މާދަމާއިން ފެށިގެން އައްޑޫ ސިޓީ ކައުންސިލުން ޓްރާންސްޕޯޓުގެ ޚިދުމަތްތައް އަލުން ދެނީ

ކޮވިޑް-19 އާއި ގުޅިގެން ހުއްޓާލާފައިވާ އައްޑޫ ސިޓީ ކައުންސިލުން ދެމުން އަންނަ ޓްރާންސްޕޯޓްގެ ޚިދުމަތްތައް އަލުން ދިނުމަށް ނިންމައިއެވެ.

އައްޑުސިޓީ ކައުންސިލުން ބުނީ އަންގާރަ ދުވަހުން ފެށިގެން އެ އިދާރާގެ ޓްރާންސްޕޯޓް ސެކްޝަނުގެ ޚިދުމަތް ދިނުމަށް ނިންމަފައިވާ ކަމަށެވެ. އެ ޚިދުމަތްތައް ދިނުން ވަގުތީގޮތުން ހުއްޓާލާފައިވަނީ މިދިޔަ މަހުގެ 19 ވަނަ ދުވަހުއެވެ.

19 މާރިޗު 2020 އިން ފެށިގެން ސަރުކާރު އޮފީސްތައް ނުހުޅުވާގޮތަށް ސަރުކާރުން ހަމަޖައްސާފައިވާތީ، މިއިދާރާގެ ޓްރާންސްޕޯޓް ސެކްޝަނުން ދެމުންދާ ޚިދުމަތްތައް ދިނުން ވަގުތީ ގޮތުން އެ ކައުންސިލުން ހުއްޓާލާފައިވެއެވެ.

އައްޑޫ ސިޓީ ކައުންސިލުން ބުނީ ޚިދުމަތްތަކަށް އެދި އެޕްލިކޭޝަން ހުށަހެޅޭނީ ކޮންމެ ހަފުތާއަކު އާދިއްތަ، އަންގާރަ އަދި ބުރާސްފަތި ދުވަހު ހެނދުނު 09:00 އިން މެންދުރު 12:00 އަށް ކަމުގައެއެވެ.

އައްޑޫ ސިޓީން ޓްރާންސްޕޯޓާއި ގުޅޭ ޚިދުމަތްތައް އަލުން ދޭން ފަށާފައިވާއިރު، މާލޭގައި ހުންނަ ޓްރާންސްޕޯޓް އޮތޯރިޓީން ވެސް ވަނީ އަލުން ބައެއް ޚިދުމަތްތައް ދޭން ފަށާފައެވެ.