ކޮވިޑް-19: 24 ގަޑި އިރުގެ ތެރޭގައި އެމެރިކާ އިން 2000 ށް ވުރެ ގިނަ މީހުން މަރުވެއްޖެ!
11 އެޕްރީލު 2020 | ހޮނިހިރު 08:07މިއީ އެއް ދުވަހުގެ ތެރޭގައި ކޮވިޑް-19 ޖެހިގެން ބަޔަކު މަރުވީ ކަމަށް ރިޕޯޓް ކުރި ފަހަރު
ބްރުކްލިން، ނިއު ޔޯކުގައި ހުންނަ ވައިކޮފް ހޮސްޕިޓަލް
ހުކުރު ދުވަހު އެކަނި، ކޮވިޑް-19 ޖެހިފައިވާ މީހުންގެ ތެރެއިން 2،108 މީހަކު މަރުވެފައިވާ ކަމަށް ޖޯން ހޮޕްކިންސް ޔުނިވަރިސިޓީ ގެ ތަފާސްހިސާބުތަކުން ދައްކައިފި އެވެ.
މިއީ މިހާތަނަށް އެއް ދުވަހުގެ ތެރޭގައި މި ވައިރަސް ޖެހިގެން ދުނިޔޭގެ ގައުމަކުން މިހާ ގިނަ އަދަދަކަށް މީހުން މަރުވީ ފަހަރެވެ. މިއާއެކު، ކޮވިޑް-19 ޖެހިގެން އެމެރިކާ އިން މަރުވީ މީހުންގެ އަދަދު ވަނީ 18،000 އަށް ވުރެ އިތުރުވެފަ އެވެ. މި އަދަދަށް ވުރެ އިތުރަށް މީހުން މަރުވެފައި ވަނީ ހަމައެކަނި އިޓަލީ ގައެވެ.
ނިމިދިޔަ މާޗް މަހު ގެ ފަހުކޮޅުން ފެށިގެން، ވައިރަސް އަށް ޕޮޒިޓިވްވެފައިވާ މީހުންގެ އަދަދު އެންމެ ގިނައީ އެމެރިކާގަ އެވެ. މި ހިނގާ އޭޕްރިލް މަސް ފެށުނު އިރު، އެ އަދަދު ހުރީ 216،622 ގައެވެ. އެޕްރިލް 10 ވަނަ ދުވަހުގެ ނިޔަލަށް މި އަދަދު ވަނީ 502،876 އަށް އިތުރުވެފަ އެވެ.
އެމެރިކާގެ ސްޓޭޓް ތަކުގެ ތެރެއިން، ވައިރަހުގެ އަސަރު އެންމެ ބޮޑަށް ކޮށްފައި ވަނީ، ނިއު ޔޯކް އަދި ނިއު ޖަރޒީ އަށެވެ. އެގޮތުން ނިއު ޔޯކުން އެކަނިވެސް ވަނީ 190،000 އާ ގާތްކުރާ އަދަދަކަށް ކޭސް ރެކޯޑް ކުރެވިފަ އެވެ. މިއީ މި ވައިރަސް ޖެހިފައިވާ މީހުން ދެވަނަ އަށް އެންމެ ގިނައިން ރިކޯޑްކުރެވިފައިވާ ގައުމު ކަމުގައިވާ ސްޕެއިން އަށް ވުރެ އިތުރު އަދަދެކެވެ.
