ކޮވިޑް-19: ބުދަ ދުވަހު އެކަނިވެސް އެމެރިކާގައި 33،000 ވުރެ ގިނަ މީހުންނަށް ވައިރަސް ޖެހުނު
ބުދަ ދުވަހު ވައިރަސް ޖެހިގެން 1,922 މީހުން ވަނީ އެގައުމުން މަރުވެފައި
އެންމެ ހަލުވިމިނުގައި ވައިރަސް ޖެހެމުން އަންނަނީ އެމެރިކާގައި
ދުނިޔޭގައި ކޮވިޑް-19 އެންމެ ހަލުވި މިނުގައި ފެތުރެމުންދާ އެމެރިކާގައި ބުދަ ދުވަހު އެކަނިވެސް 33،000 ށް ވުރެ ގިނަ މީހުންނަށް ވައިރަސް ޖެހިއްޖެ އެވެ.
ބުދަ ދުވަހު އެޤައުމުން 33,323 މީހުންނަށް ވައިރަސް ޖެހިފައިވާއިރު ބުދަ ދުވަހު ވައިރަސް ޖެހިގެން 1,922 މީހުން ވަނީ އެގައުމުން މަރުވެފަ އެވެ. މިއީ މިހާތަނަށް އެގައުމުން އެއް ދުވަހާ އެންމެ ގިނަ މީހުންގެ މަރުވެގެން ރިޕޯޓުކޮށްފައިވާ ދުވަސްކަން ފާހަގަކޮށްލެވެއެވެ. އެއާއެކު އެޤައުމުން ވައިރަސް ޖެހިގެން މަރުވި މީހުންގެ އަދަދު ވަނީ 14,817 އަށް އަރާފަ އެވެ. އެމެރިކާގައި 435,128 މީހުންނަށް މިހާތަނަށް އާއިރު ވައިރަސް ވަނީ ޖެހިފައެވެ.
އެމެރިކާގެ ހުރިހާ ސްޓޭޓްތަކަކުން ވަނީ ވައިރަސް ޖެހިފައިވާ މީހުން ފެނިފައެވެ. އެންމެ ގިނަ ޢަދަދަކަށް ވައިރަސް ޖެހިގެން ރިޕޯޓުކުރަމުން އަންނަނީ އެމެރިކާގެ ނިއުޔޯކުންނެވެ. އެއީ 151,069 މީހުންނެވެ. އެންމެ ގިނަ ޢަދަދަކަށް މީހުން މަރުވެފައިވަނީވެސް ނިއުޔޯކުންނެވެ. އެއީ 6,268 މީހުންނެވެ. ނިއުޔޯކަށްފަހު ދެން އެންމެ ގިނަ ޢަދަދަކަށް މީހުންނަށް ވައިރަސް ޖެހެނީ ނިއު ޖާރޒީންނެވެ. ނިއު ޖާރޒީން މިހާތަނަށް 47,437 މީހުންނަށް ވައިރަސް ޖެހިފައިވާއިރު އެ ސްޓޭޓުން 1,504 މީހުންވަނީ މިހާތަނަށް އާއިރު ވައިރަސް ޖެހިގެން މަރުވެފަ އެވެ.
ހަލުވިކަމާއެކު އެމެރިކާގައި ވައިރަސް ފެތުރެމުންދާއިރު ވައިޓް ހައުސްއިން ވަނީ ސޯޝަލް ޑިސްޓޭންސްގެ ގައިޑްލައިނެއް އެކުލަވާލާ އެއާ އެއްގޮތަށް އަމަލުކުރަމުންދިޔުމަށް އެގައުމުގެ ރައްޔިތުންނަށް އަންގާފަ އެވެ.
