ޓޮޓެންހަމްގެ ނިންމުން ބަދަލުކުރަން ސަޕޯޓަރުން ގޮވާލައިފި

ޓޮޓެންހަމް ހޮޓްސްޕާގެ މުވައްޒަފުންގެ މުސާރަ ކުޑަކުރުމަށާއި، ބައެއް މުވައްޒަފުން ނޯޕޭ ލީވްއަށް ފޮނުވާލަން ނިންމި ނިންމުން ބަދަލުކުރުމަށް އެ ކްލަބުގެ ސަޕޯޓަރުން ގޮވާލައިފި އެވެ.

ދުނިޔޭގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ޓޮޓެންހަމުން ވަނީ އެ ކްލަބުގެ 550 މުވައްޒަފުންގެ މުސާރައިން 20 އިންސައްތަ އުނިކުރަން ނިންމާފައެވެ. އަދި މުސާރަ ކުޑަކުރަން އެއްބަސްނުވާ މުވައްޒަފުން ނޯޕޭ ލީވްއަށް ފޮނުވާލުމަށް ވަނީ ނިންމާފައެވެ.

އިނގިރޭސިވިލާތުގައި ނޯޕޭއަށް ފޮނުވާލާ މުވައްޒަފުންނަށް ސަރުކާރުން ކަނޑައަޅާފައިވާ ސްކީމްގެ ދަށުން އެމީހެއްގެ މުސާރައިގެ 80 އިންސައްތަ ލިބެއެވެ.

ޓޮޓެންހަމްގެ މި ނިންމުމަށް އެޓީމުގެ ސަޕޯޓަރުން އަންނަނީ ފާޑު ކިޔަމުންނެވެ. އަދި ވީ އެންމެ އަވަހަކަށް މި ނިންމުން ބަދަލުކުރުމަށް، ޓޮޓެންހަމްގެ ވެރިންނަށް އެޓީމުގެ ސަޕޯޓަރުން ވަނީ ގޮވާލާފައެވެ.

މީގެ ކުރިން އިނގިރޭސި ޕްރިމިއާ ލީގުގައި ވާދަކުރަމުން އަންނަ ނިއުކާސަލް ޔުނައިޓެޑާއި، ބޯންމަތު އަދި ނޯވިޗް ސިޓީގެ ބައެއް މުވައްޒަފުން ވަނީ ނޯޕޭއަށް ފޮނުވާލާފައެވެ.

މުވައްޒަފުން ނޯޕޭއަށް ފޮނުވުމަށް ލީގުގެ އެއްވަނައިގައި އޮތް ލިވަޕޫލުން އެންމެ ފުރަތަމަ ނިންމި ނަމަވެސް، ފަހުން ވަނީ ސަޕޯޓަރުންގެ ކިބައިން މާފަށް އެދުމަށްފަހު އެ ނިންމުން ބަދަލުކޮށްފައެވެ. މުވައްޒަފުންނަށް ބަރާބަރަށް މުސާރަދޭނެކަން މިހާތަނަށް ހާމަކޮށްފައިވަނީ ލިވަޕޫލްގެ އިތުރުން އެންމެ ފަހުގެ ޗެމްޕިއަން މެންޗެސްޓާ ސިޓީންނެވެ.

ކޮވިޑް-19 ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ޕްރިމިއާ ލީގުގެ ބައެއް ކްލަބުތަކުގެ މުވައްޒަފުން ނޯޕޭއަށް ފަނޮވާލަމުން އަންނައިރު، ޕްރިމިއާ ލީގު ކްލަބުތަކުގެ ކުޅުންތެރިންގެ މުސާރައިން 30 އިންސައްތަ އުނިކުރުމަށް އަންނަނީ މަޝްވަރާ ކުރަމުންނެވެ. މިހާތަނަށް ކުޅުންތެރިންގެ މުސާރަ ކުޑަކޮށްފައިވަނީ ސައުތެމްޓާނާއި ވެސްޓް ހޭމް ޔުނައިޓެޑުންނެވެ.