ކޮވިޑް-19 އާ ގުޅިގެން ބައި ބިލިއަނަށް ވުރެ ގިނަ މީހުން ފަގީރު ވެދާނެ!

ކޮވިޑް-19 އާ ގުޅިގެން ބައި ބިލިއަނަށްވުރެ ގިނަ މީހުން ފަގީރުވެދާނެ ކަމުގެ ބިރު އެބަ އޮތް ކަމަށް ހިލޭ ސާބަހަށް މަސައްކަތް ކުރާ ޖަމިއްޔާތަކުން ބުނެފި އެވެ.

ހިލޭ ސާބަހަށް މަސައްކަތް ކުރާ 19 ޖަމިއްޔާ އެއް އެކުވެގެން އުފައްދާފައިވާ އޮކްސްފާމް އިން ބުނީ, ވަޒީފާތައް ގެއްލި ހަރަދު ކުރާނެ ފައިސާ ނެތުމުން އާއިލާތައް ބަނޑަށް ޖެހިދާނެ ކަމުގެ ބިރު ހީވެފައިވާ ކަމަށެވެ.

ކޮވިޑް-19 އާ ގުޅިގެން މުޅި ދުނިޔޭގެ އިގްތިސާދީ ދުވެލި މަޑުޖެހިފައިވާ އިރު، މި ދަނޑިވަޅުގައި އެންމެ ނޭދެވޭ އަސަރުކުރަނީ ގައުމު ތަކުގައި ދިރިއުޅެމުންދާ ފަގީރުންނަށެވެ. އޭގެ ތެރޭގައި އެންމެ ބޮޑަށް ނިކަމެތިވެގެން ދާނީ އަންހެނުން ކަމަށް ވެސް ރިޕޯޓުތަކުން ދައްކަ އެވެ.

އޮކްސްފާމް އާ ހަވާލާދީ ރޮއިޓާރޒް އިން ބުނީ 1.2 ބިލިއަން މީހުންގެ ތެރެއިން 434 މިލިއަން މީހުން ފަގީރު ހާލަތަށް ވެއްޓުމުގެ ފުރުސަތު އޮބަ އޮތް ކަމަށެވެ. އެގޮތުން އެންމެ ބޮޑަށް ފަގީރު މީހުންނަށް ދުވާލަކަށް 1.90 ޑޮލަރު ނުލިބޭ ކަމަށާއި، ފަގީރު މީހުންނަށް 5.50 ޑޮލަރު ނުލިބޭނެ ކަމަށް ބުނެފައިވެ އެވެ.

ހަލުވިމިނެއްގައި ދުނިޔޭގެ އެކިކަންކޮޅު ތަކުގައި ކޮވިޑް-19 ފެތުރެމުންދާއިރު، ގިނަ ބައެއްގެ ވަޒީފާ ގެއްލި ވިޔަފާރިތައް ވަނީ ހުއްޓިފައެވެ. އަދި މި ވަބާގެ ސަބަބުން، ދުނިޔެ ނުދެކާ ވަރުގެ ބޮޑު އިގްތިސާދީ ކާރިސާއަކަށް ދިއުމުގެ ބިރު ބޮޑު ކަމަށް އައިއެމްއެފް އިން ވެސް ވަނީ ހާމަކޮށްފަ އެވެ.