މަސްވެރިންނަށް ވަގުތުން ފައިސާ ނުދެވޭ މައްސަލައަށް ދެތިން ދުވަސް ތެރޭގައި ހައްލެއް ލިބިގެންދާނެ: މިފްކޯ
12 އެޕްރީލު 2020 | އާދީއްތަ 03:29އެވްރެޖްކޮށް 300 ޓަނެއްހާ މަސް ލިބޭ: ފައުޒީ
މަސްވެރިއެއް.
މަސްވެރިންނަށް ވަގުތުން ފައިސާ ނުދެވޭ މައްސަލައަށް ކުރިއަށް އޮތް ދެތިން ދުވަހުގެ ތެރޭގައި ޙައްލެއް ލިބިގެންދާނެ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
މަސްވެރިންނަށް ކުރިމަތިވާ ދަތިތައް ޙައްލު ކުރުމަށް ކުރަމުންދާ މަސައްކަތްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގުރާމުގައި ވާހަކަދައްކަވަމުން ފައުޒީ ވިދާޅުވީ އެންމެ ބޮޑު ކަންބޮޑުވުމަކީ މަސްވެރިންނަށް މަސް ކިރުމަށްފަހު ވަގުތުން ފައިސާ ނުދެވޭ މައްސަލަ ކަމަށާއި، އެކަން ޙައްލު ކުރުމަށް ސަރުކާރާ ގުޅިގެން މަސައްކަތް ކުރަމުންދާ ކަމަށެވެ.
މިހާރުވެސް އެވްރެޖްކޮށް 300 ޓަނެއްހާ މަސް ލިބޭކަން ފާހަގަކުރައްވައި ފައުޒީ ވިދާޅުވީ، އެއީ ދުވާލެއްގެ މައްޗަށް 6.5 މިލިއަނެއްހާ ރުފިޔާ ކަމަށެވެ.
ފައުޒީ ވިދާޅުވީ، މަސްވެރިންނަށް ވަގުތުން ފައިސާ ނުދެވޭ މައްސަލައަށް ކުރިއަށް އޮތް ދެތިން ދުވަހުގެ ތެރޭގައި ޙައްލެއް ލިބިގެންދާނެ ކަމަށް އުއްމީދު ކުރައްވާ ކަމަށެވެ. އަދި ބައިނަލްއަޤުވާމީ މަރކެޓުގައި އަގުތައް ހުރިގޮތުން މިފްކޯއަށްވެސް ވަގުތުން ފައިސާ ދިނުމުގައި ދަތިތަކެއް ހުންނަކަން އޭނާ ފާހަގަކުރެއްވިއެވެ. އަދި ސަރުކާރުގެ ވިސްނުންހުރީ ގަންނަ މަސް ރާއްޖޭގައި ސްޓޯރ ކުރުމުގެ ހަރުދަނާ ނިޒާމްތަކެއް ޤާއިމު ކުރުން ކަމަށެވެ. މަސްވެރިން ގެންނަ ހުރިހާ މަހެއް މިފްކޯއިން ގަންނާނެ ކަމުގެ ޔަޤީންކަން ފައުޒީ ދެއްވިއެވެ.
ފައުޒީ މިހެން ވިދާޅުވެފައިވާއިރު މިހާރު މުޅި ދުނިޔޭގައި ފެތުރެމުންދާ ކޮރޯނާ ވައިރަސްގެ ސަބަބުން ދުނިޔޭގެ އިޤުތިޞާދަށް ކުރިމަތިވަމުންދާ ގޮންޖެހުންތަކާއި ދިވެހިރާއްޖޭގެ އިޤުތިޞާދަށް ލޮޅުންއަރަމުންދާ މި ދަނޑިވަޅުގައި މަސްވެރިންނަށް ނުހަނު ބޮޑެތި ގެއްލުންތަކާއި ކުރިމަތިލާން ޖެހުމުގެ ސަބަބުން މަސްވެރިންދަނީ އެކަމާއި ގުޅިގެން ކަންބޮޑުވުން ފާޅުކުރަމުންނެވެ.
