ކޮވިޑް-19 ވައިރަސް އަށް ޕޮޒިޓިވްވި ނެދަރލޭންޑްސްގެ 107 އަހަރުގެ މީހެއްގެ ބަލި ފަސޭހަވެއްޖެ އެވެ.
ބޭރުގެ މީޑިއާތަކުން ރިޕޯޓުކުރާ ގޮތުން 107 އަހަރުގެ ކޯރނީލިއާ ރާސް އަކީ މިހާތަނަށް މި ބަލި ފަސޭހަވި މީހުންގެ ތެރެއިން އެންމެ ދުވަސްވީ މީހާއެވެ. ކޮރނީލިއާ މި ވައިރަސް އަށް ޕޮޒިޓިވް ވެފައިވަނީ މާޗް މަހުގެ 17 ވަނަ ދުވަހު އެވެ. އެއީ އޭނާގެ 107 ވަނަ އުފަން ދުވަސް ފާހަގަކުރި ދުވަސް ކަމަށް ވެސް ރިޕޯޓްތައް ބުނެ އެވެ.
އޭނާ މި ވައިރަސް އަށް ޕޮޒިޓިވްވީ، އޭނާ ދިރިއުޅޭ ނަރސިންގ ހޯމްގައި ދިރިއުޅޭ އެހެން މީހުންނާ އެކު ޗަރޗް ސަރވިސް އަށް ދިއުމަށްފަހު ކަމަށް ބޭރުގެ މީޑިއާތަކުން ރިޕޯޓުކޮށްފައި ވެއެވެ. ކޮރނީލިއާގެ އިތުރުން އެ ސަރވިސް އަށް ދިޔަ 40 މީހުން ވަނީ ވައިރަސް އަށް ޕޮޒިޓިވް ވެފަ އެވެ.
ކޮރނީލިއާ އަށް ފަރުވާދިން ޑޮކްޓަރަކާއި ހަވާލާދީ ބޭރުގެ މީޑިއާއެއް ރިޕޯޓުކުރާ ގޮތުގައި އެ 40 މީހުންގެ ތެރެއިން 12 މީހަކު ވަނީ މަރުވެފަ އެވެ. ކޮރނީލިއާގެ އާއިލާ މީހުން ތިބީ އޭނާ މި ބަލިން ރަނގަޅުވާނެކަމުގެ އުއްމީދު ކަނޑާލައިގެންނެވެ.
ނެދަރލޭންޑްސް އިން މިހާތަނަށް 21،762 ކޭސްއެއް ރިޕޯޓުކުރެވިފައިވެއެވެ. އަދި މި ބަލި ޖެހިގެން 2،396 މީހުން ވަނީ މަރުވެފައެވެ.
