މި މަހުގެ ހަވަނަ ދުވަހުގެރޭ ށ. އަތޮޅުގައި ހިނގަމުންގެންދާ ޖޭޑަބްލިޔު މެރިއޮޓް މޯލްޑިވްސް އެންޑް ސްޕާ ރިސޯޓުގައި މަސައްކަތްކުރާ ބިދޭސީ މުދިމަކު މޫދަށް ފުންމާލި ފަހުން ޚަބަރެއް ނުވެގެން އެމީހާ ހޯދުމަށް ކުރިޔަށް ގެންދާ އޮޕަރޭޝަނުގައި މިހާތަނަށް ބޮޑު ޞަރަޙައްދެއް ހޯދިފައިވާ ކަމަށާއި، އަދިވެސް އޭނާ ނުފެންނަ ކަމަށް މޯލްޑިވްސް ނެޝަނަލް ޑިފެންސް ފޯރސް (އެމްއެންޑީއެފް) އިން ބުނެފިއެވެ. އެމިހާ ނުފެނިގެން ހޯދާތާ މިއަދަށް ވަނީ ހަތް ދުވަސްވެފައެވެ.
އެމްއެންޑީއެފްގެ މީޑިއާ އޮފިޝަލް އިބްރާހިމް އާޒިމް ރާއްޖެ. އެމްވީ އަށް ވިދާޅުވީ، ކޯސްޓް ގާޑްގެ ޑައިވަރުން ވަނީ އެ މީހާ ހޯދުމަށް ކަނޑުގެ ބޮޑު ޞަރަޙައްދެއް ބަލާފައި ކަމަށެވެ. އެކަމަކު އަދި މިހާތަނަށް އެމިހާ ހޯދިފައިނުވާ ކަމަށެވެ.
މެރިއޮޓް ރިސޯޓުގެ ސީސީޓީވީ ވީޑިއޯ ފުޓޭޖުން ފެންނަ ގޮތުގައި މި މީހާ މޫދަށް ފުންމާލާފައިވަނީ އެރިސޯޓުގެ ސަޕްލައި ޖެޓީ މަތިން، ފޯނެއްގައި ވާހަކަ ދައްކަން ހުރުމަށް ފަހުގައި ކަމަށް އެމްއެންޑީއެފުން ވަނީ ބުނެފައެވެ. މަޢުލޫމާތު ލިބިފައިވާ ގޮތުގައި އެ މުދިމަކީ އިންޑިއާ އަށް ނިޞްބަތްވާ މީހެކެވެ. ފުލުހުން ދަނީ އެ މައްސަލަ ތަޙުޤީޤު ކުރަމުންނެވެ.
އެމްއެންޑީއެފުން ބުނީ، އެ މީހާ އެންމެ ފަހުން ލައިގެން ހުރީ ހުދު ކުލައިގެ ކުރުތާއަކާއި އަޅިކުލައިގެ ފަޓްލޫނެއްކަމަށެވެ. ގެއްލުނު މީހާއާ ބެހޭ އެއްވެސް ޚަބަރެއްވޭތޯ އެޞަރަޙައްދުން ދަތުރުކުރާ އުޅަނދުފަހަރުންނާއި އެހިސާބުގެ ރަށްތަކުގެ އެހީތެރިކަމަށް ކޯސްޓުގާޑުން ވަނީ އެދިފައެވެ.
