ދަތިތަކާއެކުވެސް ބޭރަށް ފޮނުވި ކެއަރ ޕެކޭޖްތައް އާއިލާތަކާ ހަވާލުކުރަނީ
ތަކެތި ރައްދުކޮށްދިނުމަށް ސީދާ ގެއާ ހަމަޔަށް ގެންގޮސްދެނީވެސް އެގައުމުތަކުގައި ހުންނަ ރާއްޖޭގެ ހައި ކޮމިޝަންތަކުން
ކެއަރ ޕެކޭޖްތައް ހަވާލުކުރުމަށް ކިޔުގައި
ރާއްޖެއިން ބޭރުގެ 3 ގައުމެއްގައި ތިބި ދިވެހިންނަށް ފޮނުވުމަށް އެމީހުންގެ އާއިލާތަކުން ފޮނުވި ކެއަރޕެކޭޖްތައް ހަވާލުކުރުމުގެ މަސައްކަތް ދަތިތަކާއެކުވެސް ކުރިއަށްދާކަމަށް ފޮރިން މިނިސްޓްރީއިން ބުނެފިއެވެ.
ފޮރިން މިނިސްޓްރީއިން މައުލޫމާތު ދޭ ގޮތުގައި ލަންކާއަށް ފޮނުވި 622 ކެއަރޕެކޭޖްގެ ތެރެއިން 500 އަށްވުރެ ގިނަ ޕެކޭޖްތައް މިހާރު ވަނީ ހަވާލުކުރެވިފައެވެ. އަދި މެލޭޝިއާއަށް ފޮނުވި 452 ކެއަރޕެކޭޖްގެ ތެރެއިން މިހާރު 100 އަށްވުރެ ގިނަ ޕެކޭޖް ޑެލިވަރކޮށްދީފައިވާއިރު، އިންޑިއާގެ ޓްރިވެންޑްރަމް އަދި ކޮޗިން އަށް ފޮނުވި ތަކެތި އިއްޔެ ކަސްޓަމްސްއިން ނެރެ ބެހުމުގެ މަސައްކަތް ފަށާފައިވާކަމަށްވެސް މިނިސްޓްރީއިން މައުލޫމާތު ދެއެވެ.
ސަރުކާރުން ހިލޭ މި ޚިދުމަތް ފޯރުކޮށްދޭއިރު، ތަކެތި ރައްދުކޮށްދިނުމަށް ސީދާ ގެއާ ހަމަޔަށް ގެންގޮސްދެނީވެސް އެގައުމުތަކުގައި ހުންނަ ރާއްޖޭގެ ހައިކޮމިޝަންތަކުންނެވެ. އަދި މިއީ އެހެން އެއްވެސް ގައުމަކުން ފޯރުކޮށްދޭ ޚިދުމަތެއް ނޫނެވެ.
ބައެއް ފަރާތްތަކުން ކެއަރޕެކެޖްތައް ނުލިބި، ލަސްވެގެން ސޯޝަލް މީޑިއާގައި ލިޔެފައިވުމާ ގުޅިގެން އެކަމާ ގުޅޭ ގޮތުން ރާއްޖެ.އެމްވީ އިން ސުވާލުކުރުމުން ފޮރިން މިނިސްޓްރީއިން ބުނީ ތަކެތި ހަވާލުކުރުމުގެ މަސައްކަތް ކުރިއަށްދަނީ ލޮކްޑައުންގައިވާ ސިޓީތަކަކަށްކަމަށާއި، އެހެންކަމުން ބޭނުންވާ އެންމެ ހަލުވި މިނެއްގައި އެކަން ކުރިއަށް ނުދާނެކަމަށެވެ. އަދި މާލެއިން ފޮނުވި ތަކެތީގެ ތެރޭގައި ހަލާކުވާނެ އެއްވެސް ބާވަތެއް ހުރެގެން ނުވާނެކަމަށާއި، ވީހާވެސް އަވަހަށް ތަކެތި އާއިލާތަކަށް ރައްދު ކޮށްދޭނެކަމަށެވެ.
ތަކެތި ލަސްވެގެން ބައެއް މީހުން ސޯޝަލް މީޑިއާގައި އަޑުއުފުލިނަމަވެސް ގިނަ ބަޔަކު ވަނީ ސަރުކާރުން ހިލޭ މިޚިދުމަތް ދިވެހިންނަށް ފޯރުކޮށްދޭތީ އެކަމަށް ޝުކުރު އަދާކޮށްފައެވެ. އަދި ތަކެތި ލަސްވެގެން އުޅެނީ ޝުކުރު ކުރަން ނުދަންނަ ބައެއްކަމަށާއި، ލަންކާ އަދި މެލޭޝިއާ އޮތް ހާލަތު އެމީހުންނަށް ނޭނގޭތޯ ބައެއް މީހުން ސުވާލުކޮށްފައިވެއެވެ.
