ފަނޑިޔާރުން ރިޝްވަތު ނަގާ ކަމަށް ވިދާޅުވުމުން ގާޒީ ހަސަން ސަސްޕެންޑް ކޮށްފައި ހުންނަވާތާ އެއް އަހަރާއި ހަތް މަސް!
ގާޒީ ހަސަން ސައީދު ސަސްޕެންޑް ކުރީ ފެބްރުއަރީ، 22، 2016 ގައި
ހައިކޯޓަށް ނެގި ފަނޑިޔާރުންނަކީ ދުނިޔޭގައި ތިބި އެންމެ ކޮރަޕްޓު ފަނޑިޔާރުން ކަމަށް ވިދާޅުވި ގާޒީ ހަސަން ސައީދު
ޖުޑިޝަލް ސަރވިސް ކޮމިޝަން(ޖޭއެސްސީ) އިން ބަލަން ފެށި ސުލޫކީ މައްސަލައަކާ ގުޅިގެން ކަމަށް ބުނެ ފެމިލީ ކޯޓުގެ އިސް ގާޒީ ހަސަން ސައީދު ސަސްޕެންޑް ކޮށްފައި ހުންނަވާތާ އެއް އަހަރާއި ހަތް މަހަށް ވުރެ ގިނަ ދުވަސް ވެއްޖެ އެވެ.
ކޮމިޝަނުން ވަކިގޮތެއް އަންގަންދެން ވަޒީފާއަށް ނުނިކުމެ ގޭގައި މަޑުކުރަން ހަސަން ސައީދަށް އަންގާފައިވަނީ ފެބްރުއަރީ، 22، 2016 ގަ އެވެ.
ހަސަން ސައީދު ސަސްޕެންޑް ކުރުމަށް ނިންމީ، ފެމިލީ ކޯޓުގެ މުވައްޒަފުންނާ އެއްކޮށް ބޭއްވެވި ބައްދަލުވުމެއްގައި ހައިކޯޓަށް އެއިރު ނެގި ފަނޑިޔާރުންނަކީ ދުނިޔޭގައި ތިބި އެންމެ ކޮރަޕްޓު ފަނޑިޔާރުން ކަމާއި، އެމީހުން އެ ހުރިހާ ކަމެއް ކުރަނީ ހިޔާބޮޑު ގަހެއްގެ ދަށުގައި ތިބެގެން ކަމަށް ދޭހަވާގޮތަށް ހަސަން ސައީދު ވާހަކަފުޅުދެއްކެވި ކަމަށް ބުނާ މައްސަލައިގަ އެވެ. އެ މައްސަލަ ބަލަން ފެށީ ފެމިލީ ކޯޓުގެ މުވައްޒަފަކު އެ މައްސަލަ ޖޭއެސްސީއަށް ހުށަހެޅުމުންނެވެ.
ޖޭއެސްސީން ނެރުނު ބަޔާނެއްގައި ބުނެފައިވަނީ އެ ކޮމިޝަނުން އެގޮތަށް ނިންމީ ހަސަން ސައީދާ ބެހޭގޮތުން އެ ކޮމިޝަނަށް ހުށަހެޅި ތަހުގީގު ކުރަމުންދާ ޝަކުވާއަކާ ގުޅިގެން ދިވެހިރާއްޖޭގެ ފަނޑިޔާރުންގެ ގާނޫނު ގެ 38 ވަނަ މާއްދާގެ (ރ) ގެ ދަށުން ތަހުގީގު ކޮމެޓީން އެ މައްސަލައިގެ ތަހުގީގު ފުރިހަމަކޮށް ނިންމުމުން އެކަމާ ގުޅޭގޮތުން ކޮމިޝަނުން ވަކިގޮތެއް ކަނޑައަޅަންދެން ކަމަށެވެ.
ޖޭއެސްސީގެ ގާނޫނުގެ 29 ވަނަ މާއްދާގެ (ހ) ގައި ބުނެފައިވަނީ މައްސަލަ ތަހްގީގްކުރުމަށްފަހު، އެ މައްސަލައަކާއި ގުޅިގެން ތަހްގީގކުރާ ކޮމިޓީއަށް ލިބުނު މައްލޫމާތާއި، މައްސަލަ ރައްދުވާ ފަނޑިޔާރު ވަޒީފާއިން ވަކިކުރުމާބެހޭ ގޮތުން ކޮމިޝަނުން ގޮތެއް ކަނޑައަޅަންޖެހޭކަން ނުވަތަ ނޫންކަން އަންގާ، ނުވަތަ މިނޫންވެސް އެހެން ކަމަކާބެހޭ ގޮތުން ލަފަޔެއް ދޭންޖެހޭނަމަ އެކަން ބަޔާންކޮށް، ތަހްގީގްކުރާ ކޮމިޓީން މައްސަލައިގައި ނިންމި ނިންމުމުގެ ރިޕޯޓެއް ކޮމިށަނަށް ހުށަހަޅަންވާނެ ކަމަށެވެ. އެ މާއްދާގެ (ނ) ގައި ބުނެފައިވަނީ އެ ރިޕޯޓުގެ ނަކަލެއް މައްސަލަ ރައްދުވާ ފަނޑިޔާރަށާއި މައްސަލައާ ގުޅުންހުރި ފަރާތްތަކަށް ލިބެންވާނެ ކަމަށެވެ.
