ޔަމަން އިން ފުރަތަމަ ފަހަރަށް ކޮވިޑް-19 ގެ ކޭސްއެއް ރިޕޯޓްކޮށްފި
10 އެޕްރީލު 2020 | ހުކުރު 18:25ޕޮޒިޓިވްވި މީހާއާ ގުޅުން ހުރި މީހުން ވަނީ އެކަހެރިކޮށްފައި
ކޮވިޑް-19 އިން ރައްކާތެރިވުމުގެ ގޮތުން މީހަކު މާސްކު އަޅައިގެން
ދާހިލީ ހަނގުރާމައިން ސުންނާފަތިވެފައިވާ ޔަމަނުން ފުރަތަމަ ފަހަރަށް ކޮވިޑް-19 ގެ ކޭސްއެއް ރިޕޯޓްކޮށްފިއެވެ.
ޔަމަނުގެ ސަރުކާރުން ބުނީ، ކޮވިޑް-19 ޖެހިފައިވަނީ އިރުމަތީ ހަދްރަމައުތު ޕްރޮވިންސްގެ މީހަކަށް ކަމަށެވެ. ކޮވިޑް-19 އާ ދެކޮޅަށް މަސައްކަތް ކުރުމަށް އެކުލަވާލާފައިވާ ކޮމިޓީން ބުނީ، ޕޮޒިޓިވްވި މީހާގެ ހާލު ރަނގަޅު ކަމަށާއި، އެ މީހާއަށް ބޭނުންވާ ފަރުވާދެމުންދާ ކަމަށެވެ. އަދި އެމީހާއާ ގުޅުން ހުރި މީހުން ޓްރޭސްކޮށް އެ މީހުން އެކަހެރި ކޮށްފައިވާ ކަމަށް ޔަމަނުގެ ސަރުކާރުން ވަނީ ހާމަކޮށްފައެވެ.
ހަދަރްމައުތު އަކީ ޔަމަނުގެ އެންމެ ބޮޑު އެއް ޕްރޮވިންސެވެ. އެ ފްރޮވިންސްގައި ހުކުރު ދުވަހު ހެނދުނުން ފެށިގެން ހޮނިހިރު ދުވަހާ ހަމަޔަށް ކާފިޔު ހިންގުމަށް ވަނީ އިރުޝާދު ދީފައެވެ. އަދި މާރުކޭޓްތައް ބަންދުކޮށް މީހުުން އެއް ތަނަކަށް އެއްވުން ވަނީ މަނާކޮށްފައެވެ.
ޔަމަނުގައި ހިނގަމުންދާ ދާހިލީ ހަނގުރާމައިގެ ސަބަބުން އެ ގައުމުގެ ސިއްހީ ހިދުމަތްތައް ދޭ ގިނަތަންތަނެއް ސުންނާފަތިވެ ބައެއް ތަންތަން ވަނީ ބަންދުކޮށްފައެވެ. އެއާއި އެކު ބަލި ފެތުރިއްޖެނަމަ އެ ގައުމުގެ ހާލަތު އަންދާޒާ ކުރާވަރަށްވުރެ ގޯސްވާނެއެވެ.
