ރާއްޖޭގައި ތިބި ބަންގްލަދޭޝްއަށް ނިސްބަތްވާ ރައްޔިތުންގެ ތެރެއިން އެނބުރި ޤައުމަށް ދާން ބޭނުންވާ މީހުން އެ ޤައުމުގެ ބޯޑަރު ހުޅުވުނުހާ އަވަހަކާ ފޮނުވާލާނެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.

ހޮނިހިރު ދުވަހުގެ ރޭ ނޭޝަނަލް އެމަރޖެންސީ އޮޕަރޭޝަންސް ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ ފައްޔާޒް ވިދާޅުވީ، ފޮރިން މިނިސްޓަރ އަބްދުﷲ ޝާހިދުއާއި، ބަންގްލަދޭޝްގެ ފޮރިން މިނިސްޓަރާއި މަޝްވަރާ ކުރެވިގެން އެމީހުން ފޮނުވާލުމުގެ އިންތިޒާމް ހަމަޖެއްސުމަށް މަސައްކަތް ކުރަމުންދާ ކަމަށެވެ.

އެގޮތުން އެނބުރި ޤައުމަށް ދާން ބޭނުންވާ ފަރާތްތައް ރަޖިސްޓްރީ ކުރުމަށް ހުޅުވާލުމުން މިހާތަނަށް 837 ބިދޭސީން އެކަމަށް އެދި ހުށައަޅާފައިވާކަން ފާހަގަކުރައްވައި މިނިސްޓަރ ވިދާޅުވީ، އޭގެ ތެރެއިން ދަތުރުފަތުރު ކުރުމުގެ ލިޔެކިއުންތައް ހަމަކޮށް ހުރީ 130 ބިދޭސީންގެ ކަމަށެވެ.

އަދި ބާކީ ތިބި ބިދޭސީންގެ ޑޮކިއުމަންޓުތައް ހަމަ ކުރުމުގެ މަސައްކަތް އެމްބަސީ މެދުވެރިކޮށް ފޮރިން މިނިސްޓްރީން ވެސް ކުރަމުންދާ ކަމަށާއި، ބަންގްލަދޭޝްގެ ބޯޑަރު ހުޅުވިހާ އަވަހަށް އެ އެންމެން ފޮނުވާލާނެ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ބިދޭސީންގެ މައްސަލައަކީ ރާއްޖެއަށް ކުރިމަތިވެފައިވާ ބޮޑު މައްސަލައެއް ކަމަށާއި، އެކަމަށް ހައްލެއް ގެނައުމަކީ ސަރުކާރުގެ ވެސް ވައުދެއް ކަމަށެވެ. އެގޮތުން ނިމިދިޔަ އަހަރުގެ ސެޕްޓެމްބަރު މަހު ސަރުކާރުން އެކަމާ ގުޅޭ މޮރިޓޯރިއަމް ނެރުނު ފަހުން މިއަދާ ހަމައަށް ބަންގްލަދޭޝްއިން އަލަށް އައީ ތަމްރީނު ނުލިބިވާ މަސައްކަތްތެރިންގެ 1362 މީހުން ކަމަށާއި، ތަމްރީނު ލިބިފައިވާ މަސައްކަތްތެރިންގެ 38 މީހުން އައިސްފައިވާ ކަމަށް މިނިސްޓަރ ވިދާޅުވިއެވެ.