މިދިޔަ އަހަރާއި އަޅާބަލާއިރު ރާއްޖެއަށް މަސްތުވާތަކެތި އެތެރެ ކުރި މިންވަރު 42 އިންސައްތަ އިތުރު
މިއަހަރުގެ ޖެނުއަރީ މަހުން ފެށިގެން މިއަދާ ހަމައަށް މަސްތުވާތަކެއްޗާއި ބެހޭ 54 މައްސަލަ ވަނީ ބަލާފައި
ކަސްޓަމްސް އިން މީގެ ކުރިން އަތުލައިގަނެފައިވާ މަސްތުވާތަކެތި. މިދިޔަ އަހަރާއި އަޅާބަލާއިރު މިއަހަރު މަސްތުވާތަކެތި އެތެރެ ކުރި މިންވަރު ވަނީ އިތުރުވެފައި
މިދިޔަ އަހަރާއި އަޅާބަލާއިރު މިއަހަރުގެ މިހާތަނަށް ރާއްޖެއަށް މަސްތުވާތަކެތި އެތެރެ ކުރި މިންވަރު 42 އިންސައްތަ އިތުރު ވެއްޖެ ކަމަށް މޯލްޑިވްސް ކަސްޓަމްސް ސާވިސްއިން ބުނެފިއެވެ.
ކަސްޓަމްސްއިން ބޭއްވި ނޫސްވެރިންގެ ބައްދަލުވުމެއްގައި އެކޮމިޝަންގެ ޗީފް ސުޕްރިޓެންޑެންޓް އޮފް ކަސްޓަމްސް އިސްމާއީލް ހަމްދޫން ވިދާޅުވީ ޖުލައި މަހު އެކަނިވެސް ތިން މައްސަލައަކާއި ގުޅިގެން ހަތް ކިލޯއަށްވުރެ ގިނަ މަސްތުވާތަކެތި އަތުލައި ގަނެފައިވާކަމަށެވެ. އޭގެ ތެރޭގައި ހިމެނެނީ ބަންގްލަދޭޝްގެ ޑާކާއިން ރާއްޖެއައި 30 އަހަރުގެ ފިރިހެނަކު އަތުން އަތުލާފައިވާ5.4 ކިލޯގެ މަސްތުވާތަކެއްޗާއި ކެންޒޭނިޔާއިން ދޯހާމަގުން އައި 23 އަންހެނަކު އަތުން އަތުލައިގަތް 2 ކިލޯ އަދި އިންޑިއާއިން ރާއްޖެއައި އުމުރުން 31 އަހަރުގެ ދިވެއްސެއްގެ އަތުން އަތުލައިގަތް 771 ގްރާމުގެ މަސްތުވާތަކެއްޗެވެ.
ހަމްދޫން ވިދާޅުވީ މިއަހަރުގެ ޖެނުއަރީ މަހުން ފެށިގެން މިއަދާ ހަމައަށް މަސްތުވާތަކެއްޗާއި ބެހޭ 54 މައްސަލަ އަކާ ގުޅިގެން 23 ކިލޯގެ މަސްތުވާތަކެތި އަތުލައިގަނެފައިވާކަމަށެވެ. އޭގެތެރޭގައި ވައިގެ މަގުން ނުވަ މައްސަލަ، ޕޯސްޓުގެ ޒަރީއާއިން 42 މައްސަލަ އަދި ކަނޑުގެ މަގުން އެއް މައްސަލަ އެވެ.
ހަމްދޫން ވިދާޅުވީ ރާއްޖެ އެތެރެ ކުރާ މަސްތުވާތަކެތީގެ ތެރެއިން ހަށިގަނޑަށް އެންމެ ބޮޑު ގެއްލުމެއް ލިބޭ އެއް މަސްތުވާތަކެތި ކަމަށްވާ ޕާޓީ ޑްރަގްސް އިތުރު ވަމުން ދާކަމަށެވެ. އެގޮތުން ވަރަށް ގިނަ ޕާޓީ ޑްރަގްގެ މައްސަލަތައް ޕޯސްޓުގެ ޒަރީއާއިން ނެގިފައިވާ ކަމަށް އޭނާ ވިދާޅުވިއެވެ.
