އިންޑިއާގައި ތާށިވީ 50 ދިވެހިން އަނބުރާ ގައުމަށް ގެނެސްފި
އަނބުރާ ގެނައުމުގައި އިސްކަންދެނީ ދައުލަތުގެ ހަރަދުގައި ބޭރަށް ފޮނުވާފައި ތިބި މީހުންނަށް
ޓްރެވެންޑްރަމް އަދި ކޮޗިންގައި ތިބި ދިވެހިން އިންޑިއާއިން ރާއްޖެއަށް ފުރަން އެއަރޕޯޓަށް ގޮސް
ދައުލަތުގެ ހަރުދުގައި އިންޑިއާގައި އެކިކަންކަމުގައި ގޮސްތިބި ދިވެހިންގެ ތެރެއިން 50 ދިވެއްސެއް އަނބުރާ ގައުމަށް ގެނެސްފި އެވެ.
އިންޑިއާގެ ޓްރިވެންޑްރަމްގައި ހުންނަ ރާއްޖޭގެ ކޮންސިއުލޭޓް ޖެނެރަލް އިން ބުނީ، ރާއްޖެއަށް އެނބުރި ނުދެވި ތާށިވެފައި ތިބި 50 ދިވެހިން އަނބުރާ ފޮނުވުމުގައި އެހީތެރިކަން ފޯރުކޮށްދީފައިވާ ކަމަށެވެ. ޓްރިވެންޑްރަމްގައި ހުންނަ ކޮންސިއުލޭޓް ޖެނެރަލް އިން ވަނީ އެ ފަރާތްތައް އެއާޕޯޓަށް ދިއުމަށް ބަހުގެ އިންތިޒާމް ހަމަޖައްސައިދީ އެހީތެރިކަން ފޯރުކޮށްދީފަ އެވެ.
50 ދިވެހިން ރާއްޖެ އައިސްފައިވަނީ ގައުމީ އެއަރލައިން މޯލްޑިވިއަންގެ ފްލައިޓެއްގަ އެވެ. މި ފްލައިޓަކީ އިންޑިއާގައި ތާށިވެފައި ތިބި ދިވެހިން ގެނައުމަށް ދިޔަ ފުލައިޓެކެވެ. އަދި އިންޑިއާ އަށް ފްލައިޓް ދިޔަ އިރު، އެ ގައުމުގެ ޓްރިވެންޑްރަމް އަދި ކޮޗިންގައި ތިބި ތިވެހިންނަށް ކެއަރ ޕެކޭޖްތައް ވެސް ވަނީ ގެންގޮސްދީފަ އެވެ.
މޯލްޑިވިއަން އިން ބުނީ ހޮނިހިރު ދުވަހުގެ މެންދުރު 12:00 ޖެހި އިރު ރާއްޖެ އައިސްފައިވަނީ 50 މީހުން ކަމަށާއި، އިތުރު ފުލައިޓެއް 150 މީހުންނާއެކު މިއަދުގެ ވަގުތެއްގައި އަންނާނެ ކަމަށެވެ.
ކެއަރ ޕެކޭޖް ފޮނުވުމަށް އެހީތެރިވުމުގެ ގޮތުން 150 ކެއަރ ޕެކޭޖް ވަނީ ގެންގޮސްދީފަ އެވެ. ކޮވިޑް-19 އާއި ގުޅިގެން އިންޑިއާގައި ކާފިއު އިއުލާންކޮށްފައިވާތީ މި ކެއަރ ޕެކޭޖްތައް އާއިލާތަކާއި ހަވާލުކުރާނީ ކޮންސިއުލޭޓް ޖެނެރަލްއިން ކަމަށް ފޮރިން މިނިސްޓްރީން ވަނީ ބުނެފަ އެވެ.
ބޭރު ގައުމުތަކުގައި ތިބި ދިވެހިން ރާއްޖެ ގެނައުމުގައި އެންމެ ބޮޑު އިސްކަމެއް ދެނީ ދައުލަތުގެ ހަރަދުގައި ބޭސްފަރުވާއަށާއި، ދައުލަތުގެ ހަރަދުގައި ކިޔަވަން ގޮސްފައި ތިބި މީހުންނަށް ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީން ވަނީ ބުނެފައެވެ.
