ކޮވިޑް-19 އާ ގުޅިގެން ސަރުކާރުގެ އޮފީސްތައް ބަންދުކޮށްފައިވީ ނަމަވެސް، އިތުރު ގަޑީގައި މަސައްކަތަށް ނިކުންނަ މުވައްޒަފުންނަށް އޯވަރޓައިމް ފައިސާ ދޭނެ އުޞޫލު މިނިސްޓްރީ އޮފް ފިނޭންސުން ޢާންމުކޮށްފިއެވެ.

އޯވަރޓައިމް ފައިސާ ދޭން ނިންމި ނަމަވެސް، އޮފީސްތަކުގެ ޚަރަދުތައް ވީހާވެސް ކުޑަކޮށް އޮފީސްތަކުގެ މަސައްކަތްތައް ރާވާ ހިންގުމަށް އެ ތަންތަނުގެ ވެރިންނަށް ފިނޭންސުން ވަނީ އަންގާފަ އެވެ. އެގޮތުން މުވައްޒަފުންގެ މަސައްކަތްތައް ރޭވުމުގައި އިތުރު ގަޑީގައި މަސައްކަތްކުރަން ނުޖެހޭނެ ގޮތަކަށް ރޭވުމަށް ފިނޭންސް މިނިސްޓަރ އަމީރު ވަނީ ދަންނަވާފަ އެވެ.

މިނިސްޓަރ އަމީން ސޮއިކުރައްވާ ނެރުއްވާފައިވާ ސަރިކިއުލަރގައި ވާގޮތުން ނަމަ، މި ދުވަސްވަރު މަސައްކަތަށް ނިކުންނަ މުވައްޒަފުންގެ ތެރޭގައި ހިމެނެނީ މެދުކެނޑުމެއްނެތި ރައްޔިތުންނަށް ފޯރުކޮށްދިނުމަށް ނިންމާފައިވާ ޚިދުމަތްތައް ދިނުމަށް ނިކުންނަ މުވައްޒަފުންނާއި، ޞިއްޙީ ކުއްލި ނުރައްކަލުގެ ޙާލަތާއި ގުޅިގެން ދައުލަތުގެ އިދާރާތަކުން ކުރަން ޖެހޭ މަސައްކަތްތަކަށް ނެރޭ މުވައްޒަފުންނެވެ.

އޭގެ އިތުރުން، ދައުލަތުގެ އެއްވެސް އިދާރާއަކުން ކޮންމެހެން ދޭން ޖެހޭ ޚިދުމަތެއް ދިނުމަށްޓަކައި، ތަނުގެ އިސްވެރިން ނެރޭ މުވައްޒަފުންނަށް ވެސް އޯވަރޓައިމް ފައިސާ ލިބޭނެ ކަމަށް ސަރިކިއުލަރގައިވެ އެވެ.

މި ފަރާތްތަކަށް އޯވަރޓައިމްގެ ފައިސާ ލިބެނީ ރަސްމީ މަަސައްކަތު ގަޑީގެ އިތުރުން މަސައްކަތްކުރާ ގަޑިތަކުގައި އެކަންޏެވެ. ރަސްމީ ގަޑީގެ ގޮތުގައި ކަނޑައަޅާފައިވާ ވަގުތުގެ އިތުރަށް މަސައްކަތް ނުކުރާ ނަމަ، އޯވަރޓައިމް ފައިސާ ނުދިނުމަށް ވަނީ އަންގާފައެވެ.

ސަރކިއުލަރގައި ވާގޮތުން ނަމަ، ސަރުކާރުގެ އިދާރާތައް ބަންދުކޮށްފައިވީ ނަމަވެސް، ރަސްމީ ބަންދު ދުވަސްތަކުގެ ގޮތުގައި މި ދުވަސްތަކެއް ނުގުނާނެއެވެ. ރަސްމީ ބަންދު ދުވަސްތަކުގެ ގޮތުގައި ކަނޑައަޅާފައިވަނީ މިހާރު ވެސް ޤައުމީ ބަންދު ދުވަސްތަކާއި ސަރުކާރު ބަންދު ދުވަސްތަކުގެ ގޮތުގައި ކަނޑައަޅާފައިވާ ދުވަސްތައް އެކަންޏެވެ.

ކޮވިޑް-19 އާ ގުޅިގެން އިޤުތިޞާދަށް އައިސްފައިވާ ހީނަރުކަމުގެ ސަބަބުން ދައުލަތުގެ ޢާމްދަނީ ވަރަށް ބޮޑަށް ދަށަށް ދާނެ ކަމަށް ވަނީ އަންދާޒާކޮށްފަ އެވެ. އެގޮތުން ދައުލަތުގެ ބަޖެޓު 12 ބިލިއަން ޑޮލަރު ޑެފިސިޓް ވާނެ ކަމަށް ވަނީ ހާމަކޮށްފަ އެވެ. އަދި ކުރިން ދައުލަތުގެ ޚަރަދުގެ ތެރެއިން 1 ބިލިއަން ރުފިޔާ ކުޑަކުރަން ނިންމި ނަމަވެސް، މިހާރު އެ ޢަދަދު އިތުރުކުރަން ޖެހޭނެ ކަމަށް އަމީރު ވަނީ ވިދާޅުވެފައެވެ.