ގާނޫނުގެ 30 ވަނަ މާއްދާގައި ބުނެފައިވަނީ ތަހްގީގްކުރެވުނު މައްސަލައިގެ ރިޕޯޓު ލިބޭތާ 30 ދުވަހުގެ ތެރޭގައި ރިޕޯޓާއި ގުޅިގެން ކޮމިޝަނަށް އަންގަން ބޭނުންވާ މައްލޫމާތެއް ލިޔުމުން ހުށަހެޅުމާއި އަދި ރިޕޯޓާއި ބެހޭގޮތުން ހުށަހަޅަން ބޭނުންވާ ކަންތައްތައް ޝަފަހީ ހުށަހެޅުމަށްޓަކައި ޝަހްސީ ގޮތުން، ގާނޫނީ ވަކީލަކާއެކު ނުވަތަ ވަކީލަކާނުލައި، ކޮމިޝަނަށް ހާޒިރުވާން ބޭނުންކަން އެންގުމުގެ ފުރުސަތު މައްސަލަ ރައްދުވާ ފަނޑިޔާރަށް ލިބިގެންވާ ކަމަށެވެ.
ގާނޫނުގެ 31 ވަނަ މާއްދާގައި ބުނެފައިވަނީ ފަނޑިޔާރަކު ލިޔުމުން ކަމެއް ހުށަހަޅައިފިނަމަ މައްސަލައިގައި ހަރަކާތްތެރިވުމަށް ކޮމިޝަނުން އައްޔަންކޮށްފައިވާ ގާނޫނީ ވަކީލަށް ލިޔުމުގެ ނަކަލު ލިބޭތާ 15 ދުވަހުގެ ތެރޭގައި އެ ލިޔުމުގައިވާ ކަންތައްތަކަށް ޖަވާބުދާރީވެ ލިޔުމަކުން ކޮމިޝަނަށް ހުށަހަޅަންވާނެ ކަމަށެވެ.
ގާޒީ ހަސަން ސަސްޕެންޑް ކޮށްފައި ހުންނަވާތާ އެއް އަހަރާއި ހަތް މަހަށް ވުރެ ގިނަ ދުވަސް ފަހުން، ޖޭއެސްސީގެ ތަހުގީގު ކޮމެޓީން ވަނީ އެ މައްސަލައިގެ ތަހުގީގު ނިންމައި ކޮމިޝަނަށް ރިޕޯޓް ހުށަހަޅާފަ އެވެ. ކޮމިޝަނުން އެ ރިޕޯޓް ހަސަން ސައީދާ ހިއްސާކޮށްފައިވާއިރު، ހަސަން ސައީދު މިހާރު ވަނީ ޖަވާބުދާރީ ވެފަ އެވެ.
ޖޭއެސްސީއިން މައުލޫމާތުދޭ ގޮތުގައި މިހާރު މައްސަލަ އޮތީ ކޮމިޝަނުން އައްޔަންކުރި ވަކީލު ޖަވާބުދާރީވުމުގެ މަރުހަލާގައި ކަމަށެވެ. ވަކީލު ޖަވާބުދާރީވުމުން ކޮމިޝަނުން މައްސަލައާ މެދު ގޮތެއް ނިންމާނެ އެވެ.
ސަސްޕެންޑްކުރަން ނިންމި ނިންމުން ބާތިލްކުރަން ގާޒީ ހަސަން ސިވިލް ކޯޓަށް މައްސަލައެއްވެސް ހުށަހެއްޅުއްވި އެވެ. ނަމަވެސް އެ މައްސަލަ އިތުރަށް ކުރިއަށް ގެންދަން ބޭނުންނުވާ ކަމަށް ވިދާޅުވެ، ސިޓީއެއް ފޮނުވުމުން ކޯޓުން ވަނީ މައްސަލަ ކުރިއަށް ނުގެންދަން ނިންމާފަ އެވެ. އެ މައްސަލަ ނިމެންދެން ސަސްޕެންޝަނަށް އަމަލުކުރުން ފަސް ކުރަން އަމުރެއް ނެރެދޭން ހަސަންގެ ފަރާތުން އެދުނު ނަމަވެސްސް ސިވިލް ކޯޓުން ނިންމީ އެފަދަ އަމުރެއް ނެރެދެވެން ނެތް ކަމަށެވެ.
ގާޒީ ހަސަން ސަސްޕެންޑް ކުރި ފަހުން ފާއިތުވި މުއްދަތުގެ ތެރޭގައި ފެމިލީ ކޯޓަށް އިސްގާޒީ އަކު ހަމަޖައްސަވާފައެއް ނުވެ އެވެ. މިހާރު ކޯޓް ހިންގެވުމާ ހަވާލުވެ ހުންނެވީ ގާޒީ އިބްރާހިމް މާހިރު އެވެ.
