ކޮވިޑް-19 ފެތުރެމުންދާ ޤައުމެއް ކަމަށްވާ ދެކުނު ކޮރެއާއިން ފުރަތަމަ ފަހަރަށް ކޮވިޑް-19 ގެ ކޭސްއެއް ރިޕޯޓްނުވެ ހިނގައްޖެ އެވެ.

އެ ޤައުމުގެ ތަފާސްހިސާބުތައް ދައްކާގޮތުން ޗައިނާއިން ބޭރުން އެންމެ ގިނަ ކޭސް ރިޕޯޓް ކުރެވުނު ތަންތަނުގެ ތެރޭގައިވެސް ހިމެނިގެންދިޔަ ޑޭގޫއިން ހުކުރު ދުވަހު އެއްވެސް ކޭސްއެއް ރިޕޯޓްކޮށްފައެއް ނުވެ އެވެ. މިއީ ފެބްރުއަރީ މަހުގެ ފަހުކޮޅު ޑޭގޫގައި ހަލުވި މިނެއްގައި ކޮވިޑް-19 ފެތުރެން ފެށި ފަހުން ކޭސްއެއް ރިޕޯޓްނުވެ ދިޔަ ފުރަތަމަ ދުވަހެވެ.

ދެކުނު ކޮރެއާއިން 10،450 ކޭސް ރިޕޯޓް ކުރެވިފައިވާއިރު، އޭގެ ތެރެއިން ގިނައީ ޑޭގޫއިން ރިޕޯޓް ކުރެވުނު ކޭސްތަކެވެ. ޑޭގޫ އިން އެކަނި 6807 މީހުން ވަނީ ވައިރަސްއަށް ޕޮޒިޓިވްވެފަ އެވެ. އޭގެ އިތުރުން، ދެކުނު ކޮރެއާއިން އައު ކޭސްތައް ފެންނަމުންދާ މިންވަރުވެސް ކުރިއާބަލާއިރު، ދަށްވެފައިވާކަމަށް ރިޕޯޓްތައް ބުނެ އެވެ.

މީގެ ކުރިން އެ ޤައުމުގައި ހަލުވި މިނެއްގައި ވައިރަސް ފެތުރުނުއިރު، ދުވާލެއްގެ މައްޗަށް 900 އެއްހާ ކޭސް ރިޕޯޓް ކުރެވުނު ކަމަށާއި، ނަމަވެސް މިހާރު އެ އަދަދު ދަށްވެފައިވާއިރު، ހުކުރު ދުވަހު ރިޕޯޓް ކުރެވުނީ އެންމެ 27 ކޭސްކަމަށް ކޮރެއާގެ ސެންޓަރ ފޮރ ޑިޒީސް ކޮންޓްރޯލްއާ ޙަވާލާދީ ރިޕޯޓްތައް ބުނެ އެވެ.

ޑޭގޫއިން ގިނަ އަދަދެއްގެ މީހުން ވައިރަސްއަށް ޕޮޒިޓިވްވާން ދިމާވި އެއް ސަބަބަކީ ފެބްރުއަރީ މަހުގެ ފަހުކޮޅު އެ އަވަށުގެ ޗާރޗެއްގައި އޮތް ހަފްލާއެއްގެ ތެރެއިން ވައިރަސް އެތައް ބަޔަކަށް ފެތުރިގެންދިޔަ ހިސާބުންނެވެ. އެގޮތުން އޭރު ޗައިނާއިން ބޭރު އެންމެ ގިނަ ކޭސް ރިޕޯޓް ކުރެވެމުންދިޔައީވެސް ދެކުނު ކޮރެއާގެ ޑޭގޫއިންނެވެ.