީ އައު ޤާނޫނު އަސާސީ ފާސްކުރެވުނުތާ މިހާރު 10 އަހަރު ވެފައިވާ ކަމަށާއި، އެ މުއްދަތުގައި ދެ ފަހަރެއްގެ މަތިން ރިޔާސީ އިންތިޚާބާއި، ޤާނޫނު ހަދާ މަޖިލީހުގެ އިންތިޚާބާއި، ކައުންސިލް އިންތިޚާބު އަދި އެކި ފަހަރުމަތިން ބައި އިލެކްޝަންތައް ބޭއްވިފައިޥާއިރު، އެ ހުރިހާ އިންތިޚާބެއްވެސް ނިމިގެން ގޮސްފައިވަނީ މިނިވަން އިންސާފުވެރި އިންތިޚާބުގެ ގޮތުގައި ކަމަށެވެ.

ސަރުކާރުން ނެރުނު މި ބަޔާނުގައި ރާއްޖޭގެ އިލެކްޝަން ކޮމިޝަނަށް ސަރުޚާރުގެ ފުރިހަމަ އެއްބާރުލުން ލިބޭނެ ކަމުގެ ޔަޤީންކަން ވަނީ ދީފައެވެ.