ކޯވިޑް-19 އާއި ގުޅިގެން ސަރުކާރު އޮފީސްތައް ބަންދު ކޮށްފައިވުމާއެކު، ކަސްޓަމަރުންނަށް ހިދުމަތް ފޯރުކޮށްދިނުމަށްޓަކައި މި ހިނގާ އޭޕްރީލް މަހުގެ 13 ވާ ހޯމަ ދުވަހާއި 15 ވާ ބުދަ ދުވަހުގެ ހެނދުނު 9.00 އިން މެންދުރު 12.00 އަށް މާލޭ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިޔުއެސްސީ) ގެ ކަސްޓަމަރ ސަރިވިސް ކައުންޓަރު އަދި ރިސެޕްޝަން (ފެން ބިލްޑިންގ، 5 ވަނަ ފަންގިފިލާ) އިން ހިދުމަތް ލިބޭނެ ކަމަށް އެ ކުންފުނިން ބުނެފިއެވެ.

އެމްޑަބްލިޔުއެސްސީ އިން ނެރުނު ބަޔާނެއްގައި ބުނީ ފެންބިލަށް ޗެކު މެދުވެރިކޮށް ފައިސާ ބަލައިގަތުމާއި ކޯޓޭޝަންތަކަށް ޗެކް އަދި ކާރޑް މެދުވެރިކޮށް ފައިސާ ބަލައިގަތުމުގެ ކަންކަން އެ ކުންފުނީގެ ކަސްޓަމަރ ސަރވިސް ކައުންޓަރުން ފޯރުކޮށްދިނުމަށް ހަމަޖެހިފައިވާ ކަމަށާއި ސިޓީ އާއި އިންވޮއިސް އަދި އެހެނިހެން ލިޔެކިޔުންތައް ބަލައިގަތުމާއި ހުށައަޅާފައިވާ އިންވޮއިސްތަކަށް، ހަމަޖެހިފައިވާ އުސޫލުން، ޕޭމަންޓް ދޫކުރުން ރިސެޕްޝަނުން ކުރިއަށްދާނެ ކަމަށެވެ.

މި ދުވަސްތަކުގައި ކުންފުނިން އަތޮޅުތެރޭގައި ޚިދުމަތް ފޯރުކޮށްދޭ ރަށްރަށުގެ ކަސްޓަމަރ ސަރވިސްގެ ކައުންޓަރު ތަކުން ވެސް މި ދުވަސްތަކުގައި ޚިދުމަތްތައް ލިބޭނެކަން ފާހަގަކޮށް އެ ކުންފުނިން ބުނީ ފެންބިލުތަކަށް ފައިސާ ބަލައިގަތުމަށް ހުއްދަ ދެވިފައިވާ ޕޭމަންޓް އައުޓްލެޓްތަކުން ފެން ބިލަށް ފައިސާ ދެއްކޭނެ ކަމަށެވެ.

އެ ކުންފުނީގެ މުވައްޒަފުންނާއި ކަސްޓަމަރުން ވީހާވެސް ބޮޑަށް ބޭރުގައި ހޭދަކުރަންޖެހޭ ވަގުތު މަދުކުރުމަށް އެޅޭ ރައްކާތެރިކަމުގެ ފިޔަވަޅެއްގެ ގޮތުން، ބިލަށް އަރާ އަދަދު ބަލާލުމަށާއި ބިލަށް ފައިސާ ދެއްކުމަށް، އެމްޑަބްލިޔުއެސްސީގެ މޯބައިލް އެޕްލިކޭޝަން ބޭނުން ކުރުމަކީ އެކުންފުނިން އިލްތިމާސްކޮށްފައިވެއެވެ. އަދި ކުންފުނީގެ ޚިދުމަތްތަކަށް ވެބްސައިޓު މެދުވެރިކޮށް އޮންލައިންކޮށް ފޯމު ހުށަހެޅެނޭކަމަށް ވެސް ބުނެފައިވެއެވެ.

މިވަގުތު ކުންފުނީގެ ޚިދުމަތްތަކާއި އެކިކަންކަމާއި ގުޅޭގޮތުން ހުށަހަޅަން ބޭނުންވާ ސިޓީތަކާއި މުހިންމު ލިޔެކިޔުންތައް އެ ކުންފުނީގެ އީމެއިލް[email protected]ފޮނުއްވައި ދެއްވުމަށް އެދޭ ކަމަށާއި އެކަމާ ގުޅޭ އިތުރު މަޢުލޫމާތު، ކުންފުނީގެ 24 ގަޑިއިރު ގުޅޭ ކަސްޓަމަރ ކެއަރ ސެންޓަރ 105 އަށް ގުޅުމުން ލިބޭނެ ކަމަށް ބަޔާނުގައި ވަނީ ފާހަގަކޮށްފައެވެ.

މި ފުރުސަތުގައި، އެމްޑަބްލިޔުއެސްސީގެ ކަސްޓަމަރުންގެ ފަރާތުން ލިބޭ އެއްބާރުލެއްވުން ފާހަގަކޮށް ޝުކުރު އަދާކުރާ ކަމަށް އެމްޑަބްލިޔުއެސްސީ އިން ބުންޏެވެ.