ވޭތުވެދިޔަ އަހަރާއި އަޅާބަލާއިރު ޑެންގޫ ހުންޖެހިގެން ރިޕޯޓްކުރާ މިންވަރު ދަށަށް، އަރިދަފުސްރޯގާ ޖެހޭ މީހުންގެ އަދަދު މައްޗަށް
13 އެޕްރީލު 2020 | ހޯމަ 08:43ޖެނުއަރީ މަހު ޑެންގޫ ހުން ޖެހިގެން ރިޕޯޓްކޮށްފައިވަނީ 70 މީހުން
ބަލިތަކުން ރައްކާތެރިވުމަށް ފިޔަވަޅު އެޅުން މުހިންމުކަމަށް އެޗްޕީއޭއިން ބުނޭ
ވޭތުވެ ދިޔަ އަހަރުތަކުގައި ޑެންގޫ ހުން ޖެހިފައިވާ މިންވަރާއި އަޅާބަލާއިރު މިއަހަރުގެ މިހާތަނަށް ޑެންގީ ހުން ޖެހިގެން ރިޕޯޓްކޮށްފައިވާ އަދަދު މަދު ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފި އެވެ.
އެޗްޕީއޭއިން ބުނީ މިދިޔަ އަހަރުގެ ޑިސެމްބަރ މަހާ އަޅާބަލާއިރު މިއަހަރުގެ މިހާތަނަށް ޑެންގޫ ހުން ޖެހިގެން ރިޕޯޓްކޮށްފައިވާ މީހުންގެ އަދަދު ދަށްކަމަށެވެ. އެގޮތުން މިއަހަރުގެ ޖެނުއަރީ މަހު ޑެންގޫ ހުން ޖެހިގެން ރިޕޯޓްކޮށްފައިވަނީ 70 މީހުންނެވެ. ފެބްރުއަރީ މަހު 43 މީހުންނެވެ. އަދި މަރޗް މަހު 40 މީހުންނެވެ.
މިދިޔަ އަހަރުގެ ޑިސެމްބަރ މަހު 215 މީހަކަށް ވަނީ ޑެންގީ ހުންޖެހިފައެވެ. އެޗްޕީއޭއިން ބުނީ މިދުވަސްވަރު މަދިރީގެ ޒަރީޢާއިން ޖެހޭ ބަލިތައް މަދުނަމަވެސް ޑެންގީ އާއި ޗިކުންގުންޔާ ފަދަ ބަލިތައް ކޮންޓްރޯލްކުރުމާއި ބަލިން ރައްކާތެރިވުމަކީ މުހިންމު ކަމެއްކަމަށެވެ. އެގޮތުން ޑެންގީން ރައްކާތެރިވުމަށް މަދިރިން ރައްކާތެރިވުމުގެ ގޮތުން ހަށިގަނޑު ރަނގަޅަށް ނިވައިވާ ގޮތަށް ހެދުން އެޅުމާއި މަދިރި ލޯޝަން، ސްޕްރޭ އަދި މޮސްކިޓޯ ރެޕެލެންޓް ބޭނުންކުރުން މުހިންމު ކަމަށް އެޗްޕީއޭއިން ބުނެއެވެ. އަދި މަދިރި އުފެދޭ ޒާތުތަންތަން ގޭގެއާއި ގޯތިތެރޭގައި ނުބެހެއްޓުމަށް އެޗްޕީއޭއިން އިލްތިމާސްކުރެއެވެ.
މީގެއިތުރުން އެޗްޕީއޭއިން ބުނެފައިވަނީ ވޭތުވެދިޔަ އަހަރުގެ މިދުވަސްވަރާއި އަޅާބަލާއިރު މިއަހަރުގެ މިހާތަނަށް އަރިދަފުސް ރޯގާ ޖެހިގެން ރިޕޯޓްކުރަމުންދާ އަދަދު ގިނަ ކަމަށެވެ. އަދި މިދިޔަ އަހަރުގެ ޑިސެމްބަރ މަހާއި އަޅާބަލާއިރު މިއަހަރުގެ ޖެނުއަރީ މަހު އަރިދަފުސްރޯގާ ޖެހިގެން ރިޕޯޓްކުރާ މިންވަރު މަތިކަމަށް އެޗްޕީއޭއިން ބުނެއެވެ.
މިއަހަރުގެ ޖެނުއަރީ މަހު އަރިދަފުސް ރޯގާ ޖެހިގެން 22414 މީހުން ރިޕޯޓްކޮށްފައިވާއިރު ފެބްރުއަރީ މަހު ރިޕޯޓްކޮށްފައިވަނީ 19633 މީހުންނެވެ. އަދި މަރޗް މަހު ރިޕޯޓްކޮށްފައިވަނީ 16994 މީހުންނެވެ. މިދިޔަ އަހަރުގެ ޑިސެމްބަރ މަހު ރިޕޯޓްކޮށްފައިވަނީ 18969 މީހުންނެވެ.
އެޗްޕީއޭއިން ބުނީ އަރިދަފުސް ރޯގާއިން ރައްކާތެރިވުމުގެ ގޮތުން އަޅަންޖެހޭ ފިޔަވަޅުތައް އެޅުން މުހިންމު ކަމަށެވެ.
