ސައުދީއަރަބިއްޔާއާއި ޔޫއޭއީގެ ގުޅިފައިވާ ލަޝްކަރުން ޔަމަނަށް ދޭ ޙަމަލާތައް މެދުކަނޑާލަން ނިންމައިފިއެވެ.
އަލްޖަޒީރާގައި ރިޕޯޓުކޮށްފައިވާ ގޮތުގައި އެލަޝްކަރުން ޔަމަނަށް ދޭ ޙަމަލާތައް މެދުކަނޑާލަން ނިންމީ ބުރާސްފަތި ދުވަހު ޔަމަނުގެ ގަޑިން މެންދުރު 12:00އިން ފެށިގެން ދެހަފުތާގެ މުއްދަތަކަށެވެ. މިއީ ޔަމަނުގައި ޙަރަކާތްތެރިވާ ހޫޘީ ހަނގުރާމަވެރިންނަށް ޢަމާޒުކޮށްދޭ ޙަމަލާތަކެކެވެ.
ސައުދީއަރަބިއްޔާއާއި ޔޫއޭއީގެ ގުޅިފައިވާ ލަޝްކަރުން މިނިންމުން ނިންމީ ކޮވިޑް-19އާ ގުޅިގެން ޙަމަލާތައް މެދުކަނޑާލަން އދ އިން ގޮވާލާފައިވަނިކޮށްށެވެ. އދ އިން މިހެން ގޮވާލީ ކޮވިޑް-19 ކޮންޓްރޯލްކުރުމަށް ކުރަމުންދާ މަސައްކަތްތަކަށް ވަގުތު ހޯދުމުގެ ގޮތުން ކަމަށް ވެސް ރިޕޯޓުކޮށްފައިވެއެވެ. އަދި މިވަގުތުގެ ބޭނުން ހިފައި، ޔަމަނުގައި ހިގަމުންދާ ހަމަނުޖެހުންތައް ހުއްޓުވުމަށް މަޝްވަރާކުރުމަށް ފުރުޞަތު ހޯދުމުގެ މަސައްކަތްތައް ކުރެވޭނެ ކަމަށް ވެސް އދ އިން ބުނެއެވެ.
2014 ވަނަ ހޫޘީގެ ހަނގުރާމަވެރިން ނުކުމެ އެޤައުމުގެ ސަރުކާރު ވައްޓާލުމާ ގުޅިގެން ފެނުނު މިހަމަނުޖެހުންތަކަށް މިއަދާ ހަމައަށް ވެސް ޙައްލެއް ލިބިފައެއްނުވެއެވެ.
