ކުރެއްދޫ ރިސޯޓުގައި ތިބި އެންމެން ކޮވިޑް-19 އަށް ޓެސްޓުކުރަނީ
13 އެޕްރީލު 2020 | ހޯމަ 02:02އެރިސޯޓުގައި ތިބި މީހުން ދޫކޮށްލާނީ ޓެސްޓު ކުރުމަށްފަހު
ކުރެއްދޫ އައިލެންޑް ރިސޯޓު
ކުރެއްދޫ އައިލެންޑް ރިސޯޓުގައި ތިބި އެންމެން ކޮވިޑް-19 އަށް ޓެސްޓުކުރުމަށް ނިންމައިފި އެވެ.
އާދިއްތަ ދުވަހުގެ ރޭ ކޮވިޑް-19 ގެ އެންމެފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ ކޮވިޑް-19 އާ ކޭސްތަކުގެ ތެރެއިން ކުރެއްދޫ ގެ ކޭސް ތަފާތު ކަމަށެވެ.
އެހެންކަމުން މިހާރު ކުރެއްދޫގައި ތިބި އެންމެން ދޫކޮށްލަން ނިންމާފައިވަނީ ކޮވިޑް-19 އަށް ޓެސްޓުކުރުމަށް ފަހު ކަމަށް މަބްރޫކް ވިދާޅުވި އެވެ.
ކުރެއްދޫ އައިލެންޑް ރިސޯޓުގައި ތިބި އެންމެން ކޮވިޑް-19 އަށް ޓެސްޓުކުރުމަށް ނިންމާފައިވާއިރު، އެ ރިސޯޓުން ފުރައިގެން ދިޔަ އިޓަލީ ފަތުރުވެރިޔާ މައްސަލައިގެ ޖިނާއީ ތަހުގީގު ފުލުހުން ވަނީ ފަށާފައެވެ.
މިމައްސަލައާ ގުޅިގެން ކުރެއްދޫ އައިލެންޑް ރިސޯޓުގައި މަސައްކަތް ކުރާ ޑޮކްޓަރުގެ ޕާސްޕޯޓް ހިފަހައްޓަން މޯލްޑިވްސް ޕޮލިސް ސަރވިސް އިން އިމިގްރޭޝަނަށް ވަނީ ޢަމުރުކޮށްފަ އެވެ.
ކްރިމިނަލް ކޯޓުގެ ގާޒީ އިބްރާހިމް އަލީ ސޮއިކުރައްވާ ނެރުއްވާފައިވާ ކޯޓު ޢަމުރުގައި ބުނެފައިވަނީ، މި އަހަރުގެ ފެބްރުއަރީ މަހުގެ 23 ވަނަ ދުވަހުގެ ވަގުތެއްގައި ކުރެއްދޫ ރިސޯޓް އެންޑް ސްޕާގައި ޗުއްޓީ ހޭދަކުރި އިޓަލީގެ ފަތުރުވެރިއެއްގެ ގައިން ބައްޔަށް ޝައްކުކުރެވޭ ޢަލާމާތްތަކެއް ފެނިފައިވާއިރު، އެ ފަތުރުވެރިޔާ ގައިގައި ބަލި ހުރިކަން ދެނެނުގަނެވި އަދި ރައްކާތެރިކަމުގެ ފިޔަވަޅުތައް އެޅުމުގެ ފުރުޞަތު ނުލިބި އޭނާ ފުރައިގެން ގޮސްފައިވުމާއި، އެކަމުގެ ސަބަބުން ކޮވިޑް-19 ވައިރަސް ދިވެހިރާއްޖޭގައި ފެތުރިފައިވާ ކަމަށެވެ.
އިތުރު ފަރާތްތަކުގެ ޞިއްޙަތަށާއި، ފުރާނައަށް ނުރައްކާ ކުރިމަތިލުމުގައި އިޓަލީގެ ފަތުރުވެރިޔާ އެކި ގޮތްގޮތުން މުޢާމަލާތްކުރި ފަރާތްތަކުން އެކަން އަންގަންޖެހޭ ފަރާތްތަކަށް ނާންގާ އަޅަންޖެހޭ ފިޔަވަޅުތައް ނާޅާ ފަރުވާ ކުޑަކޮށް ޢަމަލުކޮށް އިހުމާލުވެފައިވާ ކަމަށް އޭނާގެ މައްޗަށް ތުހުމަތު ކުރެވޭކަމަށެވެ.
